ۇگىت-ناسيحات توبى كاسىپورىن جەتەكشىلەرى جانە جۇمىسشىلارمەن كەزدەسىپ, پارتيانىڭ ساياسي باعدارلاماسىن تانىستىرىپ, سايلاۋشىلاردىڭ تالاپ-تىلەكتەرىن تىڭدادى. جيىندا ۇجىم قىزمەتكەرلەرى يپوتەكالىق نەسيەنىڭ جوعارى پايىزدىق مولشەرلەمەسى, باسپانا كەزەگى, مۇگەدەك بالالارعا كومەك كورسەتۋ, حالىق تۇتىناتىن تاۋارلاردىڭ قىمباتتاۋى, اۋىلدان كەلگەن جاستاردى جۇمىسپەن قامتۋ سياقتى ماسەلەلەردى كوتەردى. مەكەمە قىزمەتكەرى «بىزدەن مەديتسينالىق ساقتاندىرۋعا اقشا ۇستالادى, ەمحانا, اۋرۋحانالاردا قان, ءزار تالداۋلارى تەگىن بولعانىمەن باسقا مەديتسينالىق قىزمەتتەر اقىلى جانە ۇزىن سونار كەزەك. ال ءوز تاڭداۋىمىزبەن جەكە كلينيكالاردىڭ قىزمەتىن قابىلدايتىن بولساق, وعان دا ءوز قاراجاتىمىزدى تولەيمىز. سوندا ءبىز مەديتسينالىق ساقتاندىرۋعا نە ءۇشىن جارنا تولەپ وتىرمىز؟» دەگەن ساۋالىن جولدادى.
«بۇل وتە ۇلكەن ماسەلە. ناقتى مەديتسينالىق ساقتاندىرۋعا كوشۋ قاجەتتىگىن كوپ جىل بويى ايتىپ كەلەمىز. قازىر جاسالعان الەۋمەتتىك مەديتسينالىق ساقتاندىرۋ قورى ءىس جۇزىندە «ساقتاندىرۋ» ەمەس, سالىق سياقتى. جۇمىس ىستەيتىن ادامدار ءتيىستى جارناسىن مەديتسينالىق ساقتاندىرۋ قورىنا تولەپ ءجۇر. ال سول جينالعان قاراجاتتاردى جۇمسايتىن كەزدە جارنا يەلەرىنەن سۇراماي, قوردىڭ ءوزى يگەرىپ وتىر. ءوزىنىڭ جارناسى تۇسەتىن ءاربىر ازاماتتىڭ مەديتسينالىق ساقتاندىرۋ قورىندا جەكە ەسەپشوتى بولۋعا ءتيىس. وسى ارقىلى كەز كەلگەن ادام وزىنە ەمحانا مەن دارىگەردى تاڭداۋ كەرەك. سونداي-اق كورسەتىلگەن مەديتسينالىق قىزمەتكە تولەم جاساۋ قۇزىرەتى وزىندە بولۋعا ءتيىس. سوندا قىزمەتكەرلەر ءوز مىندەتتەرىنە ۇقىپتىلىقپەن قارايدى, ال جۇمىسىنا ادال مەديتسينا قىزمەتكەرلەرى اۋىر ەڭبەگى ءۇشىن لايىقتى جالاقى الادى. ءتىپتى ناۋقاس ءوزىن ساپاسىز ەمدەگەنى ءۇشىن مەديتسينالىق ۇيىم مەن قىزمەتكەردىڭ قىزمەتتەرىنە تولەم جاساۋدان باس تارتا الاتىنداي قۇقىعى بولۋى كەرەك. ناعىز الەۋمەتتىك مەديتسينالىق ساقتاندىرۋ دەگەن وسى. شىن مانىندە ناعىز ساقتاندىرۋعا كوشسەك, ءار ادام قاي كلينيكاعا بارعىسى كەلەدى؟ كىم دارىگەردىڭ كومەگىن العىسى كەلەدى؟ مۇنىڭ ءبارى ءوز تاڭداۋىڭىزدا ءارى قولىڭىزدا جارنا سالىپ, جيناعان قاراجاتىڭىزدى ءوز دەنساۋلىعىڭىز ءۇشىن جۇمساي الۋىڭىزدا. مىنە, سول كەزدە سىزدەردە قازىرگىدەي اۋىرتپاشىلىق بولمايدى», دەدى ازات پەرۋاشەۆ.
