كەشە «Qamqor» تۇرعىن ءۇي باعدارلاماسىن نەسيەلەندىرۋ جونىندەگى كەلىسىمگە شىمكەنت قالاسىنىڭ اكىمى مۇرات ايتەنوۆ پەن «وتباسى بانك» اق باسقارما توراعاسى ءلاززات يبراگيموۆا قول قويدى.
باعدارلاماعا دارىگەرلەر, مەدبيكەلەر, سانيتارلار, مۇعالىمدەر, تاربيەشىلەر, جوعارى وقۋ ورىندارى مەن كوللەدجدەردىڭ وقىتۋشىلارى, عىلىمي-زەرتتەۋ ينستيتۋتتارىنىڭ عىلىمي قىزمەتكەرلەرى, مادەنيەت, سپورت قىزمەتكەرلەرى, جۋرناليستەر, قالالىق مەملەكەتتىك ۇيىمدار مەن حالىققا قىزمەت كورسەتۋ ورتالىقتارىنىڭ قىزمەتكەرلەرى جانە ەنەرگەتيكا سالاسىنىڭ وكىلدەرى قاتىسا الادى.
وتباسى بانك جاڭا تۇرعىن ءۇي باعدارلاماسى بويىنشا وتىنىشتەردى قابىلداپ, الەۋەتتى قارىز الۋشىلاردىڭ ءتىزىمىن جاسايدى. بانك بۇل ۇدەرىستى «باسپانا ماركەت» پورتالىندا (https://otbasybank.kz/) تسيفرلاندىرادى. وتىنىشتەردىڭ قاشان قابىلداناتىنى تۋرالى مالىمەت كەيىنىرەك جاريالانادى.
جەڭىلدەتىلگەن نەسيەلەندىرۋگە ۇمىتكەرلەر پۋلىنا كوپ ۇپاي جيناعان ازاماتتار ەنەتىن بولادى. ۇپايلاردى ساناعاندا نەكەدە تۇرعان جىلدار سانى, بالالاردىڭ سانى, جۇمىس ءوتىلى, شىمكەنتتە تىركەلۋ ۇزاقتىعى جانە وتباسى بانكتە ۇمىتكەردىڭ دەپوزيتى بار-جوعى ەسكەرىلەدى.
قاتىسۋشىلار پۋلى جاساقتالعاننان كەيىن ۇمىتكەرلەر وتباسى بانككە نەسيە الۋعا جولداما الادى. ولاردىڭ تولەم قابىلەتتىلىگى تەكسەرىلىپ, زاەم بەرىلەدى. بۇل قاراجاتقا العاشقى نەمەسە ەكىنشى نارىقتان باسپانا ساتىپ الۋعا بولادى.
«Qamqor» باعدارلاماسىنا قاتىسۋشىلارعا قويىلاتىن تالاپتار: بىرىنشىدەن, قاتىسۋشىنىڭ جاسى ءوتىنىش بەرگەن ءساتتى قوسا العاندا 63 جاستان اسپاۋى كەرەك. ەكىنشىدەن, ۇمىتكەردىڭ جانە ونىڭ وتباسى مۇشەلەرiنiڭ سوڭعى 5 جىلدا قازاقستان اۋماعىندا جەكە مەنشiك قۇقىعىنداعى تۇرعىنجايى بولماۋى قاجەت. ۇشىنشىدەن, سوڭعى 3 جىلدا شىمكەنت قالاسىندا تۇراقتى تىركەۋدە تۇرۋى تالاپ ەتىلەدى. تورتىنشىدەن, شىمكەنت قالاسىندا تاڭداعان سالاسى بويىنشا سوڭعى 12 ايدان كەم ەمەس جۇمىس ءوتىلى بولۋعا ءتيىس. جانە سوڭعىسى – باعدارلاماعا ەرلى-زايىپتىلاردىڭ بىرەۋى عانا قاتىسا الادى.
ەكىجاقتى كەلىسىمگە قول قويىلعاننان كەيىن شىمكەنت قالاسى اكىمىنىڭ ورىنباسارى نۇرسادىق ەرگەشبەك پەن «وتباسى بانك» اق باسقارما توراعاسى لياززات يبراگيموۆا مەگاپوليستىڭ اسار شاعىن اۋدانى, شىمسيتي مەكەنجايىندا ورنالاسقان «Asar House» تۇرعىن ءۇي كەشەنىن پايدالانۋعا بەرۋ راسىمىنە قاتىسىپ, 100-گە جۋىق قالا تۇرعىنىنا جاڭا پاتەرلەرىنىڭ كىلتىن تابىس ەتتى. ءىس-شاراعا «قازاقستاندىق تۇرعىن ءۇي كومپانياسى» اق باسقارما توراعاسى التاي كۇزدىباەۆ, «OKS Development» كومپانياسىنىڭ باسشىسى اسىلجان قۇرتاەۆ پەن «Asar House» تۇك ديرەكتورى بولات ماليموۆ قاتىستى.
– بۇگىن شىمكەنتتە قوس قۋانىشتى جاڭالىقتىڭ كۋاسى بولىپ وتىرمىز. ونىڭ ءبىرى – «Qamqor» باعدارلاماسى بويىنشا قالالىق اكىمدىكپەن ارنايى مەموراندۋم قابىلدادىق. بۇل – وتە تاماشا باستاما. سەبەبى ەندى الداعى ۋاقىتتا قاراپايىم ەڭبەككەرلەر باسپانالى بولا الادى. سوندىقتان وسى باستامانىڭ الەۋمەتتىك ماڭىزدىلىعى باسىم بولىپ تۇر. «Qamqor» باعدارلاماسى شىمكەنتتە جۇمىس ىستەيتىن بارلىق تۇرعىنعا قولجەتىمدى بولادى. زاەمنىڭ ەڭ جوعارى سوماسى 20 ملن تەڭگەگە تەڭ. نەسيە بويىنشا پايىزدىق مولشەرلەمە 5%, ودان ءارى ول 3,8%-عا دەيىن تومەندەيدى. يپوتەكا مولشەرلەمەسىن بىرتىندەپ تومەندەتۋ تۇرعىن ءۇي قۇرىلىس جيناق جۇيەسىنىڭ ارقاسىندا مۇمكىن بولىپ وتىر. العاشقى 8 جىلدا نەسيە بويىنشا اي سايىنعى تولەم مولشەرى 155 مىڭ تەڭگە بولسا, كەيىن ول 87 مىڭ تەڭگەگە دەيىن تۇسەدى. مۇنداي مۇمكىندىك نەسيە تولەمىن وتباسى ءۇشىن قولجەتىمدى ەتەدى. ەكىنشىدەن, «OKS Development» قۇرىلىس كومپانياسى «Asar House» تۇرعىن ءۇي كەشەنىن سالىپ, وتباسى بانك كليەنتتەرىنە جاڭا پاتەردىڭ كىلتتەرىن تاپسىرىپ جاتىر. كەلەشەكتە بۇل كەشەننىڭ جانىنان ەكىنشى تۇرعىن ءۇي كەشەنى بوي كوتەرەدى. سالىمشىلارىمىز بۇل پاتەرلەردى 70/30 باعدارلاماسى بويىنشا العان. بۇدان بولەك, ءبىرىنشى نارىقتان ءۇي الۋعا مۇمكىندىك بەرەتىن 50/50 باعدارلاماسى دا بار, – دەپ ءتۇسىندىردى «وتباسى بانك» اق باسقارما توراعاسى ءلاززات يبراگيموۆا.
«Asar House» تۇرعىن ءۇي كەشەنى – جەر ءۇستى پاركينگى مەن ىشكى اۋلاسى بار 5 قاباتتى كىرپىش ۇيلەر. تۇرعىن ءۇي كەشەنى «OKS Development» كومپانياسىنا تيەسىلى. ول نارىقتا 2001 جىلدان بەرى جۇمىس ىستەپ كەلەدى ءارى شىمكەنتتە 200 000 شارشى مەتردەن اسا تۇرعىن ءۇي مەن كوممەرتسيالىق عيماراتتار سالىپ ۇلگەردى.
قۇرىلىس كومپانياسى سالىپ جاتقان ۇيلەردىڭ ساپاسى مەن ۋاقىتىندا تاپسىرىلۋىنا باسا ءمان بەرەدى. ءدال قازىر «Shymkent City» جاڭا شاعىن اۋدانىندا «OKS Development» جەراستى پاركينگى, جاسىل جەلەككە ورانعان اۋلاسى جانە بالالار الاڭى بار ءتورت تۇرعىن ءۇي كەشەنىن سالىپ جاتىر («Asar House Plus», «Prime Park», «Modern City» جانە پرەستيج). سونداي-اق اتالعان كومپانيا «Seitzhan School» اتتى جاڭا جەكەمەنشىك مەكتەپ سالدى, ونىڭ اشىلۋى قىركۇيەك ايىنا جوسپارلانعان.
– وتباسى بانك پەن قازاقستاندىق تۇرعىن ءۇي كومپانياسىنىڭ قولداۋىمەن وسى ۇيلەردى سالىپ بىتىردىك. بىلتىر ءساۋىر ايىندا باستالعان قۇرىلىس جۇمىستارى بيىل قاسيەتتى ورازا ايت مەرەكەسىندە اياقتالىپ, پايدالانۋعا بەرىلىپ وتىر. نەگىزىنەن, وسى سياقتى تاعى 5 تۇرعىن ءۇي كەشەنىن تۇرعىزىپ جاتىرمىز. كوپشىلىگى شىمكەنتسيتي اۋماعىندا ورنالاسقان. ال «Asar House» تۇرعىن ءۇي كەشەنىنىڭ جالپى اۋدانى – 6 مىڭ شارشى مەتر. 100 پاتەردەن تۇرادى. «OKS Development» كومپانياسى تەك ۇزدىك ماتەريالداردى پايدالانادى جانە كليەنتتەردىڭ قولايلى ءومىر ءسۇرۋى ءۇشىن جايلى جاعداي جاسايدى. وسىلايشا, جوعارى ساپالى تۇرعىن ءۇي كەشەندەرىن سالادى. «Asar House» – شىمكەنت قالاسىندا جايلى باسپانادا تۇرىپ, تولىققاندى ءومىر ءسۇرۋ تۋرالى ارماندى شىندىققا اينالدىرعان كومپانيانىڭ جاڭا دا بىرەگەي جوباسى. بۇل تۇرعىن ءۇي كەشەنى ۇلەستىك قۇرىلىس تۋرالى زاڭناما شەڭبەرىندە سالىندى. ۇلەسكەرلەرگە ءۇي سالىنا باستاعان ساتتەن باستاپ, قۇرىلىس كومپانياسىمەن ەش كۇدىك-قورقىنىشسىز شارت جاساسۋعا بولادى. سونىمەن قاتار قوسىمشا كەپىلدىكسىز «وتباسى بانك» اق-دا يپوتەكا رەسىمدەۋگە مۇمكىندىك بار. ۇلەسكەرلىك قۇرىلىسقا كەپىلدىكتى «قازاقستاندىق تۇرعىن ءۇي كومپانياسى» اق بەرەدى, – دەدى «Asar House» تۇرعىن ءۇي كەشەنىنىڭ قۇرىلىسىن جۇرگىزگەن «OKS Development» كومپانياسىنىڭ باسشىسى اسىلجان قۇرتاەۆ.
سالتاناتتى ءىس-شارا بارىسىندا قوناقتارعا ويىن-ساۋىق باعدارلاماسى كورسەتىلدى. باعالى سىيلىقتار ۇتىسى ويناتىلىپ, ىستىق پالاۋ, باسقا دا ءدامدى تاماقتار ۇسىنىلدى. ال بۇلدىرشىندەردىڭ كوڭىلىن ەرتەگى كەيىپكەرلەرىنىڭ بەينەسىن سومداعان انيماتورلار كوتەردى.
ايگەرىم نۇرىمبەتوۆا – كوپبالالى انا. بۇگىندە بەس بالاسىن جالعىز ءوزى تاربيەلەپ وتىر. ۇلكەنى – ون ەكىدە, كەنجەسى – بەستە. بۇعان دەيىن قايناربۇلاق تۇرعىن الابىندا پاتەر جالداپ تۇرعان ەكەن. ەندى ول «Asar House» تۇرعىن ءۇي كەشەنىندەگى جاڭا پاتەر يەسى اتاندى. «باسپاناعا تاعدىردىڭ سىيىمەن قول جەتكىزدىم», دەيدى. بۇل جونىندەگى اڭگىمەسىن بىلايشا ءوربىتتى: «اۋرۋحانادا تازالىقشى بولىپ جۇمىس ىستەيمىن. ايلىق جالاقىم كوپ ەمەس. بىراق ءوزىمنىڭ جەكە باسپانام بولسا عوي دەپ ارماندايتىنمىن. جاعدايىم بولماعان سوڭ «ASAR-UME» قايىرىمدىلىق قورىنا ءوتىنىش جاسادىم. ءبىر كۇنى ۇيىمە قوردىڭ وكىلدەرى كەلدى. ونلاين پاتەر الۋ مۇمكىندىگىن سىناپ كوردى. تالاپتارىنان وتە المادىم. كوڭىل كۇيىم قاتتى ءتۇسىپ كەتتى. سويتسەم, بۇل ءازىل-قالجىڭ ەكەن. ارتىنشا, «OKS Development» كومپانياسىنان وكىلدەر كەلىپ, قولىما سەرتيفيكات تاپسىردى. قۋانىشتان جىلاپ جىبەردىم. تەگىن ءۇي الىپ تۇرمىن عوي. كومپانيا بۇكىل رەسىمدەۋ قۇجاتتارىن وزدەرى جاسادى. مەن تەك تولقۇجاتىمدى اپارىپ تاپسىردىم. قايىرىمدىلىق قورى جاڭا پاتەردى جاقسىلاپ ارلەپ, ءىشىن جيھازعا تولتىرىپ بەرۋگە ۋادە بەردى. كىرپىشتەن سالىنعان ادەمى ءۇيدىڭ ءبىرىنشى قاباتىنان 2 بولمەلى پاتەر بۇيىردى. اللاعا شۇكىر ءوز ءۇيىمنىڭ بولعانىنا. قۇرىلىس كومپانياسىنا راحمەت! ەلدىڭ الەۋمەتتىك جاعدايىن ويلاپ وتىرعان مەملەكەتىمىز امان بولسىن!», دەدى ايگەرىم نۇرىمبەتوۆا.
«بالامنان بەس نەمەرەم بار. بىراق ۇلىم ءوز ۇيىندە تۇرادى. بۇل تۇرعىن ءۇي كەشەنىنەن پاتەردى بولاشاق نەمەرەلەرىمە دەپ الىپ جاتىرمىن. ءوزىم – مەكتەپتە مۇعالىممىن. ءۇش-ءتورت جىلدان بەرى وتباسى بانكتىڭ سالىمشىسىمىن. ءۇيدىڭ باعاسى 26 ميلليون تەڭگەدەي بولدى. سونىڭ 30 پايىزدايىن, ياعني 8 ميلليون تەڭگەسىن دەپوزيتتە جينادىم. ەندى اي سايىن يپوتەكاسىن تولەپ تۇرامىن. كەلەشەكتە نەمەرەلەرىمنىڭ بىرەۋىنە قالدىرامىن. وسىلاي جاعداي مۇمكىندىك بەرىپ تۇرعاندا, ارتىق باسپانا الىپ قويعان جاقسى. بارىنەن بۇرىن وتباسى بانك قاراپايىم ادامدارعا اقشا جيناپ ءۇيلى بولۋعا كومەكتەسىپ جاتىر. بۇل – حالىققا وتە ۇلكەن جاردەم. ايتپەسە, ادامداردىڭ بىردەن اقشاعا ءۇي ساتىپ الۋعا جاعدايلارى جەتپەيدى. سوندىقتان ارزان باسپانامەن قامتيتىن وسى بانككە جۇگىنەدى. قارجى ۇيىمىنىڭ الداعى ىستەرى ءساتتى بولا بەرسىن!», دەدى جاڭا ءۇيدىڭ كىلتىن العان تۇرعىن ءۇي كەشەنىنىڭ كەلەشەك تۇرعىنى ءسابيت قۇرالوۆ.
«وتباسى بانك» اق-نىڭ شىمكەنت قالاسى بويىنشا فيليالىنىڭ ديرەكتورى داۋرەن ساۋداباەۆتىڭ ايتۋىنشا, «Asar House» تۇرعىن ءۇي كەشەنىندەگى پاتەرلەردىڭ 25 پايىزى بانك ارقىلى ساتىلعان. جالپى, وتباسى بانك – تۇرعىن ءۇيدىڭ قۇرىلىسى ەندى باستالىپ جاتقان كەزەڭنەن پاتەردى ساتىلىمعا قوياتىن بىردەن-ءبىر قارجى ۇيىمى سانالادى. ەڭ باستى شارتى – «قازاقستاندىق تۇرعىن ءۇي كومپانياسى» اق-نىڭ وعان رۇقساتى بولۋ كەرەك.
2023 جىلى مەملەكەتتىك بيۋدجەت ەسەبىنەن 12,9 ملرد تەڭگەگە 3342 پاتەرلى 72 كوپقاباتتى تۇرعىن ءۇيدىڭ (254,2 مىڭ شارشى مەتر) قۇرىلىسىن جۇرگىزۋ جوسپارلانعان. ونىڭ ىشىندە, جالگەرلىك 29 ءۇي (1364 پاتەر), كرەديتتىك 43 ءۇي (1978 پاتەر) سالىنادى. جىل قورىتىندىسى بويىنشا 3072 پاتەرلى 67 تۇرعىن ءۇيدى پايدالانۋعا بەرۋ قاراستىرىلعان.
ايتا كەتۋ كەرەك, «وتباسى بانك» تۇرعىن ءۇي قۇرىلىس جيناق بانكi» اق – ەلىمىزدەگى تۇرعىن ءۇي قۇرىلىس جيناق جۇيەسىن جۇزەگە اسىراتىن بىردەن-ءبىر بانك. ۇيىم ەۋروپالىق قۇرىلىس جيناق كاسسالارى فەدەراتسياسىنا (ەقجكف) جانە حالىقارالىق تۇرعىن ءۇيدى قارجىلاندىرۋ وداعىنا كىرەدى. بانكىنىڭ جالعىز اكتسيونەرى – «بايتەرەك» ۇلتتىق باسقارۋشى حولدينگى» اق.
شىمكەنت
