عيماراتتىڭ ءىشى-سىرتى تالاپقا ساي جابدىقتالعان. نەگىزىندە عيمارات جەرگىلىكتى بيۋدجەت ەسەبىنەن ساتىپ الىنىپ, وعان جالپى سوماسى 200 ملن تەڭگەگە كۇردەلى جوندەۋ جۇرگىزىلگەن. قاجەتتى جابدىقتاردى «قامقورلىق» كورپوراتيۆتىك قورى ساتىپ اپەرىپتى. ديرەكتورى مارات باكيەۆتىڭ ايتۋىنشا, ىڭعايلى بولۋ ءۇشىن وڭالتۋ ورتالىعىنداعى ەكى اۋىسىمدا – تۇسكە دەيىن جانە تۇستەن كەيىن 4,5 ساعاتتان الەۋمەتتىك قىزمەتتەر كورسەتىلەدى.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, ورتالىقتا سەنسورلىق, مۋزىكالىق, پروتسەدۋرالىق كابينەتتەر, ەمدىك دەنەشىنىقتىرۋ, فيزيوتەراپيا, ماسساج, روبوتتەحنيكا, ەڭبەككە باۋلۋ, جەكە جانە توپتىق جۇمىس كابينەتتەرى, سونداي-اق لوگوپەد, پسيحولوگ, دەفەكتولوگ كابينەتتەرى, قىش شەبەرحاناسى بار. باستى مىندەتى – تۋىنداعان الەۋمەتتىك پروبلەمالاردى ەڭسەرۋگە جانە قوعام ومىرىنە ارالاسۋدىڭ تەڭ مۇمكىندىكتەرىنە جاعداي جاساۋعا باعىتتالعان قىزمەتتەر كەشەنىن ۇسىنۋ. بۇل وبلىستاعى وسىنداي العاشقى ورتالىق بولماق.
دۇرىس قوعام ەشكىمدى الالامايدى. قازاق وبال, ساۋاپ دەگەن تۇسىنىككە ەرەكشە كوڭىل بولگەن. ەندەشە ءوزىمىزدىڭ ايىرىلماس ءبىر بولشەگىمىز, ءارتۇرلى جاعدايعا بايلانىستى قيمىل-قوزعالىسى شەكتەلىپ قالعان باۋىرلارىمىزعا جاردەم بەرۋ, قولداۋ – ازاماتتىق پارىزىمىز. كەيىنگى ۋاقىتتا ەكولوگيالىق جاعدايعا بايلانىستى ما, ىشكەن استان با, قولدانعان ءدارى-دارمەكتەن بە, ەشكىم سەبەبىن تاپ باسىپ ايتا المايتىن كەسەلدەر كوبەيدى. سونىڭ ءبىرى – بالالار اراسىندا پسيحيكالىق بۇزىلىستارى بار, اۋتيست دەرتىنە شالدىققاندار سانىنىڭ كوبەيگەنى. ەرەكشە بالالارعا ءوز دەڭگەيىندە قامقورلىق كەرەك.
ماسەلەن, «قامقورلىق» ارناۋلى الەۋمەتتىك قىزمەت كورسەتۋ ورتالىعى» كوممۋنالدىق مەملەكەتتىك مەكەمەسى مۇمكىندىگى شەكتەۋلى بالالارعا الەۋمەتتىك-مەديتسينالىق قىزمەت كورسەتەدى. پسيحيكالىق بۇزىلىسپەن دۇنيەگە كەلگەن بالالاردىڭ تولىققاندى ءومىر سۇرۋىنە بارلىق جاعداي جاسالعان. جاتىن ورىن, ويىن الاڭى تالاپقا ساي جابدىقتالعان. ءىشىم-جەمنەن تارشىلىق جوق. مەيىرىم ۇيىندە جىلىجاي بار. وندا گۇلدىڭ سان الۋان ءتۇرى وسىرىلەدى. قىستىڭ كۇنى بالالار ەركىندىكتى قالاپ, وزىمەن-ءوزى بولعىسى كەلەتىن كەزدەرى بولادى ەكەن. سوندا وسى جىلىجايعا كەلىپ, توپىراقپەن ويناپ, گۇلدەرگە ءسۇيسىنىپ, وسىمدىكتەردى سۋارىپ, تابيعاتتى تاماشالاپ, كوڭىل كۇيى كوتەرىلەتىن كورىنەدى.
«بۇگىنگى جاھاندىق اقپاراتتىق وزگەرىستەر جاعدايىندا قازىرگى اتا-انالاردىڭ بالا تاربيەسىنە قاراۋىنا ۋاقىتى جەتپەيدى. سوندىقتان بالالارىمىزدى سمارتفون, ۆيرتۋالدى الەم تاربيەلەپ جاتىر. وسى ورايدا اتا-اجەلەردىڭ ۇرپاق تاربيەسىندەگى ءرولى ەرەكشە. سىزدەردىڭ تاربيەلەرىڭىز ارقىلى بالالار جاناشىرلىققا, تۇسىنىستىككە, ءوزارا ءبىر-ءبىرىن قولداۋعا ۇيرەنەدى. سوندىقتان وسكەلەڭ ۇرپاقتى, قازىرگى جاستاردى تاربيەلەۋدە سىزدەردىڭ كومەكتەرىڭىز اسا قاجەت», دەدى ب.يساباەۆ.
«تەڭ قوعام» دەپ اتالاتىن ورتالىق مۇگەدەكتىگى بار ادامدارعا جان-جاقتى كومەك كورسەتۋگە ارنالعان. ولاردىڭ قۇجاتتارىن رەسىمدەپ, ينتەرنەت ارقىلى كەرەك-جاراعىن سۇراتۋىنا جاردەم بەرىلەدى. ورتالىقتا سانجار جاقسىلىقوۆتىڭ شاش قيۋ, تىرناق بوياۋ امبەباپ ورتالىعى تانىستىرىلدى. جاس كاسىپكەرلەر «Jas project» جوباسى اياسىندا بيزنەسىن قالاي جۇرگىزىپ جاتقانىن ايتىپ بەردى. مىسالى, سانجار 1 ملن تەڭگە سوماسىنا گرانت الىپ, پوليتەحنيكالىق كوللەدج بازاسىندا شاشتاراز, مانيكيۋرلىك كوسمەتولوگيالىق قىزمەتتەر كورسەتىلەتىن شاعىن سۇلۋلىق سالونىن اشقان. باستاپقىدا سانجار مەن جانىنداعى تاعى 2 جاس شەبەر كورسەتكەن قىزمەتتەرى ءۇشىن اقى الماعان, وسىلايشا ءبىراز تاجىريبە جيناقتاپ بارىپ, كەيىن تابىس تابا باستاعان. ال نازەركە بولسا, گرانت قاراجاتى ەسەبىنەن ءوزىنىڭ اسپازدىق ءىسىن قولعا الىپتى.
شىنىندا, رۋحاني جانە ماتەريالدىق كومەكتى سەزىنگەن ادامنىڭ شاتتانعان ءساتىن كورۋدىڭ ءوزى – ءبىر باقىت. «جىگەر» مۇگەدەكتەردىڭ قوعامدىق بىرلەستىگى, «الپامىس» قب, تالدىقورعان ساڭىراۋلار قوعامىنىڭ وقۋ-ءبىلىم بەرۋ كاسىپورنى جانە بىرقاتار جەكە كاسىپكەر دە ءوز ونىمدەرىن, اتاپ ايتقاندا, وزدەرى تىككەن بىلعارى اياقكيىم, توسەك-ورىن, ارنايى كيىم, سالعان سۋرەتتەرىن, ءتۇرلى دەكور مەن تۇرمىستىق زاتتارىن كورسەتتى. ونىمدەردىڭ كوپشىلىگى الەۋمەتتىك جەلىلەر ارقىلى ساتىلادى. دەگەنمەن زاماناۋي تىگىن ماشيناسىن ساتىپ الۋعا قولداۋ قاجەت, اياقكيىم جاساۋ تسەحى مەن ساۋدا بازارىنداعى ورىن ءۇشىن تەگىن بولمە ءبولۋ, تسەح ءۇي-جايىن جوندەۋ, مەديتسينالىق كومەك كورسەتۋدە دە پروبلەمالار بار. بۇل رەتتە وبلىس اكىمى بارلىق ايتىلعان ماسەلە بويىنشا, ەڭ الدىمەن ساۋىقتىرۋ ماسەلەلەرىندە ءتيىستى قولداۋ كورسەتىلەتىنىن ايتتى.
الەۋمەتتىك قىزمەت كورسەتۋ نىساندارىن ارالاعان سوڭ بەيبىت يساباەۆ كاسىپكەر ەردوس بايالىشباەۆ اشقان «اسار» جاڭا سپورتتىق-وڭالتۋ كەشەنىندە بولدى. زامان تالاپتارىن ەسكەرە وتىرىپ سالىنعان ورتالىقتا تىرەك-قيمىل اپپاراتىندا بۇزىلىسى بار ادامداردى وڭالتۋعا بارلىق قاجەتتى جاعداي جاسالعان. دارىگەر, لوگوپەد, پسيحولوگ كابينەتى, ۇلكەن ترەناجەر زالى, كينەزوتەراپيا جانە لفك زالى, ماسساج, ەمدەۋ كابينەتتەرى, فيزيوتەراپيا جۇرگىزۋگە ارنالعان كابينەت, بۋفەت, ىڭعايلى دارەتحانا بولمەلەرى قاراستىرىلعان.
ورتالىقتىڭ ديرەكتورى ەلدوس بايالىشباەۆتىڭ سوزىنە سۇيەنسەك, ورتالىقتى رەسمي تۇردە ماۋسىم ايىنىڭ باسىندا اشۋ جوسپارلانىپ وتىر, ال قازىرگى تەحنيكالىق اشىلۋى بارىسىندا جابدىقتار تەكسەرىلىپ, ىرگەلەس اۋماقتى اباتتاندىرۋ جۇمىستارى جۇرگىزىلۋدە.
ء«بىزدىڭ ورتالىقتىڭ قۇرىلىپ باستاعانىنا 4 جىلعا جۋىق ۋاقىت بولدى. 2015 جىلى ورتالىق اشۋ تۋرالى وي كەلىپ, ونى كەزەڭ-كەزەڭىمەن سالا باستادىق. ءتۇرلى مەملەكەتتىك باعدارلامالارعا قاتىسىپ, سونىڭ ارقاسىندا گرانتتار ۇتىپ, ءوز بيزنەسىمدى دامىتىپ, جەڭىلدىكتى شارتتارمەن نەسيە الدىق. جاپونيا ەلشىلىگىنىڭ قولداۋىمەن ەكى رەت گرانت جەڭىپ الدىم. سول ارقىلى يتاليادان, پولشادان زاماناۋي جابدىقتار ساتىپ الدىق. ەندى بىزگە وڭاي باسقارىلاتىن, كوپفۋنكتسيالى ەكزوسكەلەتتەر يسپانيادان اكەلىنەتىن بولدى. سونىمەن قاتار فيزيواپپاراتتار, ماگنيتوتەراپيا, ەلەكتروستيمۋلياتسيا, وڭالتۋعا ارنالعان اسپالى جۇيەلەر جانە تاعى باسقا دا جابدىقتار كەلۋشىلەردى وڭالتۋعا سەپتىگىن تيگىزەدى. مەملەكەتتىك الەۋمەتتىك تاپسىرىستىڭ ناتيجەسىندە ورتالىقتاعى بارلىق قىزمەت تەگىن كورسەتىلەدى», دەدى ەلدوس.
ونىڭ ايتۋىنشا, ورتالىق 400 ادامعا ارنالعان, وندا 27 مامان جۇمىس ىستەيدى. بۇل رەتتە «قاراتال» شاعىن اۋدانىندا ورنالاسقان «اسار» ءبىرىنشى ورتالىعى بالالاردى وڭالتۋ ورتالىعى رەتىندە قايتا جابدىقتالماق, وسىعان بايلانىستى وندا ءتيىستى جوندەۋ جۇمىستارىن جۇرگىزۋ جوسپارلانعان.
قاسيەتتى رامازان ايىنداعى مۇمكىندىگى شەكتەۋلى جاندارمەن كەزدەسۋ ەرەكشە ءوتتى. ءدال وسى كۇنى قالاداعى ءجۇرىپ-تۇرۋى قيىن ادامداردى تاسىمالداۋعا جاڭادان 3 ينۆاتاكسي بەرىلدى. زاماناۋي ۇلگىدەگى تاكسي پايدالانۋشىلاردىڭ كوڭىلىنەن شىقتى. جىلى جۇزدەسۋ كوپ جاننىڭ ءۇمىتىن ۇشتادى.
جەتىسۋ وبلىسى
