بيزنەستىڭ ەۋرازيالىق ەكونوميكالىق وداق اياسىندا دامۋى تالقىلاندى

استانا. 9 شىلدە. پەتروپاۆل قالاسىندا ەۋرازيالىق ەكونوميكالىق وداق كولەمىندە شاعىن جانە ورتا بيزنەستىڭ باسەكەگە قابىلەتتىلىگىن ارتتىرۋ جونىندە وڭىرارالىق بيزنەس-فورۋم ءوتتى. بۇل تۋرالى Strategy2050.kz حابارلادى. اتالعان جيىنعا سولتۇستىك قازاقستان, قوستاناي, پاۆلودار جانە اقمولا وبلىسىنىڭ كاسىپكەرلەرى قاتىستى. وڭىرلىك بيزنەس-فورۋمى بارىسىندا وڭىرلىك دامۋ مينيسترلىگى كاسىپكەرلىكتى دامىتۋ كوميتەتىنىڭ ءتورايىمى عاليا جولدىباەۆا «بيزنەستىڭ جول كارتاسى-2020» باعدارلاماسى وزگەرىسكە ۇشىرامايتىنىن, سونىمەن قاتار ۇدەمەلى يندۋستريالدى-يننوۆاتسيالىق دامۋ باعدارلاماسى بويىنشا سۋبسيديالاۋ مەملەكەت تاراپىنان 10 پايىز دەڭگەيىندە ۇسىنىلاتىنىن جەتكىزدى. جيىندا ءوز پىكىرىن بىلدىرگەن پاۆلودارلىق Format Mach Company جاۋاپكەرشىلىگى شەكتەۋلى سەرىكتەستىگىنىڭ ديرەكتورى الەكساندر يانبۋلاتوۆ: «شارا دەر كەزىندە ۇيىمداستىرىلىپ وتىر. بىزگە قوسىمشا نارىقتاردىڭ باسىم باعىتتارى قىزىعۋشىلىق تۋدىرادى. مىسالعا ءبىزدىڭ كاسىپكەرلىك بۇرىندارى تەمىر جول قۇرىلعىلارىن شىعارۋمەن اينالىستى. بۇل ستراتەگيالىق سالا. ءبىزدىڭ ويىمىزشا, مەملەكەتتىڭ قاتىسۋىنا كەمىندە 5-7 جىل قاجەت. وسىدان كەيىن عانا ەركىن نارىق تۋرالى ءسوز قوزعاۋعا بولادى. سودان كەيىن عانا ناقتى ارتىقشىلىقتار مەن پايدا كورىنە باستايدى. جانە دە وسى ورايدا رەسەي مەن بەلارۋس كاسىپكەرلەرىمەن تىكەلەي باسەكەلەس ەكەنىمىزدى ءبىر ساتكە دە ەستەن شىعارماۋىمىز قاجەت», – دەدى. ال جيىنعا قاتىسقان سولتۇستىك قازاقستان وبلىسى اكىمىنىڭ ورىنباسارى ەرلان اۋكەنوۆ: «بۇگىنگە دەيىن 105-تەي جوبانى قولعا الدىق. ەگەر 5 جىل ىشىندە يندۋستريالاندىرۋ كارتاسىنا 37 ملرد تەڭگەلىك 31 جوبا ەنگىزىلسە, قازىرگى تاڭدا بۇل كورسەتكىش 105-كە جەتىپ, سونىڭ 15-ءى ماقۇلدانىپ, ناقتى ىسكە كىرىستى. ولاردىڭ قۇنى جالپى ەسەپپەن 200 ملرد. تەڭگە شاماسىندا. ءبىز سان جاعىنان ءبىرىنشى بەسجىلدىققا قاراعاندا 3 ەسەگە كوبەيتتىك. ال ساپا جاعىنان ءتىپتى 6-7 ەسەلىك ءوسىم بار», – دەدى. جولدىباي بازار. دەرەككوز: Strategy2050.kz. فوتو: «قازاقپارات».