جىل سايىن ەلىمىزدە بەس مىڭنان اسا ليفت يمپورتتالسا, قولدانىستاعى وتاندىق وندىرىسكە دەگەن تۇتىنۋشىلىق سۇرانىس تەك جيىرما پايىزىن عانا قۇرايدى ەكەن. بۇل ورايدا 2016 جىلى «قازاقستاننىڭ ۇلتتىق ليفتتەر قاۋىمداستىعى» زاڭدى تۇلعالار بىرلەستىگى ءوزىن-ءوزى رەتتەيتىن ۇيىم رەتىندە قۇرىلىپ, ءبىر جىلدان كەيىن «اتامەكەن» ۇلتتىق كاسىپكەرلەر پالاتاسى اككرەديتتەۋدەن وتكەندىگى تۋرالى كۋالىك بەرگەن. قاۋىمداستىق سول كەزدەرى ينۆەستيتسيالار جانە دامۋ مينيسترلىگى يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ تىزىلىمىندە تىركەلىپ, ەلىمىزدىڭ ەلەۆاتور سالاسىنداعى العاشقى ءوزىن-ءوزى رەتتەيتىن ۇيىم بولىپ قالىپتاسقان. ول سونىمەن قاتار «قازاقستان ماشينا جاساۋ وداعى» زاڭدى تۇلعالار بىرلەستىگىنىڭ تولىققاندى مۇشەسى.
«نەگىزگى قىزمەتىمىز ەلىمىزدەگى ليفت سالاسىن دامىتۋعا, جەتىلدىرۋگە جانە بىرىزدەندىرۋگە ءتيىستى جۇمىستاردى جۇرگىزىپ, قاۋىمداستىققا مۇشەلىك ەتەتىن وتاندىق تابىستى ليفت شىعاراتىن زاۋىتتار, مونتاجداۋ جانە قىزمەت كورسەتۋ كومپانيالارىنداعى تەحنيكالىق مامانداردىڭ كاسىبي الەۋەتىن ارتتىرۋدا ولاردىڭ ىستەرى جۇيەلى جۇرۋىنە جان-جاقتى قولداۋ كورسەتەمىز. ساپالى قىزمەت كورسەتۋدە قاۋىمداستىق مۇشەلەرى ءۇشىن ساپانى باقىلاۋ جۇيەسى ازىرلەندى. ءار توقسان سايىن ليفتىلەردىڭ قاۋىپسىزدىگى جونىندە مونيتورينگتىك باقىلاۋ جۇزەگە اسىرىلادى. ليفت سالاسىنا باسەكەلەستىكتى ارتتىرۋدا وڭتۇستىك كورەيانىڭ LGS Elevator Korea Co., Ltd ليفت كومپانياسىمەن ەلىمىزدىڭ ليفت سالاسىن دامىتۋداعى ىنتىماقتاستىق اياسىندا مەموراندۋمعا قول قويىلعان. ماماندار اتالعان مەملەكەتپەن تاجىريبە الماسىپ تۇرادى. بۇدان بولەك, KazNIS-پەن ەكىجاقتى كەلىسىم بويىنشا ماماندارىمىز جوبالىق-سمەتالىق باعدارلامالارعا ليفتىلەر مەن ەسكالاتورلاردى ەنگىزۋگە, ونىڭ ىشىندە يمپورتتىق جابدىقتىڭ باعاسىن يندەكستەۋ ماسەلەسى جونىندە تاۋەلسىز كەڭەسشى رەتىندە قاتىسادى. «قازاقستاننىڭ ەنەرگەتيكالىق اۋديتورلار قاۋىمداستىعى» زاڭدى تۇلعالار بىرلەستىگىنىڭ ەلەۆاتور ونەركاسىبىن جانە ەنەرگيا ۇنەمدەيتىن ەلەۆاتورلاردى دامىتۋدا ەلىمىزدىڭ ليفت ونەركاسىبى مەن ەكولوگيالىق تازا تەحنولوگيالاردى جەتىلدىرۋدە ۇلتتىق كاسىبي ەكولوگيالىق اۋديتورلار پالاتاسىمەن ىنتىماقتاستىق ءارى بىرلەسكەن قىزمەتتەرى نەگىزىندە كەلىسىمدەر بار», دەيدى قازاقستان ۇلتتىق ليفت قاۋىمداستىعىنىڭ پرەزيدەنتى ەرجان يگىباەۆ.
ليفت جابدىقتارىنا سۇرانىس جىل سايىن 10 پايىزعا ارتىپ وتىر. وندىرۋشىلەرگە ماڭىزدى پرەفەرەنتسيالار الۋعا مۇمكىندىك بەرەتىن «قاراپايىم زاتتار ەكونوميكاسى» باعدارلاماسىنا سايكەس ليفت جابدىعى ەنگىزىلگەن. بۇگىنگى تاڭدا ەلىمىزدە ليفت جابدىقتارىن وندىرەتىن 3 ءىرى كاسىپورىن جۇمىس ىستەيدى. ولاردىڭ ىشىندە «AUXE» اقمولا ەلەۆاتور قۇرىلىسى زاۋىتى, «LGS Kazakhstan elevator croup» جانە «الماتىليفت» جاۋاپكەرشىلىگى شەكتەۋلى سەرىكتەستىكتەرى بار. دەگەنمەن باسەكەگە قابىلەتتى باعالار مەن شەتەلدىك وندىرۋشىلەردىڭ ترانسفەرتتىك تەحنولوگيالارىمەن كەپىلدەندىرىلگەن جابدىق ساپاسىنا قاراماستان, زاۋىتتاردىڭ وندىرىستىك قۋاتتىلىعى تولىق جۇكتەلمەگەن.
سالاعا مەملەكەتتىك قولداۋ كورسەتىلسە, وتاندىق ءوندىرىستىڭ جىلىنا 4 مىڭ ەلەۆاتوردى وندىرۋگە مۇمكىندىكتەرى بار. بۇگىنگى كۇنگە دەيىن ليفت ونەركاسىبىنىڭ نەگىزگى پروبلەمالارىنىڭ ءبىرى نارىق سۋبەكتىلەرى ءۇشىن نورماتيۆتىك-تەحنيكالىق بازانىڭ (ۇلتتىق ستاندارتتار) بولماۋى اسەرىنەن نارىقتا ەشبىر جاۋاپكەرشىلىگى جوق, وزدەرىنە ىڭعايلاپ قۇرعان ەرەجەلەرگە سايكەس, قىزمەت كورسەتەتىن جوسىقسىز سەرۆيستىك جانە مونتاجداۋ ليفت كومپانيالارى بىرىنەن كەيىن ءبىرى پايدا بولۋىندا ەدى. ارتىنشا مينيسترلىككە قاراستى تەحنيكالىق رەتتەۋ جانە مەترولوگيا كوميتەتى قول قويعان جاڭا ۇلتتىق ستاندارت جارىققا شىعىپ, ليفت ۇيىمدارىنا قىزمەت كورسەتۋ, ولاردى ورناتۋ, سونىمەن قاتار ليفت جابدىقتارىن جەتكىزۋشىلەردىڭ بىلىكتىلىگىنە قويىلاتىن تالاپتار بەلگىلەندى. بۇگىنگى كۇنى الماتىدا 12 مىڭعا جۋىق ليفت جۇمىس ىستەيدى. التى جارىم مىڭعا جۋىعى تۇرعىن ۇيگە تيەسىلى. وتكەن جىلى نورماتيۆتىك پايدالانۋ مەرزىمى وتكەن 300 ليفت بولعان ەكەن. قازىر تۇگەلگە جۋىعى جاڭارتىلدى دەپ ايتۋعا بولادى.
ەلىمىزدە ادام ءومىرى مەن دەنساۋلىعىن قورعاۋدا ليفتتەرگە جانە ليفت قاۋىپسىزدىگى قۇرالدارىنا قويىلاتىن تالاپتاردى بەلگىلەيتىن كەدەن وداعىنىڭ 011/2011 تەحنيكالىق رەگلامەنتىنە سايكەس, كوتەرگىش مەحانيزمدەردى پايدالانۋ كەزىندە ونەركاسىپتىك قاۋىپسىزدىكتى قامتاماسىز ەتۋدە ماڭىزدى قۇجاتتاردىڭ ءبىرى – ست 3305-2018 «مۇگەدەكتەرگە ارنالعان ليفتىلەر, ەسكالاتورلار, تراۆولاتورلار جانە كوتەرگىشتەر. جابدىقتاۋعا, ورناتۋعا جانە پايدالانۋعا قويىلاتىن تالاپتار» بار. سونىمەن قاتار سوڭعى ۋاقىتتا جاڭا تۇرعىن ءۇي كەشەندەرىندە ادامدار مەن شاعىن جۇكتەردى تاسىمالداۋ ءۇشىن جولاۋشى-جۇك ەكى ليفت ورناتىلىپ, مەديتسينالىق مەكەمەلەردە توسەككە تاڭىلعان ناۋقاستاردى تاسىمالداۋ ءۇشىن بەلگىلى ءبىر تالاپتار بويىنشا ارنايى مەديتسينالىق ليفتىلەر قولدانىلادى.
قالاي ايتساق تا, ەلىمىزدەن شىعاتىن ليفتىلەردىڭ ساپا جاعىنان شەتەلدىك باسەكەلەستەردەن كەم تۇسپەسە دە وتاندىق قۇرىلىس سالۋشىلار ولاردى ءوز نىساندارىنا ورناتۋعا قۇلشىنىس تانىتپاي كەلەدى. سوندىقتان مەملەكەت ليفت سالاسىن دامىتىپ, ولارعا دەگەن سۇرانىستى ارتتىرۋ قاجەت. كليەنتتەرگە دايىن ءونىمدى شەتەلدەن ساتىپ الۋ ءتيىمدى, ال بولشەكتەرى قىمبات, سول ءۇشىن جەرگىلىكتى كومپانيالار ليفتتەردى ەلىمىزدە وندىرۋگە نەگىز جوق دەپ وتىر. بۇل وتاندىق وندىرۋشىلەردىڭ ەكونوميكالىق قولايسىز جاعدايىندا ەكەندىگىن ەسكەرۋىمىز كەرەك. وكىنىشكە قاراي, جەرگىلىكتى نارىقتا تولىق وندىرىستىك تسيكل ءۇشىن قاجەتتى كەيبىر كەرەكتى قۇرامداس بولىكتەر تاپشى. اتاپ ايتقاندا, ەلەۆاتوردى قۇراستىرۋعا ارنالعان نەگىزگى قوندىرعىلار باسقا ەلدەردەن كەلسە, پايدالانىلعان بولشەكتەر مەن توراپتاردىڭ 40 پايىزعا جۋىعى نەگىزىنەن قىتاي مەن كورەي ەلدەرىنەن اكەلىنەدى.
سونىمەن وتاندىق ءوندىرىستىڭ دالەلى رەتىندە تاياۋدا الماتىدا العاش رەت «Lift Expo Kazakhstan-2023» حالىقارالىق كورمەسى اشىلدى. ءىس-شاراعا قىتاي, تۇركيا جانە رەسەي سىندى ەلدەردىڭ وكىلدەرى كەلىپ, ونىمدەرىن تانىستىردى. كوپشىلىك نازارىنا جەدەلساتىلار, ەسكالاتور, كوتەرۋ مەحانيزمدەرى قويىلعان. ءۇش كۇنگە سوزىلعان كورمەدە ماماندار ليفتىدەگى ورىن الاتىن وقىس وقيعالار ماسەلەسىن تالقىلاپ, ءوزارا تاجىريبە الماستى.
«كورمەدە الىس-جاقىن شەتەلدەن اكەلىنگەن 50-دەن استام جەدەلساتى برەندى ۇسىنىلعان. قازاقستاننىڭ ءوندىرۋشى كومپانيالارى دا قاتىستى. كورمە العاش رەت ءوتىپ جاتسا دا, قۇرىلىس كومپانيالارىنىڭ نازارىنا ىلىگىپ وتىر. ول دا ءوز كەزەگىندە ەل ەكونوميكاسىنىڭ دامۋىنا قارقىندىلىق بەرۋى كەرەك», دەپ جەتكىزدى ءوز ويىن قاۋىمداستىق باسشىسى ءارى كورمەنىڭ باس دەمەۋشىسى ەرجان ءمىنىمحان ۇلى.
