شاراينا
سولتۇستىككورەيالىق تاراپتىڭ ۇندەۋىندە كحدر-ءدىڭ وڭتۇستىك كورەياعا قارسى ۇگىت-ناسيحات جۇمىستارىن ۋاقىتشا توقتاتۋعا دايىن ەكەنى اتاپ كورسەتىلەدى. ءسويتىپ, وڭتۇستىك كورەيا تاراپىنان دا وسىنداي جاۋاپ قادام كۇتىلەتىنى جاسىرىلمايدى. وسى ارالىقتا, كحدر كوسەمى كيم چەن ىن كەز كەلگەن ءادىس-ءتاسىل ارقىلى كورەيا حالىق ارمياسىنىڭ قورعانىس كۇشتەرىن جەدەل بەكەمدەۋ قاجەتتىگى تۋرالى مالىمدەپ ۇلگەردى. ونىڭ مالىمدەۋىنشە, بەرىك بەيبىتشىلىككە بەلگىلى ءبىر تاراپ اسا كۇشتى بولىپ, وعان ەشكىم قارسى شىعا المايتىن جاعدايدا عانا قول جەتكىزۋگە بولادى.
قىسقا قايىرىپ ايتقاندا:
اقش-تىڭ لوس-اندجەلەس قالاسىنداعى مەيرامحانالاردىڭ بىرىندە ۇيىمداستىرىلعان دەمالىس كەشىندە قىلمىسكەر سونداعى ادامدارعا وق جاۋدىرسا, ءبىر ادام قازا تاۋىپ, تورتەۋى جارالانعان. وقيعا جەرگىلىكتى ۋاقىت بويىنشا تاڭعى ساعات 5.00-دە تىركەلگەن. قارۋ جۇمساعان ادامنىڭ وسى كەشتىڭ قوناعى بولعانى-بولماعانى انىقتالىپ جاتسا كەرەك.
ءۇندىستاننىڭ مۋمباي قالاسىندا قۇلاعان ءۇيدىڭ استىندا قالىپ, قازا تاپقاندار سانى 60-تان استى. قۇتقارۋشىلار ءتىرى قالعانداردى ىزدەۋ ۇدەرىسىن اياقتادى. ۇيىندىلەر استىندا تاعى دا بىرنەشە مۇردە قالۋى مۇمكىن. الدىن الا دەرەك بويىنشا, ءۇيدىڭ قۇلاۋىنا زاڭسىز قايتا جوسپارلاۋ سەبەپ بولعان. پوليتسيا كۇدىكتىنى تۇتقىنداپ ۇلگەرگەن.
بولگاريا پرەزيدەنتى روسەن پلەۆنەليەۆ كەشە پارلامەنتتى تاراتىپ, ۋاقىتشا ۇكىمەت تاعايىنداۋ نيەتى بار ەكەنىن حابارلادى. پرەزيدەنت مۇنداي ۇستانىمعا ساياسي پارتيالاردىڭ سەركەلەرىمەن ۇزاققا سوزىلعان كەلىسسوزدەردىڭ قورىتىندىسىندا كەلگەن. ەندى وسى ەلدەگى ساياسي پارتيالار كەزەكتەن تىس پارلامەنت سايلاۋىن 5 قازانعا بەلگىلەپتى.
ماگنيتۋداسى (جەردىڭ استىنداعى قۋاتى) 6,2 بالدىق جەر سىلكىنىسى جاپونيانىڭ يۆودزيما ارالىندا تىركەلدى. سىلكىنىستىڭ ەپيتسەنترى ارالدىڭ وڭتۇستىك-شىعىسىنا قاراي 167 شاقىرىمدا بولعان. تسۋنامي قاتەرى جوق دەلىنىپ وتىر. ال ارالدىڭ وزىندە حالىق تۇراقتى تۇرمايدى ەكەن.
رەسەيدىڭ توتەنشە جاعدايلار مينيسترلىگىنىڭ ۇشاعى وتكەن جەكسەنبى كۇنى ۇندىستانداعى جول-كولىك وقيعاسىنان زارداپ شەككەن 5 رەسەيلىكتى ماسكەۋگە جەتكىزگەن. ىشىندە 13 رەسەيلىك تۋريست بار اۆتوبۋس 10 ماۋسىم كۇنى ۋتتاركحاند شتاتىنىڭ تاۋلى جولىندا وزەنگە قۇلاعان ەدى. وقيعا ورنىندا ەكى رەسەيلىك قازا تاپسا, بىرەۋى ءىز-ءتۇزسىز جوعالىپ كەتكەن-ءتىن.
يراكتىق يسلاميستەر حاليفات قۇرادى
يراك پەن سيريا اۋماعىنىڭ ءبىر بولىگىن جاۋلاپ العان «يراك پەن لەۆانتتىڭ يسلام مەملەكەتى» راديكالدى توبى حاليفات قۇراتىندىقتارىن جاريا ەتتى. بۇل تۋرالى «رەيتەر» اگەنتتىگى اقپار تاراتتى. ولاردىڭ مالىمدەمەسىندە توپ وكىلدەرى بۇكىل الەمدەگى يسلاميستەردى حاليفاتقا سەنىمدىلىك تانىتۋعا شاقىردى.
وسىلايشا, «يراك پەن لەۆانتتىڭ يسلام مەملەكەتى» بۇدان بىلاي قاراي ءوزىن «يسلام مەملەكەتى» دەپ اتاۋ نيەتى بار ەكەنىن ءبىلدىردى. حاليفاتتىڭ بيلەۋشىسى اتالعان توپتىڭ سەركەسى ءابۋ باكار ءال-باعدادي دەپ جاريالاندى. «يراك پەن لەۆانتتىڭ يسلام مەملەكەتى» قارۋلى جاساعى ماۋسىم ايىنىڭ باسىندا يراكتا شابۋىلعا كوشىپ, وسى ەلدىڭ سولتۇستىك-باتىسىنا باقىلاۋ ورناتقان ەدى. ولاردىڭ ەندىگى ماقساتى – باعداتتى شابۋىلداۋ.
اۋعانستاندا اجال قۇشا جازدادى
رۋمىنيا پرەمەر-ءمينيسترى ۆيكتور پونتا اۋعانستانعا ساپارى كەزىندە قارۋلى جاساق اتقىلاعان زىمىران وقتارىنىڭ استىندا قالدى. لاڭكەستەر ناتو-نىڭ كانداگار پروۆينتسياسىنداعى اسكەري بازاسىنا شابۋىل جاساعان بولاتىن.
سول كەزدە بۋحارەستەن كەلگەن دەلەگاتسيا رۋمىنيا كونتينگەنتىن اۋعانستاننان شىعارۋعا ارنالعان شارالارعا قاتىسىپ جاتقان ەدى. دەلەگاتسيا قۇرامىندا پونتادان بولەك رۋمىنيانىڭ قورعانىس ءمينيسترى ميرچا دۋشا مەن ۆيتسە-پرەمەر گابريەل وپريا بار. شەكپەندىلەر امالسىزدان بۋنكەرگە تۇسۋگە ءماجبۇر بولعان. ءبىر جاقسىسى, شابۋىلدان ەشكىم دە زارداپ شەكپەگەن. بۋحارەست ءوزىنىڭ اسكەرىن اۋعانستانعا بىتىمگەرلىك ميسسياسى اياسىندا 2002 جىلى اتتاندىرعان بولاتىن. قازىرگى كەزدە اۋعانستاندا شامامەن 2000 اسكەري قىزمەتشى قالىپ وتىر.
ءتورت كۇندە 160 تۇتقىن ولتىرىلگەن
«يراك پەن لەۆانتتىڭ يسلام مەملەكەتى» قارۋلى جاساعى يراكتىڭ تيكريت قالاسىندا سوڭعى ءتورت كۇن ىشىندە كەم دەگەندە 160 تۇتقىندى ولتىرگەن. بۇل تۋرالى حالىقارالىق قۇقىق قورعاۋ ۇيىمىنىڭ بايانداماسىندا ايتىلادى.
قۇقىق قورعاۋشىلار سپۋتنيكتەردەن الىنعان مالىمەتتەردى ساراپتاي كەلە, يراكتىڭ ەكى قالاسىندا 11-14 ماۋسىم ارالىعىندا تۇتقىنداعىلاردى جاپپاي ءولتىرۋ جۇزەگە اسىرىلعان دەگەن قورىتىندى جاساعان. ولاردىڭ حابارلامالارىندا قۇرباندىقتار سانى ايتارلىقتاي كوپ بولۋى دا مۇمكىن دەلىنىپ وتىر. ويتكەنى, قازىرگى كەزدە تولىقتاي تەكسەرۋ جۇرگىزۋ مۇمكىن ەمەس كورىنەدى.
ينتەرنەت ماتەريالدارى نەگىزىندە ازىرلەندى.
