ەلىمىز بەن ەۋروپا وداعى اراسىندا جاڭا كەلىسىم جاسالماق

استانا. 4 شىلدە. قازاقستان مەن ەۋروپا وداعى 1995 جىلى قول قويىلعان ارىپتەستىك جانە ىنتىماقتاستىق تۋرالى كەلىسىمدى قايتا قاراپ, ونى جاڭارتۋعا مۇددەلى. سىرتقى ىستەر مينيسترلىگى وسىلاي دەپ مالىمدەدى. بۇل تۋرالى  today.kz حابارلادى. حابارلامادا كورسەتىلگەندەي, بريۋسسەلدە 30 ماۋسىم مەن 1 شىلدە ارالىعىندا قازاقستان مەن ەۋروپا وداعى ارىپتەستىگى مەن ىنتىماقتاستىعىن كەڭەيتۋ تۋرالى جاڭا كەلىسىمگە قاتىستى كەلىسسوزدەردىڭ جەتىنشى كەزەڭى اياقتالعان. جاڭادان تۇزىلگەلى وتىرعان بۇل كەلىسىمدە قاۋىپسىزدىك جانە قۇقىق سالاسىنداعى ىنتىماقتاستىقتى, سونداي-اق, ءوزارا ساۋدا جانە ينۆەستيتسيالىق, ەكونوميكالىق جانە گۋمانيتارلىق بايلانىستاردى دامىتۋ قامتىلعان. كەلتىرىلگەن مالىمەتكە قاراعاندا, ەۋروپا وداعىنىڭ ەلىمىزگە قالىپتاسىپ ۇلگەرگەن ايماقتىق دەرجاۆا رەتىندە ستراتەگيالىق قىزىعۋشىلىعى ارتىپ وتىر. ەكىجاقتى كەلىسسوزدەردىڭ سوڭعى كەزەڭى قىركۇيەك ايىندا استانادا وتەدى دەپ كۇتىلۋدە. جولدىباي بازار. دەرەككوز: today.kz. فوتو: today.kz.