شىعىس قازاقستان وبلىسى ۇلان اۋدانىنا جاڭا اكىم تاعايىندالدى

استانا. 9 شىلدە. پرەزيدەنت اكىمشىلىگىنىڭ كەلىسىمىمەن جانە شىعىس قازاقستان ءوڭىرىنىڭ باسشىسى بەردىبەك ساپارباەۆتىڭ وكىمىمەن باقىتجان باياحمەتوۆ ۇلان اۋدانىنىڭ اكىمى بولىپ تاعايىندالدى. بۇل تۋرالى «قازاقپارات» حابارلادى. باقىتجان باياحمەتوۆ 1970 جىلدىڭ 29 تامىزىندا اياگوز قالاسىندا تۋعان. 1992 جىلى قازاق اۋىل شارۋاشىلىعى ينستيتۋتىن ينجەنەر-ەلەكتريك, 2008 جىلى الماتىداعى ورتالىق ازيا ۋنيۆەرسيتەتىن ەكونوميست ماماندىقتارى بويىنشا بىتىرگەن. ەڭبەك جولىن 1992 جىلى «التايەنەرگو» مەكەمەسى اياگوز ەلەكتر تورابىنىڭ ينجەنەرى بولىپ باستاعان. 2002 جىلى «ۆك رەك» جابىق اكتسيونەرلىك قوعامىنىڭ اياگوز ايماقتىق ديرەكتورى, 2004 جىلدىڭ مامىرىنان اياگوز اۋداندىق ەلەكتر جەلىسىنىڭ باسشىسى بولدى.  2004 جىلدىڭ جەلتوقسانىنان بورودۋليحا اۋدانى ەلەكتر تورابىنىڭ باستىعى, اياگوز اۋدانى اكىمىنىڭ ورىنباسارى بولدى. 2008-2009 جىلدارى «دانا-اياگوز» جاۋاپكەرشىلىگى شەكتەۋلى سەرىكتەستىگىنىڭ اتقارۋشى ديرەكتورى, 2009 جىلعى اقپان ايىنان باستاپ مادەنيەت جانە اقپارات مينيسترلىگى مەملەكەتتىك ساتىپ الۋ جانە قۇقىقتىق جۇمىستى ۇيىمداستىرۋ باسقارماسىنىڭ باستىعى, 2009 جىلعى ساۋىردەن مادەنيەت جانە اقپارات مينيسترلىگى اقپارات جانە مۇراعات كوميتەتىنىڭ ەسەپ باسقارماسى باس ساراپشىسى, 2009 جىلعى ماۋسىمنان قورشاعان ورتانى قورعاۋ مينيسترلىگى بيۋدجەتتىك جوسپارلاۋ جانە مەملەكەتتىك ساتىپ الۋ باسقارماسىنىڭ باس ساراپشىسى, 2009 جىلعى قازاننان باستاپ وسكەمەن قالاسىنىڭ قۇرىلىس ءبولىمىنىڭ باستىعى قىزمەتتەرىن اتقارعان. ال 2010 جىلدىڭ قاراشاسىنان باستاپ وسى تاعايىنداۋعا دەيىن اياگوز قالاسىنىڭ اكىمى بولىپ قىزمەت ەتىپ كەلدى. جولدىباي بازار. دەرەككوز: «قازاقپارات». فوتو: «قازاقپارات».