ەلدى مەكەننىڭ قاق ورتاسىندا جۇزدەگەن شوشقا باعىپ وتىرعان كاسىپكەرگە تۇرعىندار باياعىدان قارسىلىق ءبىلدىرىپ كەلە جاتىر. ايتۋلارىنا قاراساق, دوڭىزدىڭ ءناجىسى توپىراققا ءسىڭىپ قالعانى سونشالىق, سول ماڭايداعى قۇدىقتاردان سۋ ءىشۋ مۇمكىن بولماي قالعان. ال توڭىرەكتەگى ءيىس جىل ون ەكى اي قولقانى قابادى. قار ەرىپ, كوكتەم شىققان ۋاقىتتا كۇلىمسى ءيىس كيىمگە دەيىن ءسىڭىپ قالادى ەكەن. اينالىپ كەلگەندە, شوشقا فەرماسى قورشاعان ورتاعا ەداۋىر زيان شەكتىرىپ وتىر.
جۋىقتا وسكەمەن قالالىق اكىمدىگىنىڭ وكىلدەرى, قۇقىق قورعاۋ, شقو بويىنشا ەكولوگيا دەپارتامەنتىنىڭ قىزمەتكەرلەرى جانە باق وكىلدەرى وسكەمەن قالاسىنىڭ ىرگەسىندەگى لەسحوز اۋىلىنا بارىپ, شوشقالاردى زاڭسىز ءوسىرۋ جانە سويۋ فاكتىسى بويىنشا جەرگىلىكتى تۇرعىندارمەن كەزدەسۋ وتكىزدى.
ەستەرىڭىزگە سالا كەتەيىك, شىعىس قازاقستان وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ 2022 جىلعى 21 قاراشاداعى №6309-22-00-2/3005 شەشىمىمەن شقو بويىنشا ەكولوگيا دەپارتامەنتىنىڭ «ميتين ا.ب.» جك-نە تالاپ-ارىزى نەگىزىندە وسكەمەن قالاسىنىڭ شمەلوۆ لوگ اۋدانىنداعى شوشقا فەرماسىنىڭ جانە لەسحوز كەنتىندەگى سويۋ تسەحىنىڭ قىزمەتى توقتاتىلعان ەدى. الايدا لەسحوز تۇرعىندارى باق وكىلدەرىنە سوت شەشىمىنىڭ ورىندالماعانى تۋرالى ايتىپ, وبلىستىق ەكولوگيا دەپارتامەنتىنە سويۋ تسەحىنا قاتىستى شارالار قابىلداۋدى سۇراپ تاعى دا حابارلاسقان. كەزدەسۋدە بۇل ماسەلە تاعى وتكىر كوتەرىلدى.
– سويۋ تسەحىنا ىرگەلەس اۋماقتى تەكسەرۋ بارىسىندا تۇرعىنداردىڭ دالەلدەرى راستالعانى انىقتالدى. «ميتين ا.ب.» جك ءالى كۇنگە دەيىن شوشقا اسىراپ وتىر. ونىڭ ۋچاسكەسىنەن شوشقا ناجىسىمەن لاستانعان ەرىگەن قار سۋى كوشەگە اعىپ جاتىر. اتموسفەرالىق اۋادا شوشقا فەرماسىنان شىعاتىن ادام توزگىسىز ءيىس جانە بار. ونىڭ قۇرامىنداعى زاتتار ادام دەنساۋلىعىنا زيان. وسىعان بايلانىستى جەرگىلىكتى تۇرعىندارمەن كەزدەسۋ ناتيجەلەرى بويىنشا جانە ۇسىنىلعان ماتەريالدار نەگىزىندە ەكولوگيا دەپارتامەنتى ادىلەت دەپارتامەنتىنە وسكەمەن قالاسىنىڭ شمەلوۆ لوگ اۋدانىنداعى شوشقا فەرماسىنىڭ جانە لەسحوز كەنتىندەگى سويۋ تسەحىنىڭ قىزمەتىن توقتاتۋ تۋرالى اتقارۋشىلىق ءىس قوزعاۋعا قايتا باستاماشىلىق جاسايدى, – دەدى شقو ەكولوگيا دەپارتامەنتىنىڭ مەملەكەتتىك باس مامانى اقنۇر قۇنافينا.
ال وبلىستىق ادىلەت دەپارتامەنتىندەگىلەر تەكسەرۋ كەزىندە فەرمادا تالپاق تاناۋلاردىڭ بولماعانىن ايتادى.
– وسىدان كەيىن وسكەمەن قالاسى بويىنشا سوت اكتىلەرىن ورىنداۋ ءبولىمىنىڭ مەملەكەتتىك سوت ورىنداۋشىسى ە.قۋانىشباەۆ سوت شەشىمىنىڭ ورىندالۋىنا بايلانىستى 2023 جىلدىڭ 4 ساۋىرىندە ءوز قاۋلىسىمەن اتقارۋشىلىق ءىس جۇرگىزۋدى توقتاتتى. وعان ستەپنوە جانە لەسحوز كەنتتەرىندەگى شوشقا فەرماسىنا بارۋى قاجەت بولعان. فوتوماتەريالدارعا سايكەس شوشقا فەرماسىندا جانۋارلار شىن مانىندە جوق بولدى. تەكسەرۋ كەتكەن سوڭ جۇمىسىن قايتا باستاۋى دا مۇمكىن. قازىر سول سوت ورىنداۋشى ەڭبەك دەمالىسىندا. ال ءبىز تۇرعىندار جانە ەكولوگتار شاعىمىنا وراي تەكسەرۋدى قايتا باستايمىز, – دەدى ادىلەت دەپارتامەنتى اتقارۋشىلىق ءوندىرىستى قامتاماسىز ەتۋ ءبولىمىنىڭ باسشىسى نۇرجان قۇرمانعاليەۆ.
اۋانى دا, جەردى دە, سۋدى دا لاستاپ وتىرعان كاسىپكەردىڭ ءوزى توبە كورسەتپەك تۇگىلى بايلانىسقا دا شىقپادى. تۇرعىنداردىڭ ايتۋىنشا, «مەنىڭ فەرمام جۇمىسىن توقتاتپايدى» دەپ مىسقىلدايتىن دا كورىنەدى. بۇل ماسەلە جاۋاپتى قۇزىرلى مەكەمەلەر تاراپىنان ەرەكشە باقىلاۋعا الىندى. ال نۇكتەسى قاشان قويىلارى ءالى بەلگىسىز. سوت شەشىمى نەگە پارمەنسىز, ول جاعى تاعى تۇسىنىكسىز.
وسكەمەن
