كەربۇلاق اۋدانى, قىزىلجار اۋىلىندا 4 اۋلانى سۋ باسقان. وقيعا ورنىنا 19 قىزمەتكەر مەن 6 تەحنيكا جۇمىلدىرىلدى. قازىرگى ۋاقىتتا ارىق جۇيەسى تەرەڭدەتىلىپ, تازالانىپ جاتىر.
«جەتىسۋ وبلىسى تجد-عا كەربۇلاق اۋدانى سارىوزەك – كوكتال اۆتوجولىنىڭ بويىندا 9 كم جەردە ورنالاسقان تسەمەنت وندىرەتىن «Alacem» زاۋىتىنىڭ اۋماعىن سۋ باسۋ تۋرالى اقپارات تۇسكەن جوق. الايدا الەۋمەتتىك جەلىلەردى مونيتورينگتەۋ بارىسىندا ەگىستىكتەردەن مول قار ەرۋ سالدارىنان زاۋىت اۋماعىنىڭ ەڭىس اعىنىمەن سۋ باسقانى تۋرالى ۆيدەو ءتۇسىرىلىپ, الەۋمەتتىك جەلىلەرگە جاريالانعانى انىقتالدى. قىزمەتكەرلەردىڭ جۇمىلدىرىلۋىمەن ەرىگەن قار سۋىن بۇرۋ بويىنشا ءىس-شارالار قابىلداندى. زارداپ شەككەندەر جوق. سونداي-اق زاۋىتقا دا زالال كەلگەن جوق», دەدى دەپارتامەنت باسشىسى يگور جۋكوۆ.
ايتا كەتەرلىگى, قۇرباندار مەن زارداپ شەككەندەر جوق. الاكول اۋدانىنىڭ قابانباي جانە جايپاق اۋىلدارىندا دا اۋلا اۋماعىن سۋ باسۋ سالدارىنىڭ الدى الىندى. جەرگىلىكتى جەرلەردە جەكە قۇرامنىڭ 10 قىزمەتكەرى مەن 3 تەحنيكا جۇمىلدىرىلدى. قۇرباندار مەن زارداپ شەككەندەر جوق.
ال ەسكەلدى اۋدانىندا قاردىڭ قارقىندى ەرۋى مەن ارىق جۇيەسىنىڭ تازالانباۋىنان جالعىزاعاش اۋىلىنىڭ ماڭىنداعى جول بولىگى سۋ استىندا قالدى. قۇتقارۋشىلار شۇعىل تۇردە وقيعا ورنىنا بارىپ, كانالداردى تەرەڭدەتۋ جانە تازالاۋ جۇمىستارىن جۇرگىزدى. ايتا كەتەرلىگى ەرىگەن سۋ بيعاش وزەنىنە ترانزيتتىك رەجىمدە وتەدى.
«قازگيدرومەت» رمك داۋىلدى ەسكەرتۋىنە سايكەس جاڭبىر تۇرىندەگى جاۋىن-شاشىن بولجامىنا, سونداي-اق وتكەن اپتاداعى تەمپەراتۋرا فونىنىڭ جوعارىلاۋىنا بايلانىستى قاردىڭ قارقىندى ەرۋى كۇتىلىپ وتىر. جەتىسۋ وڭىرىندە ەرىگەن جانە ەڭىس اعىنىنىڭ قالىپتاسۋى, مۇز قۇبىلىستارىنىڭ السىرەۋى جانە وزەندەردەگى سۋ دەڭگەيىنىڭ كوتەرىلۋى, بۇل رەتتە سۋدىڭ توگىلۋى مەن سۋ باسۋى مۇمكىن», دەيدى ي.جۋكوۆ.
جالپى, جەتىسۋ وڭىرىندەگى سۋ تاسقىنىنىڭ جاعدايى باقىلاۋدا. سۋ تاسقىنىنىڭ الدىن الۋ ءۇشىن تجد قىزمەتكەرلەرى ازاماتتاردى كانال جۇيەلەرىن تازارتۋعا, اۋلا اۋماقتارىن تازالاۋعا كومەكتەسۋگە شاقىرادى.
جەتىسۋ وبلىسى
