«قازاقستاننىڭ دامۋ بانكى» اكتسيونەرلىك قوعامى باسقارما توراعاسىنىڭ ورىنباسارى تاعايىندالدى

استانا. 3 شىلدە. «قازاقستاننىڭ دامۋ بانكى» اكتسيونەرلىك قوعامى ديرەكتورلار كەڭەسىنىڭ 2014 جىلعى 30 ماۋسىمداعى شەشىمىمەن رينات ءنۇريامين ۇلى سەيسەنباەۆ «قازاقستاننىڭ دامۋ بانكى» اكتسيونەرلىك وعامى باسقارما توراعاسىنىڭ ورىنباسارى قىزمەتىنە تاعايىندالدى. بۇل تۋرالى «قازاقپارات» حابارلادى. رينات سەيسەنباەۆ ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن ەكونوميست, مەنەدجمەنت جانە ماركەتينگ ماماندىعى بويىنشا بىتىرگەن. ول ءار جىلدارى «قازاقستاننىڭ ينۆەستيتسيالىق قورى» اكتسيونەرلىك قوعامى باسقارما توراعاسىنىڭ ورىنباسارى, «سامۇرىق-قازىنا ينۆەست» جاۋاپكەرشىلىگى شەكتەۋلى سەرىكتەستىگىنىڭ, «التەل» اكتسيونەرلىك قوعامىنىڭ, «جانا ار-ويل» جشس جانە «استانا-قۇرىلىسينتەرەر» جاۋاپكەرشىلىگى شەكتەۋلى سەرىكتەستىگىنىڭ ديرەكتورى, «قاراعاندى وتىن-ەنەرگەتيكالىق كومپانياسى» جاۋاپكەرشىلىگى شەكتەۋلى سەرىكتەستىگى ديرەكتورىنىڭ ورىنباسارى بولىپ قىزمەت ەتكەن. جولدىباي بازار. دەرەككوز: «قازاقپارات». فوتو: today.kz.