وبلىس اكىمدىگى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى مۇراتحان شۇكەەۆتىڭ ايتۋىنشا, وڭىردە 2021-2025 جىلدار ارالىعىندا 140,8 ميلليون كوشەت وتىرعىزىلۋى ءتيىس. ونىڭ 35,1 ميلليونى 2021-2022 ارالىعىندا ەگىلگەن بولسا, 105,5 ميلليون اعاش 2023-2025 جىلدارى وتىرعىزىلماق.
«جالپى العاندا, «جامبىل وبلىسىندا 2021-2025 جىلدارى ورمانداردى مولىقتىرۋ جانە مولايتۋ تۋرالى» كەشەندى جوسپار بار. سوعان سايكەس, 2023 جىلى مەملەكەتتىك ورمان قورى جەرلەرىنە 5670 گەكتار اۋدانعا 16655,0 مىڭ كوشەت وتىرعىزۋ جوسپارلانعان. بۇگىنگى كۇنگە دەيىن 5670 گەكتار جەردى دايىنداۋ جۇمىستارى تولىعىمەن اياقتالعان. وڭىردە كوشەت وتىرعىزۋ جۇمىستارىن 15 ساۋىرگە دەيىن تولىقتاي اياقتاۋ جوسپارلانعان», دەيدى باسقارما باسشىسى.
ۇلىستىڭ ۇلى كۇنى اياسىندا كوشەت ەگۋ جۇمىستارىنا اۋليەاتالىقتار ەرەكشە قارقىنمەن كىرىسىپ تە كەتتى. ماسەلەن, «بىرگە تازا قازاقستان» اكتسياسى اياسىندا تاراز قالاسىندا كوكتەمگى كورىكتەندىرۋ جانە سانيتارلىق تازالىق جۇمىستارى جۇرگىزىلدى. اتالمىش اكتسيا اياسىندا تولە بي كوشەسى, تاۋكە حان كوپىرىنەن باستاپ تۇڭعىش پرەزيدەنت ساياباعىنا دەيىن, اتالعان ساياباق اۋماعىندا 5 كوك شىرشا, 7 جاسىل شىرشا, 50 قىرىم قاراعايى, 120 ياسەن, 6 تۋيا اعاشى ەگىلدى.
تارازدىقتاردىڭ تاماشا باستاماسىن شۋلىقتار دا ساتىمەن جالعاستىردى. شۋ قالاسىنداعى «IQ URKER SCHOOL» مەكتەبىندەگى «اتاڭنان مال قالعانشا, تال قالسىن» اتتى اعاش وتىرعىزۋ اكتسياسىنا اۋدان باسشىلارى دا بەلسەنە قاتىستى. ۇلىستىڭ ۇلى كۇنى قارساڭىندا ەڭبەكتەگەن بالادان ەڭكەيگەن قارياعا دەيىن بەلسەندىلىك تانىتىپ, مەكتەپ ماڭايىنا تال ەگىپ, قازاقى ىرىم-نيەتپەن جاڭادان ەگىلگەن جاس تالداردىڭ تۇبىنە اق قۇيدى.
ەسەت دوسالى,
جۋرناليست
جامبىل وبلىسى
