«قازمۇنايگاز» تاراتقان مالىمەتكە سايكەس, بۇگىنگە دەيىن جۇمىس كوميسسياسى 3 وتىرىس وتكىزگەن.
− «بەرالى» كومپانياسىنىڭ بۇرىنعى قىزمەتكەرلەرىنىڭ باستى تالابى – «وزەنمۇنايگاز» اق شتاتىنا جۇمىسقا ورنالاسۋ. باستاماشىل توپقا بۇل شارتتىڭ مۇمكىن ەمەستىگى ايتىلدى. ۇيىمعا جۇمىسقا كەزەكتە 9 مىڭ ادام تۇرعانى اتاپ ءوتىلدى. ولار قابىلدانعان الگوريتمدەرگە سايكەس باستاپقىدا كوممۋنالدى كومپانيالاردا جۇمىس ىستەيدى, ءارى قاراي بوس جۇمىس ورنى پايدا بولعاندا كەزەك بويىنشا «وزەنمۇنايگازعا» جۇمىسقا تۇرادى. كەلىسسوز جۇرگىزۋشىلەردىڭ بۇل تالابى قالا تۇرعىندارىنىڭ مۇددەلەرى مەن قۇقىقتارىنا قايشى كەلەدى, − دەلىنگەن حابارلامادا.
ساتىپ الۋ قىزمەتىن ۇزاق مەرزىمگە بەلگىلەۋ ماسەلەسى بويىنشا قمگ وكىلدەرى «3+2» سحەماسى بويىنشا كەلىسىمشارت جاساسۋعا دايىن ەكەنىن ءبىلدىردى. ول بويىنشا كەلىسىمشارتتار قوسىمشا 2 جىلعا ۇزارتۋ قۇقىعىمەن 3 جىلعا جاسالادى.
جەكەلەگەن ماسەلەلەر بويىنشا «بەرالىنىڭ» بۇرىنعى قىزمەتكەرلەرىنىڭ تالاپتارى وزگەردى: اتاپ ايتقاندا, جەراستى جوندەۋ جۇمىستارىنىڭ قوسىمشا كولەمىن «بۇرعىلاۋ» جانە «مۇنايفيلدسەرۆيس» جەكە كومپانيالارىنا بەرىپ, «بەرالىنىڭ» بۇرىنعى قىزمەتكەرلەرىن وسى كومپانيالارعا جۇمىسقا ورنالاستىرۋ مۇمكىندىگى ايتىلدى. الايدا الدىن الا كەلىسسوزدەردەن كەيىن اتالعان كومپانيالاردىڭ باسشىلىعى ءوز بريگادالارىنىڭ تولىق جۇكتەلمەۋىنە بايلانىستى مۇنداي قىزمەت ءتۇرىن كورسەتۋگە قىزىعۋشىلىعى جوقتىعىن مالىمدەدى.
«ەڭبەكتى قورعاۋ جانە ۇيىمداستىرۋ جاعدايلارى, بىرىڭعاي تاريفتىك-بىلىكتىلىك انىقتاماسىن (بتبا) قولدانۋ جانە تەندەر راسىمدەرىنە قاتىستى ماسەلەلەر بويىنشا تاۋەلسىز كوميسسيا قۇرۋدى مەملەكەتتىك ورگان وكىلدەرى قاراستىرۋعا جانە كوميسسيانىڭ كۇن ءتارتىبى مەن قۇرامىن مۇددەلى ورگاندارمەن كەلىسكەننەن كەيىن جاۋابىن بەرۋگە دايىن ەكەندىكتەرىن مالىمدەدى.
بۇدان بولەك, قمگ وكىلدەرى «بەرالى» كومپانياسىنىڭ بۇرىنعى قىزمەتكەرلەرىنىڭ بارلىعىن وسىعان دەيىنگى جالاقىسى مەن الەۋمەتتىك پاكەتىن ساقتاي وتىرىپ, كونكۋرس ناتيجەسىندە جەڭىمپاز بولعان كومپانياعا جۇمىسقا ورنالاستىرۋعا دايىن ەكەندىگىن راستادى», دەلىنگەن قمگ حابارلاماسىندا.
قازىر جوعارىدا اتالعان ماسەلەلەردى تالقىلاۋ جالعاسىپ جاتىر جانە تاراپتار قولدانىستاعى زاڭناماعا ساي كەلىسىمگە قول جەتكىزۋگە مۇددەلى.
ەسكە سالا كەتەيىك, 10 ساۋىردە 60-70 مۇنايشى ەنەرگەتيكا مينيسترلىگى عيماراتىنىڭ ماڭىندا نارازىلىققا شىققان بولاتىن. الايدا جۇمىسشىلار بەيبىت جيىن تالاپتارىن بۇزعانى ءۇشىن ۇستالعان ەدى. وسىدان كەيىن جۇمىسشىلاردىڭ تالابى تەندەر تالابىمەن ساي كەلمەيتىنى تۋرالى پرەمەر-ءمينيستردىڭ ورىنباسارى التاي كولگىنوۆ پىكىر ءبىلدىردى. جاڭاوزەن قالاسىنىڭ اكىمى ايبەك قوسۋاقوۆ تۇرعىندارعا ۇندەۋ جاسادى.
ال مۇنايشىلاردىڭ تالاپتارىنا قاتىستى ەنەرگەتيكا مينيسترلىگى تۇسىنىكتەمە بەرگەن. ۆەدومستۆو بۇل ماسەلە ەڭبەك زاڭناماسى مەن «سامۇرىق-قازىنا» ۇاق» اق ساتىپ الۋ قاعيدالارىن ەسكەرە وتىرىپ, زاڭنامالىق نەگىزدە شەشىلۋى ءتيىس دەپ سانايتىنىن ايتقان.
