بىردە قۇرمانعازى جولشىبايلاپ ءبىر اۋىلعا كەلىپ تۇسەدى. جالعىز ءوزى ءجۇر. ەرتىپ العان نوكەرلەرى جوق. بوتەن كەلگەن ادامدى كورسە دە ەشكىم ۇيىنە شاقىرمايدى. ءبىر كەزدە اۋىل شەتىندە تۇرعان جۇپىنى ۇيگە كوزى تۇسەدى. ەسىك الدىندا اقساقال وتىر ەكەن. جانىنا بارىپ:
- اسسالاۋماعالەيكۇم, اقساقال. مال-جان امان با؟
- ۋاعالەيكىماسسالىم. امانبىز. قاي بالاسىڭ؟
- بۇل اۋىلدان ەمەسپىن. جولشىباي جۇرگەن جانبىز.
- ءجون-ءجون. ۇيگە كىر, قۇدايى قوناقسىڭ عوي.
قۇرمانعازى ۇيگە كىردى. توردە دومبىرا ءىلۋلى تۇر. سۇراسا ءۇي يەسى ازىن-اۋلاق دومبىرا تارتاتىن ونەرى بار ەكەن. رۇقسات سۇراپ, دومبىرانى قولىنا الا كۇيدى تارتا جونەلدى. بىرىنەن سوڭ ءبىرى ءورت لاۋلاعان كۇيلەر كەتىپ جاتىر. ەن دالادا قاشقان اقساق كيىك, تۇرمەدەن قاشىپ كەلە جاتىپ, ءبىر قىزىل قايىڭنىڭ باۋىرىنان پانا تاپقان كۇيلەر, ءبىر كەزدە قايران شەشەم, امان بول شەشەم, امان بول دەپ دومبىرا بوزداي جونەلدى.
ءبىر قاراسا باعانا عانا بوس تۇرعان ۇيگە ءبىرشاما ادام جينالىپ قالىپتى. كەدەي اۋىلداسى قىسىلماسىن دەپ كورشى-قولاڭ وزىمەن بىرگە اناۋ-مىناۋىن اكەلىپ جاتىر. اقساقال دا كوڭىلى كوتەرىڭكى. وسى كەزدە قۇرمانعازى جاڭا ءبىر كۇيگە باسادى. بۇرىن ەستىلمەگەن اۋەن. كوڭىلدى ىرعاق.
- ەەەە شىراعىم, كۇيبىڭ تىرشىلىكتىڭ ءسانىن كەلتىردىڭ. راحمەت. ءوزىڭدى العاش كورسەك تە, باعانا تارتقان كۇيلەرىڭ قۇلاعىمىزدا بار. قىزىلقۇرت ەلىندە قۇرمانعازى كۇيشى بار دەپ ەستۋشى ەدىك. سول ەلگە بارىپ كەلگەن ونەرپازدار وسى كۇيلەرىڭدى كوپ تارتىپ ءجۇر. ەندى ءوزىڭدى كورگەنىمىزگە قۋانىشتىمىز. مىنا سوڭعى كۇيىڭ ەرەكشە ەكەن. بۇرىن تىڭداماپ ەدىك, – دەدى اۋىل ۇلكەنى.
- يا, اقساقال, قۇرمانعازى بولساق بولارمىز, - دەپ ءسوز جالعادى كۇيشى. – ال مىنا كۇي راسىمەن دە كوپ تارتىلماي جۇرگەن ەدى. وزدەرىڭىزدى كورىپ, قوناقجايلىقتارىڭىزعا ريزا بولدىم. وسى كۇي سىزدەرگە ارناۋىم بولسىن. كۇي اتىن وزدەرىڭىز قويىڭىزدار, – دەدى قۇرمانعازى.
- راحمەت. كۇيىڭ جارقىراپ, بالبىراپ تۇر. ەگەر قالاساڭ – «بالبىراۋىن» بولسىن, - دەدى اقساقال.
قۇرمانعازى اقىرىن عانا باسىن يزەپ, كۇيدىڭ ساعاسىن جالعاستىرا جونەلدى.
