بەس جىلدان بەرى اتالعان ءبىلىم ورداسى ەستۋ قابىلەتى ناشار بالالارعا ارنالعان وبلىستىق مەكتەپ-ينتەرناتىمەن ىنتىماقتاستىقتا. NIS وقۋشىلارى اپتا سايىن كەلىپ, ولارعا اعىلشىن ءتىلىن ۇيرەتەدى.
– 2019 جىلى مەكتەپ-ينتەرنات پەن NIS اراسىندا ىنتىماقتاستىق تۋرالى مەموراندۋمعا قول قويىلدى. وسى مەموراندۋم اياسىندا «جۇرەكتەن جۇرەككە» قوعامعا قىزمەت كورسەتۋدىڭ الەۋمەتتىك جوباسى جۇمىس ىستەيدى. اپتاسىنا ءبىر رەت ءبىزدىڭ ەرىكتىلەر ءار ءتۇرلى جاستاعى ءتورت توپقا ساباق بەرەدى, – دەيدى پەداگوگ-كۋراتور ايگەرىم ەركىنباەۆا.
«جاقسىلىق جاساۋعا ۇمتىل» – NIS-تەگى ءار وقۋشىنىڭ ۇرانى. وسى كۇنگە دەيىن وننان استام قوعامعا قىزمەت ەتۋ جوبالارى ءوز ناتيجەسىن كورسەتىپ كەلەدى. بۇل جوبالاردىڭ وزەكتىلىگى مەن قۇندىلىعى بارشاعا تۇسىنىكتى.
– «مەن ءۇشىن الەۋمەتتىك جوبالاردىڭ ماڭىزى زور. ويتكەنى ۆولونتەرلىك باعىت وقۋشىلاردىڭ بويىندا ادامگەرشىلىك دۇنيەتانىمىن قالىپتاستىرۋعا سەپتىگىن تيگىزىپ, مۇقتاج جاندارعا كومەك كورسەتۋگە نەمەسە قوعامنىڭ نازارىن وتكىر الەۋمەتتىك ماسەلەلەرگە اۋدارۋعا سەپتىگىن تيگىزەرى ءسوزسىز, – دەيدى 11-سىنىپ وقۋشىسى توميريس قاسىموۆا.
قۇندىلىقتىڭ جارقىن مىسالى رەتىندە قوعامعا قىزمەت ەتۋدىڭ العاشقى تاجىريبەسىن مەكتەپ جىلدارىندا العان تۇلەكتەر قازىر دە ۋنيۆەرسيتەت قابىرعاسىندا ەرىكتى قىزمەتىن جالعاستىرۋدا.
جەتىسۋ وبلىسى
