كۇللى ماسكەۋلىكتەردى ونەرىمەن ءتانتى ەتىپ, ەكى اياعىنان تىك تۇرعىزىپ قۇلاشتاپ قول سوقتىرعان ايگىلى كۇلاش بايسەيىتوۆا كسرو حالىق ءارتىسى اتاعىن العاندا بار-جوعى 24 جاستا بولاتىن. بىراق ول اتاقتى ىزىنەن قۋالاپ ءجۇرىپ العان جوق, اتاق ونى ءوزى ىزدەپ كەلىپ تاپتى. مىنە, اتاق وسىنداي قاسيەتىمەن باعالى. پرەزيدەنت قاسىم-جومارت توقاەۆتىڭ ونەر ادامدارىنا «قازاقستاننىڭ حالىق ءارتىسى» اتاعىن قايتارۋ تۋرالى يدەياسىن ساحنا مامانى رەتىندە قۇپ الا وتىرىپ, ويىما الدىمەن وسى مىسال ءتۇستى. پرەزيدەنت ۇسىنىسىنا قوسا, ونەر مەن ساحنا شەبەرلەرىنە ايرىقشا مارتەبەنى قايتاراتىن كەزدە بارماق باستى, كوز قىستىعا سالىنباي, حالىققا, ونەرگە ەڭبەگى سىڭگەن شىن لايىقتى تۇلعانى قاپىسىز تانىپ, ماراپاتتاسا دەگەن تىلەگىمدى قوسقىم كەلەدى.
قازىر تالانتتى بولساڭ, تانىلۋدىڭ مۇمكىندىگى مول, قوعام اينا سياقتى, دارا دارىن يەسى ەڭبەگىنىڭ ناتيجەسىمەن ءوزى-اق ەكشەلىپ شىعادى. جاۋاپتى مەكەمەلەر ءادىل باعاسىن بەرسە, بولعانى. ونەر يەسى «حالىق ءارتىسى» دەگەن اتاقتى بىردەن يەلەنە سالماي, ونەردىڭ بۇكىل ساتىسىنان ءوتىپ بارىپ, شەبەرلىگىنىڭ شىڭىن, بيىك ورەسىن دالەلدەگەندە عانا قول جەتكىزسىن. فونوگراممانى قىسقارتسىن, كونتسەرتتەرىن انشلاگپەن وتكىزسىن, ول ويناعان سپەكتاكلگە تايلى-تاياعى قالماي ەل اعىلىپ بارسىن, حالىقارالىق قازىلاردى ءتانتى ەتسىن, شەتەلدىكتەردىڭ كوڭىل تورىنەن ورىن السىن, مىنە, وسىنداي حالىقتىڭ ماحابباتىن يەلەنگەن شىن تالانت حالىق ءارتىسى اتانسا, جاراسادى ەمەس پە؟ سەبەبى «حالىق ءارتىسى» بولۋ – حالىققا بيىك ونەرىمەن ادال قىزمەت ەتۋ. ال بۇل – قىرۋار ەڭبەك, مۇقالماس مىنەز, ونەرگە دەگەن جاۋاپكەرشىلىك.
ايدوس بەكتەمىر,
قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى
