وقۋ-اعارتۋ مينيسترلىگىنىڭ حابارلاۋىنشا, الماتىلىق 6 جاستان 10 جاسقا دەيىنگى ەڭ جاس ساناتتاعى Adeptus Mechanicus كومانداسى جوعارى ىنتا-جىگەرى, ىنتىماقتاستىق رۋحى جانە ءوزارا سىيلاستىعى ءۇشىن Core Values Award ەرەكشە ماراپاتىن يەلەندى. باستاۋىش سىنىپ وقۋشىلارىنىڭ يننوۆاتسيالىق جوباسى مەن تەحنيكالىق ازىرلەمەلەرى قاتىسۋشىلار اراسىندا ەڭ ۇزدىكتەرىنىڭ ءبىرى بولدى.
Play 4 Energy كومانداسى LEAS مەكتەبىنىڭ وقۋشىلارى 10-16 جاس ارالىعىنداعى ورتا ساناتتاعى Robot Design Award جوعارى تەحنيكالىق سىيلىعىن قانجىعاسىنا بايلادى. ولار كۇردەلى تاپسىرمالاردى ورىنداي الاتىن بەرىك جانە ءتيىمدى روبوت جاساۋ ارقىلى تاماشا باعدارلامالاۋ جانە ينجەنەرلىك داعدىلاردى كورسەتتى.
12 جاستان 18 جاسقا دەيىنگى جوعارى ساناتتاعى Motivate Award Finalist تورەشىلەردىڭ ەرەكشە ماراپاتىنا الماتىنىڭ رەسپۋبليكالىق فيزيكا-ماتەماتيكا مەكتەبىنىڭ AENTA كومانداسى يەلەندى. ايتا كەتەيىك, بۇعان دەيىن وقۋشىلار تەگىن فەستيۆالدار مەن ترەنينگتەر وتكىزىپ, ءوز قۇرداستارىنا روبوتوتەحنيكا مەن باعدارلامالاۋ نەگىزدەرىن تانىستىرعان بولاتىن.
«وقۋشىلار تاماشا ناتيجەلەر كورسەتىپ, ەلىمىزدى ابىرويمەن تانىستىردى. شاكىرتتەرىمىزدىڭ جەڭىسىنە قاتىسى بار بارلىق جانعا العىس بىلدىرەمىز! بۇل قازاقستانداعى STEM دامۋىنداعى جەمىستى جولدىڭ باسى عانا», دەدى USTEM Robotics قوعامدىق قورىنىڭ نەگىزىن قالاۋشى نۇرداۋلەت دوسماعامبەت.
ايتا كەتەيىك, روبوتوتەحنيكا بويىنشا بۇكىلالەمدىك چەمپيوناتقا بارلىعى 36 مىڭ بالا قاتىستى. ەل نامىسىن 50-گە جۋىق قازاقستاندىق وقۋشى قورعادى.
