ومىرگە جولداما

قوستاناي وبلىسىندا بيىل الەۋ­مەتتىك جوبالار ومىرگە جولداما الاتىن بولادى. ERG (Eurazian Resources Group) كومپانياسىنىڭ باس اتقارۋشى ديرەكتورى بەنەديكت سوبوتكا مەن قوستاناي وبلىسىنىڭ اكىمى نۇرالى سادۋاقاسوۆ وبلىس وڭىرىندە 2014 جىلعى الەۋمەتتىك جوبالاردى جۇزەگە اسىرۋ جونىندەگى مەموراندۋمعا قول قويىلدى. وتكەن جىلدىڭ اياعىندا ENRC-ءدى (Eurasian Natural Resources Corporation PLC) ساتىپ العان ERG كومپانياسى ءوز كاسىپورىندارى ورنالاسقان ءوڭىر­لەرمەن كوپ جىلدىق ارىپتەستىك ءداستۇرىن جالعاستىرىپ وتىر. بيىل وبلىستىڭ دامۋىنا سالعان توپتىڭ قارجىسى 850 ميلليون بولىپ وتىر. مەموراندۋم اياسىندا جۇزەگە اسىرىلاتىن الەۋمەتتىك جانە مادەني جوبالاردى قارجىلاندىرۋ «ENRC كومەك» كورپوراتيۆتىك قورى مەن ERG-ءدىڭ ەنشىلەس كومپانياسى بولىپ تابىلاتىن ENRC قۇرامىنداعى «سوكولوۆ-سارىباي كەن وندىرىستىك بىرلەستىگى» اكتسيونەرلىك قوعامى ارقىلى جۇرگىزىلەدى. – جەتى جىلدىڭ ىشىندە قوستاناي وبلىسى اكىمدىگىمەن 7 ميلليارد تەڭگەگە مەموراندۋم جاسالدى. تەك وتكەن جىلدىڭ وزىندە جۇمسالعان قاراجات 1 ميلليارد تەڭگەدەن استى. سونىڭ ارقاسىندا وبلىستا جىلۋ جەلىلەرى, سپورت كەشەنى, مەشىت بوي تۇزەدى. دەنساۋلىق ساقتاۋ سالاسىنا, مادەنيەتكە, سپورتقا كومەك بەرىلدى. ال ەندى جاڭا مەموراندۋم ەلباسىمىزدىڭ جولداۋىندا ايتقان الەۋمەتتىك ساياساتتى جۇزەگە اسىرۋعا جۇمسالادى, – دەدى «سسكوب» اكتسيونەرلىك قوعامىنىڭ پرەزيدەنتى مۇحامەدجان تۇرداحۋنوۆ. سونىمەن, بيىلعى مەموراندۋم شەڭبەرىندە وبلىستا ماڭىزدى جوبالار جۇزەگە اسپاق. مونوقالالاردى دامىتۋ باعدارلاماسى بويىنشا ارقالىق قالاسىن كوركەيتۋگە, وبلىستىڭ مەديتسينالىق جانە ءبىلىم بەرۋ مەكەمەلەرىنە كومەك كورسەتىلەدى. قىزىلجار كەنتىندەگى كيروۆ مەكتەبى جوندەلەدى. نوۆو­ترويتسك اۋىلىندا مادەنيەت ءۇيى قالپىنا كەلتىرىلمەك. مەموراندۋمعا قول قويۋ راسىمىندە سويلەگەن ERG كومپانياسى ديرەكتورلار كەڭەسىنىڭ توراعاسى الەكساندر ماشكەۆيچ توپتىڭ قۇرىلعانىنا 20 جىل, كەن الىبى سوكولوۆ-سارىباي كەن ءوندىرۋ بىرلەستىگىنە 60 جىل تولاتىنىن تىلگە تيەك ەتتى. – جيىرما جىل ىشىندە وڭىرلەردەگى الەۋمەتتىك, مادەني جوبالاردى قولداۋ كومپانيانىڭ كورپوراتيۆتىك ساياساتىنىڭ باسىم باعىتتارىنىڭ ءبىرى بولدى. ERG كومپانياسى وسى ءداستۇردى جالعاستىرۋدى ماقسات تۇتىپ, قازاقستان كومپانيالارى اراسىنداعى بيزنەستىڭ الەۋمەتتىك جاۋاپكەرشىلىگى جونىندەگى كوشباسشى ۇستانىمىن كۇشەيتە تۇسەدى. ءبىز ءوز ادامدارىمىزدىڭ يگىلىگى ءۇشىن الەۋمەتتىك جوبالارعا كومەك بەرەمىز. مىسالى, رۋدنىي قالاسىنداعى پەرزەنتحاناعا دارىگەرلەردىڭ وتىنىشىمەن مەديتسينالىق زاماناۋي قۇرال-جابدىق الۋعا, تۇرعىنداردىڭ وتىنىشىمەن جاڭا شىركەۋ سالىپ بەرۋگە كەلىسىم بەردىك. مۇنىڭ بارلىعى دا بيىلعى مەموراندۋمنان تىس جۇزەگە اسادى, – دەدى الەكساندر ماشكەۆيچ. وبلىس اكىمى نۇرالى سادۋاقاسوۆ جەتى جىل ىشىندە بيزنەستىڭ ارىپتەستىگى ارقاسىندا وبلىستا وزەكتى دەگەن الەۋمەتتىك جوبالاردىڭ حالىق يگىلىگىنەن اينالعانىن ايتا كەلىپ, مەموراندۋمعا قول قويعان توپ جەتەكشىلەرىنە العىس سەزىمىن ءبىلدىردى. ءنازيرا جارىمبەتوۆا, «ەگەمەن قازاقستان». قوستاناي.