ەۋرازيالىق ەكونوميكالىق وداقتىڭ پايدا بولۋىنىڭ تاريحي ءمانى زور

استانا. 26 ماۋسىم. ەۋرازيالىق ينتەگراتسيا بويىنشا ارىپتەس مەملەكەتتەردىڭ ەكسپورتى 63 پايىزعا ءوستى. قازاقستان, بەلارۋس جانە رەسەي ديپلوماتيالىق ميسسيالارى باسشىلارىنىڭ بىرلەسكەن بريفينگىندە ەلىمىزدىڭ وزبەكستانداعى توتەنشە جانە وكىلەتتى ەلشىسى ءبورىباي جەكسەمبين وسىلاي دەدى. بۇل تۋرالى «قازاقپارات» حابارلادى. بريفينگتە ءبورىباي جەكسەمبين ەۋرازيا ەكونوميكالىق وداقتىڭ پايدا بولۋى تاريحي تۇرعىدا ماڭىزدى ەكەنىن ايتا كەلە: «قازىرگى تاڭدا 170 ملن. ادامى بار, جالپى ءونىمىنىڭ كولەمى 2 ترلن. دوللاردان اسىپ جىعىلاتىن بىرىڭعاي نارىق قۇرىلدى. كەدەن وداعى مەن بىرىڭعاي ەكونوميكالىق كەڭىستىك بارىنشا قارقىندى دامۋشى الەمدىك ەكونوميكالىق جوبالاردىڭ بىرىنە اينالدى. تەك سوڭعى 5 جىلدا عانا ءبىزدىڭ ەلدەرىمىز اراسىنداعى تاۋار اينالىمى 88 پايىزعا ءوسىپ, 24 ملرد. اقش دوللارىنا جەتتى. ەۋرازيالىق ينتەگراتسيا بويىنشا سەرىكتەس مەملەكەتتەردىڭ ەكسپورتى 63 پايىزعا ءوستى جانە 10 ملرد. دوللاردى قۇرادى», – دەدى. ەستەرىڭىزگە سالا كەتەيىك, 2014 جىلدىڭ 29 مامىرىندا استانادا قازاقستان, بەلارۋس جانە رەسەي پرەزيدەنتتەرى ەۋرازيالىق ەكونوميكالىق وداق قۇرۋ تۋرالى شارتقا قول قويدى. جولدىباي بازار. دەرەككوز: «قازاقپارات». فوتو: «قازاقپارات».