ينفوگرافيكانى جاساعان امانگەلدى قياس, «EQ»
قازىرگى كۇنى تولەم كارتاسىن قولدانۋشىلار اراسىندا قولما-قول اقشاسىز وپەراتسيالاردىڭ ەڭ تانىمال ءتاسىلى – ءموبيلدى بانكينگتى پايدالانۋ. بىلتىر وپەراتسيالاردىڭ جالپى قۇرىلىمىنداعى ونلاين ترانزاكتسيا ۇلەسى 64,6%-دى قۇرادى. كۇن سايىن ءاربىر ازامات تسيفرلى بانكينگ ارقىلى ورتا ەسەپپەن 234,7 ملرد تەڭگەدەن اسا سوماعا 15,2 ميلليونعا جۋىق ترانزاكتسيا جۇرگىزەدى ەكەن. سونىمەن قاتار التى ءجۇز مىڭعا تارتا كاسىپكەردىڭ 92,5 پايىزى QR كود ارقىلى تولەم جۇرگىزگەن.
قازاقستاندا تولەم كارتالارىن 18 بانك پەن «قازپوچتا» اق جۇزەگە اسىرادى. 2023 جىلدىڭ اقپانىنداعى جاعداي بويىنشا بانكتەردىڭ اينالىمداعى كارتالار سانى – 65,9 ملن. كەڭىنەن تارالعان دەبەتتىك كارتالاردىڭ ۇلەسى – 78,9%, نەسيەلىك كارتالار ۇلەسى 17,9% بولدى. قاڭتار ايىندا قازاقستاندىق ەميتەنتتەردىڭ تولەم كارتاسى ارقىلى جۇرگىزىلگەن ترانزاكتسيالاردىڭ كولەمى 10,3 ترلن تەڭگە, سانى – 759,3 ملن. ونىڭ ىشىندە قولما-قول جاسالمايتىن ترانزاكتسيا سانى 69,2%-عا ارتىپ, 8,8 ترلن تەڭگەنى قۇراعان. تولەم كارتانى قولدانۋشىلار اراسىندا قولما-قول اقشانى الۋ وپەراتسيالارىنىڭ سانى 17,3 ملن بىرلىكتى قۇراپ, كولەمى 16,3%-عا ارتقان. قازاقستان اۋماعىندا قولما-قول اقشاسىز وپەراتسيالاردىڭ نەگىزگى ۇلەسى ءموبيلدى بانكينگ پەن POS-تەرمينالدارعا تيەسىلى بولسا, قولما-قول اقشانى بەرۋ وپەراتسيالارى بانكوماتتار ارقىلى ىسكە اسىرىلادى.
جاقىندا تاعى ءبىر پلاستيكالىق كارتا اينالىمعا ەندى. ۆتب (قازاقستان) كليەنتتەرى رەسەيلىك «مير» تولەم جۇيەسىنىڭ پلاستيكالىق كارتاسىن رەسىمدەي الادى. ونى شىعارۋعا ءوتىنىم بەرۋ ەلىمىزدىڭ 17 وڭىرىندەگى بانكتىڭ كەز كەلگەن بولىمشەسىندە قولجەتىمدى.
اتالعان بانك وتكەن جىلدىڭ جەلتوقسان ايىنان باستاپ «مير» تولەم جۇيەسىنىڭ تسيفرلى كارتاسىن ىسكە قوستى. ەندى بانكتىڭ رەسپۋبليكامىزداعى كليەنتتەرى ونىڭ فيزيكالىق نۇسقاسىن راسىمدەي الادى. كارتانى وزىنە-ءوزى قىزمەت كورسەتۋ قۇرىلعىلارى مەن بانك كاسسالارى, Qiwi جانە Yurta تەرمينالدارى ارقىلى, ءموبيلدى قوسىمشاداعى ەسەپ-ايىرىسۋ شوتىنان, باسقا «مير» كارتاسىنان نەمەسە دەرەكتەمەلەر بويىنشا وزگە بانكتىڭ شوتىنان اۋدارۋ ارقىلى تولىقتىرۋعا بولادى.
