تۇركىستان وبلىسى دەنساۋلىق ساقتاۋ باسقارماسىنا قاراستى پسيحيكالىق دەنساۋلىق ورتالىعىندا جۇيكە اۋرۋلارىن جانە ناركولوگيالىق اۋرۋلاردى ەمدەيتىن 740 توسەك-ورىن بار. ونىڭ 525-ىندە جۇيكە اۋرۋلارىنا, 130-ىندا ناركولوگيالىق اۋرۋعا قاتىستى ناۋقاستار ەم-دوم الادى. سونداي-اق سارىاعاشتا – 60, كەنتاۋ قالاسىندا 65 توسەك-ورىندىق جۇيكە اۋرۋلارىن ەمدەيتىن بولىمشە بار, ولاردا جاقىن ماڭايداعى ناۋقاستار ەمدەلۋدە. وبلىستا 19 پسيحياتريالىق كابينەت بار. سونىمەن قاتار كەنتاۋ جانە تۇركىستان قالالىق ەمحانالارىندا العاشقى پسيحيكالىق دەنساۋلىق ورتالىقتارى جۇمىس ىستەيدى.
ورتالىق كومەگىنە مۇقتاجدارعا ەڭ الدىمەن ۋاقىتشا بەيىمدەۋ جانە دەتوكسيكاتسيا بولىمشەسىندە مەديتسينالىق قىزمەت كورسەتىلەدى. ودان سوڭ پسيحوتەراپيا جانە پسيحولوگيالىق تۇسىندىرمە جۇمىستارى جۇرگىزىلەدى.
«ناۋقاستارعا ءتۇرلى ترەنينگ ۇيىمداستىرىلىپ, ارقايسىسىمەن جەكە جۇمىس ىستەيمىز. ولاردى قايتادان قوعامدىق ورتاعا بەيىمدەۋگە بارىمىزدى سالامىز. قازىرگى تاڭدا مۇنداي ناۋقاستاردى ەڭبەك جانە سپورتتىق ءىس-شارالار ارقىلى قوعامعا بەيىمدەۋ جاقسى ناتيجە بەرىپ جاتىر. سەبەبى ەڭبەك ەتۋ ارقىلى ول ءوزىن قوعامعا كەرەك سەزىنەدى. ەڭسەنى ەزەتىن اۋىر ويلاردى قول جۇمىسى تىقسىرىپ شىعادى. ەڭبەك ەتۋ ارقىلى بويدان تەك تەر ەمەس, جاعىمسىز كوڭىل كۇي, ويلار دا سىرتقا بولىنەدى. ناتيجەسىندە, ناۋقاستار جۇيەلى ەڭبەك جۇمىستارىنان سوڭ وزدەرىن جەڭىل سەزىنەدى. ادامدى ادام ەتكەن ەڭبەك دەگەن ءسوز بار ەمەس پە؟ بۇل ءسوز وسىندا ءوزىنىڭ ومىرشەڭدىگىن دالەلدەپ كەلەدى. «جۇمىسى جوقتىق, تاماعى توقتىق, كويلەگى كوكتىك ازدىرار ادام بالاسىن» دەمەكشى, راسىندا دا ناۋقاستار كۇنۇزاق توسەگىندە جاتا بەرسە ەم قونۋى, قوعامعا بەيىمدەلۋى قيىن بولادى. سوندىقتان دا قازىر ەڭبەكپەن, سپورتپەن ەمدەۋ جۇمىستارىنا ەرەكشە دەن قويىپ جاتىرمىز», دەيدى ورتالىقتاعى اقپارات تالداۋ مونيتورينگ ورتالىعىنىڭ ءبولىم مەڭگەرۋشىسى ءبورىباي سيحىمبەكوۆ.
ورتالىق باسشىسىنىڭ مەديتسينالىق قىزمەت ساپاسىن باقىلاۋ بويىنشا ورىنباسارى قابىلەت ابەنوۆتىڭ ايتۋىنشا, مۇندا توسەك-ورىن جەتىسپەۋشىلىگى جوق. وڭالتۋ بولىمشەسى سپورتتىق قۇرالدارمەن جابدىقتالعان. ناۋقاستار جۇگىرۋ الاڭىندا ابدەن تەرلەپ, بىلتە تەمىرلەردى كوتەرىپ, ۆەلوسيپەد اپپاراتىندا بۇكىل دەنەسىنە كۇش سالىپ, بويىندا قان جۇگىرتە الادى. ماماندار بۇل ناۋقاستاردى سەرگىتىپ, ومىرگە باسقاشا كوزقاراسپەن قاراۋعا سەپتىگىن تيگىزەتىنىن ايتادى.
«سپورت جاتتىعۋلارى اعزانىڭ يممۋنيتەتىن كوتەرەدى, سول سەبەپتى سپورتپەن شۇعىلداناتىن ادامدار, ۆيرۋستىق ينفەكتسيالارعا بەيىم بولمايدى. فيزيكالىق بەلسەندىلىك قان تامىرلارىنا جاعىمدى اسەر ەتەدى. جۇرەك – دەنەنىڭ ەڭ ماڭىزدى ورگانى, ونىڭ دۇرىس جۇمىس ىستەمەۋى, اۋىر سالدارعا اكەلۋى مۇمكىن. كۇندەلىكتى جاتتىعۋلار – جۇرەك-تامىر جۇيەسى قىزمەتىنىڭ جاقسارۋىنىڭ كەپىلى. سونىمەن قاتار وڭالتۋ بولىمشەسىندە ارنايى شەبەرحانالار اشىلعان. شەبەرحانالارعا ناۋقاستار ستانوكتارمەن اعاشتان ويۋ ويىپ, ءتۇرلى تۇرمىسقا قاجەتتى بۇيىمدار جاسايدى. اسىرەسە ناۋقاستار استاۋ جاساۋدى جاقسى مەڭگەرگەن. استاۋلار وتە ساپالى شىعىپ, جۇرت قىزىعۋشىلىعىن ءبىلدىرىپ جاتىر. ال دومبىرالاردى ورتالىقتىڭ ناۋقاستارى جاسادى دەگەنگە كوپ جۇرت سەنە قويمايدى. كانىگى شەبەرلەردەن ءبىر مىسقال كەم جاسالماعان دۇنيەلەرگە قاراپ باسىڭىزدى شايقايسىز. راسىندا دا, ناۋقاستار اراسىندا قولىنان ونەر تامعان شەبەرلەر بار. ولار مۇندا ۋاقىتىن ءتيىمدى جۇمساپ جاتقانىن جاساعان بۇيىمدارىنا قاراپ اڭعارۋعا بولادى. جانە دە مۇندا كىشىگىرىم كىتاپحانا بار. كىتاپ وقۋ ارقىلى ناۋقاستار تانىم كوكجيەكتەرىن كەڭەيتە الادى. مەرزىمدى باسىلىمداردى وقىپ, كۇندەلىكتى جاڭالىقتاردى ءبىلىپ وتىرادى», دەيدى ق.ابەنوۆ.
ايتا كەتەلىك, وتكەن جىلى 22 083 ناۋقاس ديسپانسەرلىك باقىلاۋدا بولعان. ونىڭ 4 056-سىنىڭ پسيحواكتيۆتى زاتتاردى قولدانۋدان تۋىنداعان پسيحيكالىق جانە مىنەز-ق ۇلىق بۇزىلىستارى بار. سونداي-اق بىلتىر پسيحيكالىق جانە مىنەز-ق ۇلىق اۋىتقۋلارى بار 88 ناۋقاس مەديتسينالىق-الەۋمەتتىك وڭالتۋدان وتكەن. ونىڭ 45-ءى – پسيحياتريالىق, 43-ءى – ناركولوگيالىق, 11-ءى – بالالار بولىمشەسىنىڭ پاتسيەنتتەرى. سونداي-اق پسيحيكالىق دەنساۋلىق ورتالىعىندا 4 856 بالا مەن 147 ءجاسوسپىرىم ديسپانسەرلىك باقىلاۋدا بولىپ, ولاردىڭ 122-سىنە اۋتيزم دياگنوزى قويىلعان.
تۇركىستان وبلىسى
