ماڭعىستاۋ وبلىسىندا بىردەن 13 قىلمىستىق ءىس قوزعالدى

اقتاۋ. 26 ماۋسىم. ماڭعىستاۋ وبلىسىنداعى كەدەندىك باقىلاۋ دەپارتامەنتىنىڭ  كونترابانداعا قارسى كۇرەس باسقارماسى وبلىستىق قارجى پوليتسياسىمەن  بىرلەسە وتىرىپ شۇعىل-ىزدەستىرۋ شارالارىن جۇرگىزۋ كەزىندە كەدەن وداعى اۋماعىنا  وكىلدىك سىنىبىنداعى 13 اۆتوكولىك اكەلىنگەنى تۋرالى دەرەكتەردى انىقتادى. بۇل تۋرالى egemen.kz ءتىلشىسى حابارلادى. اتالعان دەپارتامەنتتىڭ ءباسپاسوز قىزمەتىنىڭ حابارلاۋىنشا, ءاربىر اۆتوكولىكتىڭ بەلارۋس رەسپۋبليكاسىنىڭ مەملەكەتتىك اۆتوينسپەكتسياسى بەرگەن قۇجاتتارى بولعان, سونىڭ نەگىزىندە ماڭعىستاۋ وبلىسى بويىنشا ىشكى ىستەر دەپارتامەنتىنە ۋاقىتشا ەسەپكە قويىلعان. بىراق تەكسەرۋ شارالارى بارىسىندا اتالعان اۆتوكولىكتەرگە كەدەن وداعى ەلدەرىندە كەدەندىك رەسىمدەۋ جۇرگىزىلمەگەن بولىپ شىقتى. مەملەكەتكە تولەنبەگەن كەدەندىك تولەمدەردىڭ جالپى سوماسى 84,3 ملن.تەڭگەنى قۇرايدى ەكەن. قازىرگى تاڭدا وسى دەرەكتەرگە سايكەس, قىلمىستىق كودەكستىڭ 209-بابىنىڭ 1-تارماعى بويىنشا قاتارىنان 13 ءىس قوزعالدى. قازىر وسىعان بايلانىستى تەرگەۋ امالدارى جۇرگىزىلۋدە. گۇلايىم شىنتەمىرقىزى. دەرەككوز: egemen.kz. فوتو: serke.org.