پرەمەر-مينيستر وتكەن قىس جىلۋ ەنەرگەتيكاسىنداعى كوپتەگەن ماسەلەنىڭ بەتىن اشىپ بەرگەنىن ايتتى. اتاپ ايتقاندا, ەكىباستۇز, رۋدنىي جانە ريددەر قالالارىندا جاعداي وتە كۇردەلى بولدى. ونداعى ماسەلەلەردى كۇنى-ءتۇنى باقىلاۋعا الىپ, شۇعىل تۇردە شەشۋگە تۋرا كەلدى.
«بارلىق اكىمدىكتەر بۇدان قورىتىندى شىعارىپ, مۇنداي جاعدايعا ەندى قايتىپ جول بەرمەۋ ءۇشىن ساپالى جۇمىس ىستەۋى كەرەك», دەدى ءاليحان سمايىلوۆ.
جالپى, ءاليحان سمايىلوۆتىڭ ايتۋىنشا, بۇعان دەيىن جابدىقتاردىڭ تەحنيكالىق جاي-كۇيىنە ۋاقىتىلى, كەشەندى جانە وبەكتيۆتى باعالاۋ جۇرگىزىلگەن جوق. ودان بولەك جىلۋ ەلەكتر ورتالىقتارىنىڭ باسشىلىعى مەن يەلەرىنىڭ جاۋاپكەرشىلىگى تومەن بولعان.
«ۋاكىلەتتى مەملەكەتتىك ورگانداردىڭ نۇسقاۋلىقتارى تەك قانا ۇسىنىس دەڭگەيىندە بولدى, مەنشىك يەلەرىن ولاردى تولىقتاي ورىنداۋعا مىندەتتەمەيدى. سوندىقتان قوردالانىپ قالعان مۇنداي پروبلەمالار وتە كوپ. ولاردىڭ باسىم بولىگى جىلۋ جەلىلەرىنىڭ توزۋىنا قاتىستى بولىپ وتىر», دەدى ۇكىمەت باسشىسى.
وسىعان بايلانىستى بيىل ۇكىمەت ەنەرگيالىق باقىلاۋ قىزمەتىن زاڭنامالىق تۇرعىدان كۇشەيتىپ, ولارعا جوسپاردان تىس تەكسەرۋلەر جۇرگىزۋ قۇقىعىن بەرەدى. ەنەرگيا وبەكتىلەرىن ءتيىستى دەڭگەيدە كۇتىپ ۇستاماي, تىرشىلىككە قاجەتتى جۇيەلەردىڭ قىزمەتىنە قاۋىپ تونگەن جاعدايدا مەملەكەتكە ولاردى مەنشىكتەن الىپ قويۋ قۇقىعى بەرىلەتىن بولادى.
«ۇكىمەت پەن اكىمدىكتەر جانە مەنشىك يەلەرى ءتيىستى ەنەرگەتيكالىق ينفراقۇرىلىمدى جوندەۋ جانە رەكونسترۋكتسيالاۋ جوبالارىن قارجىلاندىرۋدى باسىم تارتىپپەن قامتاماسىز ەتەدى. وڭىرلەردەن كەلىپ تۇسكەن وتىنىمدەر نەگىزىندە جەلىلەردى اۋىستىرۋ بويىنشا قۇنى 69 ميلليارد تەڭگەنى قۇرايتىن 47 جوبادان تۇراتىن پۋل جاساقتالدى. بۇل جۇمىستى ساپالى جانە ۋاقىتىلى جۇرگىزۋدىڭ ماڭىزى وتە زور», دەدى ءاليحان سمايىلوۆ.
سونداي-اق 2 مىڭ شاقىرىم جىلۋ جەلىلەرى جەكە مەنشىكتە. ولاردىڭ توزۋ دەڭگەيى شامامەن 77 پايىز بولىپ وتىر. وسىعان بايلانىستى وسى جەلىلەردىڭ جاعدايىنا جانە جوندەۋ جۇمىستارىنىڭ مىندەتتى تۇردە جۇرگىزىلۋىنە باقىلاۋدى كۇشەيتۋ كەرەك.
«ەنەرگيا وبەكتىلەرى يەلەرىنىڭ جاۋاپكەرشىلىگىن ارتتىرىپ, ونى قىزمەت كورسەتۋ كەلىسىم-شارتتارىندا قاراستىرۋ كەرەك. شارت تالاپتارىن ورىنداۋ ۇسىنىم تۇرىندە ەمەس, مىندەتتى بولۋعا ءتيىس», دەدى پرەمەر-مينيستر.
سونىمەن قاتار, ۇكىمەت باسشىسى جەكە مەنشىكتەگى جىلۋ جەلىلەرىن بيۋدجەتتىك كرەديتتەۋ ارقىلى رەكونسترۋكتسيالاۋ ماسەلەسىن پىسىقتاۋ كەرەكتىگىن ايتتى. قارجىنى قايتارۋ ء«تاريفتى ينۆەستيتسياعا ايىرباستاۋ» شەڭبەرىندە جۇرگىزىلەدى. ۇكىمەت باسشىسى بارلىق تۇرعىن ءۇي-كوممۋنالدىق شارۋاشىلىق, تۇرعىن ءۇي جانە الەۋمەتتىك سالا وبەكتىسىنىڭ الداعى 2023-2024 جىلىتۋ ماۋسىمىنا دايىندىعى بويىنشا ءىس-شارالار جوسپارىن بەكىتىپ, ونى تەز ارادا ىسكە اسىرۋعا كىرىسۋى قاجەتتىگىن ايتتى.
ءاليحان سمايىلوۆ 1 ماۋسىمعا دەيىن قولدانىستاعى جىلۋ جەلىلەرىنىڭ جاعدايىنا تەحنيكالىق تەكسەرۋ جۇمىستارىن اياقتاۋ جانە وسى جۇمىستاردىڭ قورىتىندىسى بويىنشا اپاتتى جاعدايداعى جەكە مەنشىكتەگى جىلۋ جەلىلەرىن كوممۋنالدىق مەنشىككە بەرۋدىڭ قاجەتتىلىگىن انىقتاۋ كەرەك ەكەنىن قوسا ايتتى.
«تۋىنداعان بارلىق ماسەلەنى جىلىتۋ ماۋسىمىنا دەيىن سوزباي, جەدەل شەشۋ قاجەت. ۇساق-تۇيەك دەمەي, قاۋىپ-قاتەرلەردىڭ بارلىعىن مۇقيات ەسەپتەۋ كەرەك», دەپ ويىن اياقتادى پرەمەر-مينيستر.
