وسىدان ءبىر جىل بۇرىن 2022 جىلدىڭ كوكتەمگى ايلارىندا اسكەر قاتارىنا ەلىمىزدىڭ ءار وڭىرىنەن شاقىرىلعان ساربازدار, ەندى مىنە, وتان الدىنداعى بورىشىن ابىرويمەن اتقارىپ شىقتى.
ولار ءبىر جىل بويى اسكەري ماماندىقتى مەڭگەرىپ, جاۋىنگەرلىك دايارلىقتا ەلەۋلى ناتيجەلەرگە قول جەتكىزدى, سونداي-اق مىنەزدەرىن شىڭداپ, اسكەري ءتارتىپتى ۇيرەنىپ, كوماندادا جۇمىس ىستەۋدى ىسكە اسىردى.
زاپاسقا شىعارىلعان ساربازدارعا قۇرمەت كورسەتۋ شاراسى اسكەري ءبولىمنىڭ ساپتىق الاڭىندا ۇيىمداستىرىلىپ, وعان بريگادانىڭ اسكەري قىزمەتشىلەرى مەن قارۋلى كۇشتەردىڭ ارداگەرلەرى قاتىستى.
سالتاناتتى جيىندا بريگادا كومانديرى پودپولكوۆنيك داۋلەت سەكەنوۆ جەكە قۇرامدى ماڭىزدى ءىس-شارامەن قۇتتىقتاپ, ءسوز سويلەدى. ونىڭ ايتۋىنشا, زاپاسقا شىعارىلعان ساربازدار ءبىر جىل ىشىندە ەگەمەندى مەملەكەتىمىزدىڭ تىنىشتىعى مەن قورعانىسىن قامتاماسىز ەتىپ, تۇتاستىعىن ساقتاۋعا ءوز ۇلەستەرىن قوسقانىنا العىسىن ءبىلدىردى.
سونىمەن قاتار, جاۋىنگەرلىك دايارلىعىنداعى جوعارى كورسەتكىشتەرى ءۇشىن ەڭ ۇزدىك ساربازدار گراموتالارمەن جانە العىس حاتتارمەن ماراپاتتالدى. سونداي-اق ءبولىم كومانديرىنىڭ اتىنان زاپاسقا شىعارىلعان بىرقاتار اسكەري قىزمەتشىلەردىڭ اتا-انالارىنا العىس حاتتار جىبەرىلدى.
ودان كەيىن ساربازدار ساپتىق ادىممەن ورتاعا شىعارىلىپ, ءبولىمنىڭ جاۋىنگەرلىك تۋىمەن قوشتاستى. ولارعا ءبىر جىلدىڭ كولەمىندەگى اسكەري ءىس-شارالار مەن وقۋ-جاتتىعۋلارىنان ەستەلىك رەتىندە فوتوالبومدار تاراتىلدى. بىرقاتار ۇزدىك ساربازدارعا ارنايى دايىندالعان تۋ استىنداعى فوتوسۋرەتتەر سالتاناتتى تۇردە تابىس ەتىلدى.
«مىنە بۇگىن ءبىزدىڭ ءبىر جىلدىق اسكەري قىزمەتىمىزدە اياقتالدى. ءبىز وتان الدىنداعى بورىشىمىزدى ابىرويمەن اتقاردىق دەپ ويلايمىن. ءبىزدى جوعارى جاۋىنگەرلىك دايارلىق پەن اسكەري تارتىپكە ۇيرەتىپ, ارقاشان قولداۋ كورسەتكەن وفيتسەرلەر مەن سەرجانتتارعا ايتار العىسىم مول. بولاشاق جاستارعا ايتارىم وتان الدىنداعى مىندەتتەرىن وتەپ, ايبىندى اسكەرىمىزدە قىزمەت ەتۋگە شاقىرامىن», دەدى اسكەري بورىشىن اياقتاعان سارباز ەفرەيتور جاندوس الماسوۆ.
سالتاناتتى قوشتاسۋ ءراسىمى ءبولىمنىڭ جەكە قۇرامىنىڭ سالتاناتتى شەرۋىمەن اياقتالدى.
