«8 ساۋىردە استانادا فەمينيستەر شەرۋى ءوتتى. بۇل كۇنى تۇرمىستىق زورلىق-زومبىلىققا قارسى ميتينگ بولادى دەگەن. بىراق ولاي بولمادى. جينالعاندار ايەل تەڭدىگىن ايتۋدان باستادى, سوڭىندا لگبت-نى ناسيحاتتادى. ورىمدەي بالالار, اراسىندا وقۋشىلار دا بار, لگبت جالاۋىن جامىلىپ ءجۇر», دەدى ول.
حالىق قالاۋلىسىنىڭ سوزىنشە, سوڭعى كەزدە ەلىمىزدىڭ اقپاراتتىق كەڭىستىگىندە لگبت يدەولوگياسى ەركىن ناسيحاتتالىپ جاتىر.
«بۇل قازاق حالقىنىڭ عاسىرلار بويى قالىپتاسقان سالت-ءداستۇرىن بۇزىپ, ۇلتتىق قۇندىلىقتارىمىزدىڭ توز-توزىن شىعارۋدى كوزدەيدى دەپ بىلەمىن. ال ءداستۇرى مەن رۋحانياتىنان ايرىلعان ۇلتتىڭ بولاشاعى جوق ەكەنى ايدان انىق. ۇلت قۇرىسا – مەملەكەت قۇلايدى», دەپ اتاپ ءوتتى دەپۋتات.
وسىعان بايلانىستى ارداق نازاروۆ كەلەسى ۇسىنىستاردى شۇعىل نازارعا الۋدى سۇرادى.
«ميتينگكە (اۆت. – استانادا وتكەن) كەلگەن بالالاردىڭ اتا-انالارىنان سۇراۋ الىنسىن. بارلىق پلاتفورمالاردا, سونىڭ ىشىندە الەۋمەتتىك جەلىلەردە ۇلتتىق مادەنيەتىمىزگە سايكەس كەلمەيتىن فيلمدەر مەن سەريالداردى كورسەتۋگە جانە ناسيحاتتاۋعا تىيىم سالىنسىن. تەرىس اعىمداردى ناسيحاتتايتىن اقپارات كوزدەرىنەن ساقتايتىن زاڭ نورمالارى جاساقتالىپ, پارلامەنتكە قاراستىرۋعا ەنگىزىلسىن. رەسپۋبليكاداعى وقۋ ورىندارىندا ۇلتتىق قۇندىلىقتاردى, مادەنيەتتى ناسيحاتتاۋ ساباقتارى وقىتىلسىن», دەپ قورىتىندىلادى دەپۋتات.
