«بۇل ەلىمىزدىڭ قارجى نارىعىندا بولىپ وتىرعان تاريحي ءسات. Bereke Bank-ءتى سانكتسيادان شىعارۋ ءۇشىن اكتسيونەر, ۇلتتىق بانك, رەتتەۋشى ورگان مەن ىشكى ىستەر مينيسترلىگى جانە ەلىمىزدىڭ اقش-تاعى ەلشىلىگى ۇلكەن قولداۋ كورسەتتى. بانك كەزىككەن قيىندىقتارعا توتەپ بەرىپ, ءوز كليەنتتەرى مەن سەرىكتەستەرىنىڭ الدىندا بەلگىلەنگەن مىندەتتەمەلەرىن ورىنداپ, ەلىمىزدەگى ۇزدىك بانكتەردىڭ قاتارىنا ەنگەن ەدى. بۇل قارجى ينستيتۋتى قىزمەتكەرلەرىنىڭ كاسىبي بىلىكتىلىگى مەن سەنىمدىلىگىنىڭ تاعى ءبىر دالەلى», دەيدى بانكتىڭ باسقارما توراعاسى اندرەي تيمچەنكو.
بانك سانكتسيا كەزىندە دە قىزمەتىن توقتاتپاۋعا تىرىستى. شەكتەۋلەر كوبىنەسە ۆاليۋتالىق وپەراتسيالارمەن, ونىڭ ىشىندە دوللار جانە ەۋرومەن جاسالاتىن وپەراتسيالارعا, كوررەسپوندەنتتىك قاتىناستارعا جانە شەتەلدىك سەرۆيستەرگە بايلانىستى بولدى.
جىلدىڭ باسىندا بانك پرۋدەنتسيالدىق نورماتيۆتەرگە سايكەس, كاپيتالدىڭ جەتكىلىكتىلىك كوەففيتسيەنتىن تەڭەستىرە وتىرىپ, تۇگەلگە جۋىق نەگىزگى كورسەتكىشتەرىن جاقسارتقان. باسقارما توراعاسى كەلەشەكتە بانك قىزمەتىنىڭ ودان ءارى دامۋىنا جانە نىعايۋىنا بارىنشا كۇش سالاتىندىعىن ايتتى.
بۇگىندە Bereke Bank شوتتاردان اقشا شەشۋ, ولاردى تولىقتىرۋ وپەراتسيالارىنىڭ سپەكترىن, بولشەك كليەنتتەر مەن كورپوراتيۆتىك بيزنەستىڭ بارلىق سەگمەنتى ءۇشىن قارجى ونىمدەرىن, سەرۆيستەردى, تاۋارلار مەن قىزمەت اقىسىن تولەۋ وپەراتسيالارىن, ۇلتتىق جانە شەتەل ۆاليۋتاسىنداعى اقشا اۋدارىمدارىن, بانكوماتتار ارقىلى جۇرگىزىلەتىن وپەراتسيالاردى ۇسىنىپ وتىر. قىزمەتتەر جەكە تۇلعالار ءۇشىن «B-Bank» جانە زاڭدى تۇلعالارعا ارنالعان «B-Business» ءموبيلدى قوسىمشالارىندا قولجەتىمدى. قازىر بانكتىڭ ەل اۋماعىندا 18 فيليالى مەن 111 قۇرىلىمدىق بولىمشەسى بار.
جالپى, قازاقستانداعى ءۇش بىردەي رەسەيلىك ەنشىلەس بانك سانكتسيا تۇزاعىنا ءىلىندى. ولار – «سبەربانك», «الفا-بانك» جانە ۆتب (قازاقستان) بانك. «الفا-بانكتى» اۋەلى «بانك تسەنتركرەديت» ساتىپ الىپ, ونى Eco Center Bank دەپ اتادى. كەيىن ونى وزىنە ءبىرجولا قوسىپ الدى. ال ۆتب-نىڭ قازاقستانداعى بانكىن ماسكەۋدەگى نەگىزگى ۆتب قوسىمشا كاپيتالداندىردى. قازىر ۆتب قازاقستان اۋماعىندا ءوز جۇمىسىن جالعاستىرىپ جاتىر. اكتيۆتەر كولەمى بويىنشا قازاقستانداعى ەكىنشى قارجى ينستيتۋتى بولىپ كەلگەن «سبەربانكتىڭ» جۇمىسىنا شەكتەۋ قويىلعاننان كەيىن ونى «بايتەرەك» حولدينگى ساتىپ العان ەدى. ۇلتتىق حولدينگ بانكتىڭ اتاۋىن وزگەرتىپ, باسشىلىق قۇرامىن جاڭالاپ, ونى اقىرى سانكتسيا تىزىمىنەن شىعاردى. الدىن الا اقپاراتتار بويىنشا جاقىن ارادا «بايتەرەك» Bereke Bank-ءتى ساتىلىمعا شىعارماق. قارجى ينستيتۋتى نارىق تالاپتارىنا سايكەس, مەملەكەت قاراۋىنان تىس دامۋعا ءتيىس دەپ سانايدى حولدينگ باسشىلىعى.
