فۋتبول. الەم چەمپيوناتى. كوستا-ريكا سەگىزدىككە كىردى

استانا. 29 ماۋسىم. بۇگىن ءتۇن ورتاسى اۋا برازيليادا ءوتىپ جاتقان الەم چەمپيوناتىنىڭ 1/8 فينالىندا كوستا-ريكا جانە گرەكيا كوماندالارى ۇشىراستى. ماتچتىڭ نەگىزگى ۋاقىتى 1:1 ەسەبىمەن اياقتالىپ, ويىننان كەيىنگى پەنالتيدە كوستاريكالىقتار 5:3 ەسەبىمەن العا شىقتى. بۇل تۋرالى egemen.kz حابارلادى. بۇگىنگى ەكى قارسىلاستىڭ قاي-قايسىسىنىڭ دا شيرەك فينالعا شىعۋى ءدال قازىرگى تاڭدا تاڭ قالارلىق نارسە بولىپ كورىنەر ەدى. بۇعان گرەكتەردىڭ توپتا ەشقانداي ارتىق ويىن كورسەتە الماعانى سەبەپ بولسا, كوستاريكالىقتاردىڭ بۇل قاتاردان كورىنۋىنىڭ ءوزى ايتارلىقتاي جاڭالىق ەكەنى جاسىرىن ەمەس. كوستا-ريكا – گرەكيا 1:1 (0:0). پەنالتي: 5:3. 30 ماۋسىم. رەسيفي. «ارەنا پەرنامبۋكۋ» ستدايونى. 41 242 كورەرمەن. تورەشى - بەندجامين ۋيليامس (اۆستراليا). كوستا-ريكا: كەيلور ناۆاس, كريستيان گامبوا (دجونني اكوستا, 77), وسكار دۋارتە, دجانكارلو گونسالەس, ميحاەل ۋمانيا, جۋنيور دياس, برايان رۋيس, سەلسو بورگەس, ەلتسين تەحەدا (حوسە كۋبەرو, 66), كريستيان بولانوس (رەندالل برەنەس, 83), جوەل كەمپبەلل. گرەكيا: ورەستيس كارنەزيس, ۆاسيليس توروسيديس, كوستاس مانولاس, سوكراتيس پاپاستاتوپۋلوس, حوسە ولەباس, ياننيس مانياتيس (كوستاس كاتسۋرانيس, 78), گەورگيوس كاراگۋنيس, اندرەاس ساماريس (كوستاس ميتروگلۋ, 58), ديميتريوس سالپينگيديس (تەوفانيس گەكاس, 69), گەورگيوس ساماراس, لازاروس كريستودۋلوپۋلوس. گولدار: برايان رۋيس (52), سوكراتيس پاپاستاتوپۋلوس (90+1). پەنالتي سوققاندار: سەلسو بورگەس, برايان رۋيس, دجانكارلو گونسالەس, جوەل كەمپبەلل, ميحاەل ۋمانيا – كوستاس ميتروگلۋ, لازاروس كريستودۋلوپۋلوس, حوسە ولەباس. پەنالتي سوعا الماعان: تەوفانيس گەكاس (قاقپاشى قايتاردى). ەسكەرتۋلەر: وسكار دۋارتە (42), ەلتسين تەحەدا (48), وسكار گرانادوس (56, زاپاستا), برايان رۋيس (70), كەيلور ناۆاس (90) - اندرەاس ساماريس (36), كوستاس مانولاس (72). الاڭنان قۋىلدى: وسكار دۋارتە (66). شىنى كەرەك, ورتالىق امەريكا ەلىنىڭ كومانداسى بىرىنشىلىك الدىندا توپتاعى اۋتسايدەر سانالعان بولاتىن. ال شاعىن مەملەكەتتىڭ فۋتبولشىلارى سول بولجامداردىڭ ءبارىنىڭ ك ۇلىن كوككە ۇشىرىپ, توپتا ءبىرىنشى ورىندى جەڭىپ الدى. ونىڭ الدىنا يتالياندار مەن اعىلشىندار تۇسە المادى. ولار ۋرۋگۆاي مەن يتاليانى ۇتىپ, انگليامەن تەڭ وينادى. ەندى تاپ وسى كوماندا شيرەك فينالدا گوللانديا قۇراماسىمەن جۇر قۇراعالى وتىر. ال مۇنداي جەتىستىككە جەتۋ ءۇشىن كوستا-ريكا جاساعى گرەكيا قۇراماسىمەن ويىننىڭ سوڭىندا بەلگىلەنگەن پەنالتيدە وزىپ شىقتى. ول ەكىنشى تايمنىڭ ورتاسىنا قاراي ءبىر ويىنشىسىنان ايرىلىپ قالعانىنا قاراماستان, تەڭ ناتيجەگە قول جەتكىزدى. ويىن اسا ساپالى بولا قويعان جوق. بىراق ونداعى تەكەتىرەس وتە كۇشتى بولدى. تارتىس, اسىرەسە, كوستا-ريكا كومانداسى 52-مينۋتتا برايان رۋيس گول سوققاننان كەيىن ءتىپتى ءورشىپ كەتتى. مۇنىڭ سوڭى امەريكالىقتاردىڭ قاتارى ازايىپ قالۋىنا ۇلاستى. مىنە, وسىدان باستاپ ولار الاڭدا ناعىز ەرلىك كورسەتۋگە كىرىستى. ماتچتىڭ نەگىزگى ۋاقىتى بىتكەنگە دەيىن 1:0 دەگەن ەسەپتى دە ساقتاي ءبىلدى. الايدا, قوسىمشا ۋاقىتتا گرەك سوكراتيس پاپاستاتوپۋلوس ەسەپتى تەڭەستىرىپ ۇلگەردى. وسىنىڭ ناتيجەسىندە وۆەرتايمعا كەزەك كەلدى. مۇندا دا باسىمدىلىقتارىن تانىتا الماعان قارسىلاستار 11 مەترلىككە جۇگىندى. بۇل سەريا ويىندا جالپى باسىمدىلىق كورسەتكەن كوستا-ريكانىڭ باعىن جاندىردى. دامير قوجامقۇل. دەرەككوز: egemen.kz. فوتو: Sportbox.ru.