شىعىس قازاقستان مەن رەسەيدىڭ التاي ولكەسى بىرلەسە جۇمىس ىستەۋگە مۇددەلى

استانا. 9 شىلدە. شىعىس قازاقستان وبلىسى مەن رەسەيدىڭ التاي ولكەسى شەكارالاس كەڭىستىكتىڭ ەرەكشەلىكتەرىن پايدالانا وتىرىپ, بىرنەشە بىرلەسكەن جوبالاردى قولعا الۋدى جوسپارلاۋدا. بۇل تۋرالى «قازاقپارات» حابارلادى. تاراپتار بىرلەسە جۇمىس ىستەۋ ءۇشىن الدىمەن بىرقاتار ماسەلەلەر بويىنشا زەرتتەۋ جۇرگىزۋدى قاجەت دەپ ەسەپتەيدى. سول ءۇشىن شەكارالاس اۋداندارداعى جاعدايدىڭ دامۋ سەرپىنىن كورۋگە مۇمكىندىك بەرەتىن بۇقارالىق اقپارات قۇرالدارىنىڭ مونيتورينگىن قۇرۋ جانە وڭىرلىك جانە وڭىرارالىق وتكىر پروبلەمالاردى انىقتايتىن قۇرىلىمدىق-فۋنكتسيونالدىق تالداۋ جۇرگىزۋ ىستەرى شەشىمىن تابۋى ءتيىس. وسى ايتىلعان جاعداياتتاردى باسشىلىققا الا وتىرىپ شىعىس قازاقستان وبلىسى ىشكى ساياسات باسقارماسى مەن التاي ولكەسىنىڭ باسپا جانە اقپارات باسقارماسى اراسىندا, سونداي-اق, «شىعىس قازاقستان وبلىسى تالداۋ جانە بولجاۋ ينستيتۋتى» جاۋاپكەرشىلىگى شەكتەۋلى سەرىكتەستىگى مەن التاي مەملەكەتتىك ۋنيۆەرسيتەتى اراسىندا ىنتىماقتاستىق پەن بىرلەسكەن جۇمىس تۋرالى مەموراندۋمعا قول قويىلدى. شىعىس قازاقستان وبلىسى تالداۋ جانە بولجاۋ ينستيتۋتىنىڭ ديرەكتورى ولەگ چەرنىشەۆ: «ءتۇرلى سالالار, ءتۇرلى مادەنيەتتەر, ەتنيكالىق, ءدىني توپتار وكىلدەرى مەن ازاماتتىق قوعام جانە مەملەكەتتىك قۇرىلىمدار اراسىنداعى ماسەلەلەر وزەكتى كۇيىندە قالىپ وتىر. تۇراقتى قوعامدىق-ساياسي جاعدايدى قالىپتاستىرۋ جانە قولداۋ ءۇشىن سالانى زەرتتەۋ جانە ونى ۋاقتىلى تالداۋ  اسا ماڭىزدى», – دەدى. جولدىباي بازار. دەرەككوز: «قازاقپارات». فوتو: aikyn.kz.