شەشۋشى كەزەڭ

برازيليادا ءوتىپ جاتقان الەم چەمپيوناتىنىڭ 1/8 فينالى باستالدى بۇگىن توپتىق كەزەڭنەن ءوت­كەندەر 1/8 فينالدا كەزدەسەدى. بۇل كەزەڭگە ەڭ ءبىرىنشى بولىپ «ۆ» توبىنداعى گوللانديا مەن چيلي قۇرامالارى شىققان بولاتىن. ەكىنشى بولىپ «ا» توبىنىڭ وكىلدەرى برازيليا مەن مەكسيكا جولداما الدى. ەندى ەرەجەگە سايكەس, وسى توپتاردا ءبىرىنشى جانە ەكىنشى ورىن العان برازيليا مەن چيلي, گوللانديا مەن مەكسيكا كوماندالارى كەزدەسەدى. سودان كەيىن كولۋمبيا – ۋرۋگۆاي قۇرامالارىنىڭ جاسىل الاڭداعى ايقاسى وتەدى. كەيبىر ساراپشىلار 1/8 فينالداعى ويىن­داردىڭ ىشىندە ەڭ قىزىقتى جانە تارتىستى كەزدەسۋ وسى كومان­دالار­دىڭ اراسىندا وتەدى دەۋدە. بۇل ماتچتا جەڭگەن كوماندا شي­رەك فينالدا برازيليا –چيلي قۇرا­مالارىنىڭ اراسىندا وتەتىن كەزدەسۋدىڭ جەڭىمپازىمەن كۇش سىناسادى. وسىلاردان باسقا 1/8 فينالدا فرانتسيا – نيگەريا ماتچى وتەدى. فرانتسيا ءوز توبىنان ءبىرىنشى ورىن الىپ كەلەسى اينالىمعا شىقسا, افريكالىقتار ەكىنشى ورىنمەن جولداما الدى. بۇل كوماندالاردىڭ اراسىنداعى ويىن دا قىزىقتى بولاتىنى ءسوزسىز. راس, العاشقى كەزدە ديدە دەشام قۇراماسىنىڭ ويىنىنا قاراپ, فرانتسيا الىسقا بارمايدى دەگەندەر دە بولعان. الايدا, فرانتسيا توپتىق كەزەڭنىڭ سوڭعى ماتچتارىندا جاقسى ويناپ, قازىر ەندى چەمپيوندىق بولماسا دا جۇلدەگە تالاسا الاتىن كوماندا ەكەنىن كورسەتىپ وتىر. ال «G» توبىنان 1/8 فينالعا گەرمانيا مەن اقش شىقتى. بۇل توپتاعى سوڭعى ماتچتار  گەرمانيا مەن اقش جانە پورتۋگاليا مەن گانا اراسىندا ءوتتى. وندا 1/8 فينالعا شىعۋ ءۇشىن گاناعا جەڭىس كەرەك بولسا, اقش پەن گەرمانياعا تەڭ ويناسا دا بولاتىن ەدى.  بىراق, افريكالىقتار ماقساتىنا جەتە المادى. ولار پورتۋگاليادان 2:1 ەسەبىمەن ۇتىلىپ قالدى. ال گەرمانيا قارسىلاستارىن 1:0 ەسەبىمەن ۇتىپ, 7 ۇپايمەن ءبىرىنشى ورىن الىپ, كەلەسى اينالىمعا شىقتى. 1/8-گە جەڭىلسە دە 4 ۇپايمەن اقش تا جولداما الدى. ەندى گەرمانيا كەلەسى ويىنىن الجيرگە قارسى وتكىزەدى. وسى جەردە ءالجيردىڭ ءوز تاريحىندا تۇڭعىش رەت 1/8 فينالعا شىققانىن ايتۋ كەرەك. ولار الەم چەمپيوناتىنا نەبارى ءۇش رەت قانا قاتىسقان. ءبىرىنشى رەت 1982 جىلى, سودان كەيىن 1986 جىلى ويناعان. ال سوڭعى رەت 2010 جىلى باعىن سىناپ كورگەن. وسى ۇشەۋىندە دە الجير توپتىق تۋرنيردەن شىعا الماعان. ەندى, مىنە, الجير العاش رەت پلەي-وففقا جولداما الىپ وتىر. بۇل جولداما دا ولارعا وڭاي كەلمەدى. ولار سوڭعى كەزدەسۋدە رەسەيمەن ويناپ, 1:1 ەسەبىمەن تەڭ ءتۇستى. ەگەر الجير جەڭىلگەندە 1/8-گە رەسەي شىعاتىن ەدى. وسى توپتاعى بەلگيا مەن كورەيا اراسىندا وتكەن ويىندا «قىزىل پەرىلەر» 1:0 ەسەبىمەن جەڭىسكە جەتتى. ءسويتىپ, كورەيانىڭ جولىن بوگەپ, ولارعا ەشقانداي مۇمكىندىك قالدىرمادى. بەلگيانىڭ كەلەسى قارسىلاسى – اقش قۇراماسى. ال ارگەنتينا 1/8 فينالدا شۆەيتساريامەن كەزدەسەدى. وسى ويىندا جەڭگەن كوماندا بەلگيا – اقش ماتچى­نىڭ جەڭىمپازىمەن وينايدى.  سول سياقتى گەرمانيا – الجير كەزدەسۋىنىڭ جەڭىمپازى شيرەك فينالدا فرانتسيا – نيگەريا ماتچىندا جەڭگەن قۇرامامەن باق سىناسادى. ال بيىلعى الەم چەمپيوناتىنىڭ سەنساتسياسى دەپ سانالاتىن كوستا-ريكا كومانداسى 1/8 فينالدا گرەكيامەن شيرەك فينالدىق جولدامانى ساراپقا سالادى. ەگەر وسى ويىندا كوستا-ريكالىقتار ۇتسا, ولار تۇڭعىش رەت ¼ فينالعا شىعاتىن بولادى. بىراق, گرەكيا كومانداسىن دا ەسەپتەن شىعارا المايمىز. قازىر گرەكتەر ءسۇرىنىپ, جىعىلىپ جۇرسە دە كەلەسى اينالىمعا شىعۋدىڭ جولىن تاباتىن جولى بولعىش كوماندا رەتىندە كورىنىپ ءجۇر. بۇل ويىننىڭ جەڭىمپازى گوللانديا – مەكسيكا ماتچىندا ۇتقان كوماندامەن كەزدەسەدى. 1/8 فينالدىڭ ويىندارى 28 ماۋسىم مەن 2 شىلدە كۇندەرى وتسە, شيرەك فينال 4-7 شىلدە كۇندەرى وتەدى. وسىلايشا چەمپيوناتتىڭ كەلەسى كەزەڭىنە ەۋروپانىڭ – 6, وڭتۇستىك امەريكانىڭ – 5, ورتالىق جانە سولتۇستىك امەريكانىڭ – 3, افريكانىڭ 2 كومانداسى شىقتى. ال ازيادان بىردە-ءبىر كوماندا جوق. داستان كەنجالين, «ەگەمەن قازاقستان».