ءا.نۇرشايىقوۆ ول تۋرالى ءوزىنىڭ م.يمانجانوۆقا ارناپ جازعان ەستەلىك كىتابىندا ايتادى. كىتاپتا ەكەۋارا الماسقان حاتتىڭ سوڭىنداعى تۇسىنىكتەمەدە: «م.يمانجانوۆ ءوزىنىڭ «ەسەنوۆتىڭ تاعدىرى» دەگەن اڭگىمەسىن ءا.نۇرشايىقوۆ بەرگەن سيۋجەتكە نەگىزدەپ جازعان», دەيدى. م.يمانجانوۆتىڭ ەربولى – ەسەنوۆ عاشىعىن ۇمىتۋ ءۇشىن فيلولوگيادان مەديتسينالىق ينستيتۋتقا اۋىسقان حيرۋرگ وبرازىندا بەرىلەدى. مەڭتايى – بيعايشا. ەكەۋىنىڭ قوسىلۋىنا كەدەرگى بولعان وقيعالار اسەرلى, قىسقا باياندالادى.
بىراق بۇل اڭگىمە اۆتوردىڭ كوڭىلىنەن شىقپاعان. ءوزىنىڭ ءازىلحان نۇرشايىقوۆقا جازعان حاتىندا بىلاي دەيدى: «ايتپاقشى, اڭگىمەگە بەرگەن كەڭەسىڭە كوپ راحمەت. قازىر جيناق دايىنداپ جاتىرمىن. پىكىرىڭدى سوندا مىقتاپ ەسەپكە الامىن. ادام العاشىندا ونشا اڭعارا بەرمەيدى عوي, ءوزى (سول اڭگىمەنى ايتامىن) ءتىپتى ناشار جازىلىپتى. ەندى وقىپ, ءوزىم قاباق شىتىپ وتىرمىن. بىراق قازىر كەش. ءبىر ءتۇرتىپ قالعان سوڭ, ونى-مۇنى جاساعانىڭمەن, ءبارىبىر مىقتى دۇنيە بولمايدى. باسىندا ءىزى مىقتاپ سالىنباعان سوڭ, قاراقشىدان ۇزاپ كەتە المايسىڭ. تۇگەلدەي قايتا جازۋعا كوڭىل سوقپايدى».
ال ءازىلحان نۇرشايىقوۆ اڭگىمە جاريالانعاننان كەيىن مۇقان يمانجانوۆقا جازعان حاتىندا: «ەكىنشى قۋانتقان ءسىزدىڭ اڭگىمەڭىز بولدى. قىزىعا, سۇيسىنە وقىدىم. باس العام جوق. ورتا تۇسىنا كەلگەندە انەۋكۇنگى مەن ايتقان عاشىقتىق نەگىزىنە بۇرىلعان با دەپ ويلاپ قالىپ ەدىم. ويتكەنى سۋرەتتەۋ باسىندا مەن ايتقانداي ەلەمەنتتەر بار ەكەن. بىراق مەن قىزدىڭ جاقسى ەكەنىن باسىندا ايتىپ ەدىم. مۇندا قىز جامان ەمەس, دەگەنمەن بۇل باسقا پلانداعى قىز», دەپ جازادى.
م.يمانجانوۆتىڭ «ەسەنوۆتىڭ تاعدىرى» اڭگىمەسى وتە قىسقا جازىلعاندىقتان, ءا.نۇرشايىقوۆ ول سيۋجەتتى كەڭەيتىپ, ارتىنان بەلگىلى «ماحاببات, قىزىق مول جىلدار» رومانىن جازعان.
