«تۇمار» تەلەباعدارلامالار بايقاۋىنا ەكى نوميناتسيا قوسىلادى

بۇل تۋرالى اقپارات جانە قوعامدىق دامۋ ءمينيسترىنىڭ مىندەتىن اتقارۋشى دارحان قىدىرالى «Nauryz» ۇلتتىق بايگە كەشىندە ايتتى.

«بۇگىنگى بايقاۋدى جىل سايىن وتكىزۋدى داستۇرگە اينالدىرۋدى جوسپارلاپ وتىرمىز. «Nauryz» دەپ اتاۋىمىزدىڭ سەبەبى – جىل سايىن ناۋرىز ايىندا وتكەن جىلدىڭ قورىتىندىسىن شىعارىپ وتىرامىز. تەلەسەريالدارعا بولەك بايقاۋ جاريالاعان سوڭ، «تۇمار» بايقاۋىنا انيماتسيالىق ونىمدەر مەن دەرەكتى فيلمدەردى ارنايى ەنگىزەمىز»،  دەدى د.قىدىرالى.

سونىمەن قاتار ەلىمىزدە سوڭعى جىلدارى كرەاتيۆتى يندۋستريا، تەلەسەريالدار قارقىندى دامىپ كەلە جاتقانى اتاپ ءوتىلدى.

«قازىر بىزدە سان دا، ساپا دا ارتىپ كەلەدى، قاراجات جاعىن دا كوبەيتۋدى قاراستىرىپ وتىرمىز. قازىر وتاندىق سەريالدار ىشكى جانە سىرتقى نارىقتا زور سۇرانىسقا يە بولىپ وتىر. بۇرىن ءۇندىنىڭ «كەلىنىنە» تەلمىرەتىن كورەرمەن قازىر ءوزىمىزدىڭ «كەلىنجان» مەن «اپپاق كەلىندى» كورەدى. حالىقارالىق جوبالاردى دا ارتتىرىپ جاتقانىمىز بەلگىلى. وسىندا شەتەلدەن – باۋىرلاس تۇركيادان، ازەربايجاننان، قىرعىزستاننان، وزبەكستاننان كەلگەن مارتەبەلى مەيماندارىمىزعا ريزاشىلىعىمىزدى بىلدىرەمىن. بولاشاقتا بۇل ەلدەرمەن ورتاق جوبالار جاساۋ ءبىزدىڭ جوسپارىمىزدا»، دەدى دارحان قىدىرالى.