«زاڭ جوباسىن ازىرلەۋ ءۇشىن كەيىنگى 3-4 جىلدا جەكە جانە زاڭدى تۇلعالاردان كەلىپ تۇسكەن جانە قارالعان وتىنىشتەرگە تالداۋ جۇرگىزىلدى. وسى ورايدا اتالعان مەرزىمدە 14 مىڭنان استام ءوتىنىش كەلىپ تۇسكەن ەدى. بۇل تۇرعىدا مەديتسينا قىزمەتكەرلەرىنە قاتىستى قوزعالعان قىلمىستىق ىستەرگە تالداۋ جۇرگىزىلدى. جىل سايىن مەديتسينا قىزمەتكەرلەرىنە قاتىستى كاسىبي مىندەتتەرىن تيىسىنشە ورىنداماعانى ءۇشىن قر قىلمىستىق كودەكسىنىڭ 317-بابى بويىنشا شامامەن 300-گە جۋىق ءىس قوزعالادى», دەدى ا.عينيات ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ كەزىندە.
ونىڭ ايتۋىنشا, قىلمىستىق ىستەر كوبىنەسە ءولىم قاۋپى جوعارى مەديتسينالىق سالالاردا ءجيى قوزعالادى. ياعني اكۋشەر-گينەكولوگتار, حيرۋرگ ماماندار, تراۆماتولوگتار, انەستەزيولوگتار ءىستى بولىپ جاتادى.
«وسىنداي جاعداي بولعان كەزدە, مەديتسينا قىزمەتكەرى جالاقىسىنىڭ دەڭگەيى قازىرگى كەزدە ناۋقاستىڭ دەنساۋلىعىنا كەلتىرىلگەن زياندى ءوز بەتىنشە وتەۋگە مۇمكىندىك بەرمەيدى. كەي جاعدايدا وسىنداي وقيعالار كەزىندە دارىگەرلەر تۋىستارىنان قاراجات جيناپ, وتەماقى تولەپ جاتادى», دەدى ۆەدومستۆو باسشىسى.
