استانادا «الەم» بالەتىنىڭ پرەمەراسى ءوتتى
كەشە مەملەكەت باسشىسى نۇرسۇلتان نازارباەۆ بەيبىتشىلىك جانە كەلىسىم سارايىندا وتكەن ءبىر اكتىلى «الەم» بالەتىنىڭ پرەمەراسىن تاماشالادى. بۇل – «Astana Ballet» ۇجىمى رەپەرتۋارىنداعى زاماناۋي حورەوگرافيا ستيلىندە قويىلعان العاشقى بىرەگەي قويىلىم. حالىقتىق جانە زاماناۋي حورەوگرافيانىڭ كلاسسيكالىق داستۇرلەرى مەن ەڭ سوڭعى ۇردىستەرىن شەبەر ۇيلەستىرە بىلگەن «Astana Ballet» حورەوگرافيالىق ۇجىمى قازاقستان پرەزيدەنتىنىڭ جەكە ۇسىنىسى بويىنشا, 2012 جىلدىڭ كۇزىندە قۇرىلعان بولاتىن. «Astana Ballet»-ءتىڭ اتقارۋشى ديرەكتورى ۆالەري كۇزەمباەۆ بۇل ۇجىم وسى ۋاقىتتان بەرى ءوزىنىڭ ەشكىمگە ۇقسامايتىن, قايتالانباس «بەينەسىن» قالىپتاستىرۋ ءۇشىن تالماي ىزدەنىس ۇستىندە جۇرگەنىن ايتادى. «ءبىر جىلدان استام مەرزىمدە تىنىمسىز ەڭبەك, قازاقستان مەن شەتەلدەگى كورەرمەن الدىنداعى ءساتتى ونەر كورسەتۋلەر ۇجىمنىڭ ءبىرتۇتاس, ءبىر اكتىلى بالەتتى ساحنالاۋعا دايىن ەكەندىگىن انىق كورسەتتى. الايدا, ءبىزدىڭ يدەيالارىمىزدى جۇزەگە اسىراتىن جانە وزىندىك قولتاڭباسىن ەنگىزە الاتىن حورەوگرافتى ىزدەۋ ۇزاققا سوزىلدى. كەيىن كوركەمدىك جەتەكشىنىڭ تاڭداۋى ءماسكەۋلىك قويۋشى-حورەوگراف نيكيتا دميتريەۆسكيگە ءتۇستى. ول, ءبىزدىڭ پايىمداۋىمىزشا, قازىرگى زامانعا ساي وتە تارتىمدى جانە بىلىكتى بالەتمەيستەردىڭ ءبىرى. ال قازىرگى تاڭدا, ءبىزدىڭ ۇجىم ءۇشىن دامۋ, جاڭا پىشىندەردى ويلاپ تابۋ, وزگەشە باعىتتاردى بايقاپ كورۋ, زاماناۋي بي ونەرىن كورسەتە وتىرىپ, كورەرمەنمەن نازىك بايلانىس ورناتۋ, ونەرىمىزگە قازاق حالقىنىڭ تەك وزىنە ءتان ۇلتتىق بوياۋىن ەنگىزۋ ماڭىزدى. ءبىزدىڭ نەگىزگى كوزدەگەن ماقساتىمىز, مىنە, وسى. مۇنى ءبىر اكتىلى «الەم» بالەتىنىڭ ونە بويىنان بارىنشا اڭعارتۋعا تىرىستىق. باعالاۋ – كورەرمەننىڭ ەنشىسىندەگى دۇنيە», دەيدى ول بۇل تۋراسىندا. سونىمەن, «الەم» دەگەن اتپەن قويىلعان بالەتتىڭ وزەگى «جاننىڭ تۋى», «ونىڭ ءتۇرلى سىناقتان ءوتۋى», «ز ۇلىمدىق پەن ىزگىلىكتىڭ شايقاسى», «قاراڭعى مەن جارىقتىڭ تارتىسى», وسىلاردىڭ ناتيجەسىندە «ماحاببات پەن سۇلۋلىق الەمىنىڭ ورناۋى» سىندى ويلار مەن يدەيالاردى كورسەتۋگە سايادى. بۇل ورايدا, كورەرمەن اتالعان قويىلىمدى ساحنالاۋ باعىتىندا اۋقىمدى جۇمىستاردىڭ اتقارىلعانىن بىردەن تۇيسىنەتىندەي. بۇعان بيشىلەردىڭ ايرىقشا شەبەرلىگى, ىزدەنىس جولىنداعى ەڭبەكتەرى – دالەل. سەبەبى, حورەوگرافيا سالاسىنداعى سونى الەمدىك ۇردىستەر مەن قازاق بي ونەرىنىڭ, مادەنيەتىنىڭ, ءداستۇرلى سازىنىڭ ۇتىمدى سينتەزدەلۋى, ءسوزسىز, «Astana Ballet» ۇجىمى دەڭگەيىنىڭ جوعارى ەكەندىگىن بايقاتادى. ەتنو-كومپوزيتور بۋلات گافاروۆتىڭ, ليبرەتتو اۆتورى باقىت قايىربەكوۆتىڭ, رەسەيدىڭ مۋلتيمەديا جانە كومپيۋتەرلىك گرافيكا سالاسىنىڭ جەتەكشى ماماندارىنىڭ ءبىرى لەونيد ءباسيننىڭ ىزدەنىستەرى مەن ەڭبەكتەرى دە ابدەن, باعالاۋعا تۇرارلىق. جالپى العاندا, بىرەگەي قويىلىمنىڭ كوپ كوڭىلىنەن شىققانى انىق اڭعارىلىپ تۇردى. قويىلىم سوڭىندا ونەر ۇجىمىنا ەلباسىنىڭ اتىنان ىقىلاس گ ۇلى تابىس ەتىلدى. ءلايلا ەدىلقىزى, «ەگەمەن قازاقستان».
