28 ماۋسىمدا قاسيەتتى رامازان ايى باستالادى

استانا. 27 ماۋسىم. بيىل ورازا 28 ماۋسىمدا باستالىپ, ول 30 كۇنگە جالعاسادى. ال 28 شىلدەدە ورازا ايت مەيرامى بولادى. بۇل تۋرالى muftiyat.kz حابارلادى. قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى مايامەروۆ بارشا جاماعاتقا رامازان ايىنىڭ باستالۋىنا وراي قۇتتىقتاۋ ءسوزىن جولدادى. باس ءمۇفتي: «مەيىرىمدى, راقىمدى اللانىڭ اتىمەن باستايمىن! بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرشىلىك ايتامىز. قۇرمەتتى مۇسىلمان باۋىرلار! الەم مۇسىلماندارى مۇباراك رامازاندا اللانىڭ راقىمىنا بولەنۋدى ءۇمىت ەتىپ, ساۋابى مول ىزگى امالداردى اتقارۋعا نيەتتى. سىزدەردى ءبىر اي بويى جالعاساتىن ۇلىق رامازان ايىنىڭ كەلۋىمەن قۇتتىقتايمىن! اللانىڭ راقىمى مەن كەشىرىمىنە بولەيتىن, ءار يگى امال ەسەلەنىپ جازىلاتىن رامازاندى اسىعا كۇتكەن بارشامىزعا بۇل قاسيەتتى اي قۇتتى بولسىن!» – دەدى. جولدىباي بازار. دەرەككوز: muftiyat.kz. فوتو: my.mail.ru.