كوللاجدى جاساعان زاۋرەش سماعۇل, «EQ»
ءبىرىنشى نەسيە بيۋروسىنىڭ مالىمەتىنشە, بانك نەسيە بەرۋگە شەشىم قابىلدايتىن كەزدە لومباردتاردىڭ نەسيە تاريحىنداعى جازبالاردى تەكسەرەدى.
سونداي-اق نەسيە بيۋروسى «لومباردتاعى وتەلمەي قالعان قارىز سالىمشىنىڭ نەسيە تاريحىنا قالاي اسەر ەتەدى» دەگەن سۇراققا دا جاۋاپ بەردى.
ء«ار قارجى ينستيتۋتىندا نەسيە بەرۋ تۋرالى شەشىم قابىلداۋدىڭ وزىندىك جۇيەسى بار. ءبىرىنشى كەزەكتە كرەديتورلار الدىنداعى مىندەتتەمەلەردى ورىنداۋ كەزىندە تولەم تارتىبىنە نازار اۋدارىلادى. بانك ميكروقارجى ۇيىمدارىنىڭ كەز كەلگەن باسقا جازبالارى سياقتى لومباردتاردىڭ دا نەسيە تاريحىنداعى جازبالاردى قارايدى. بانك ىشكى كرەديتتىك كوميتەتتەر دەڭگەيىندە قارىز الۋشىنىڭ تولەم قابىلەتتىلىگىن باعالاۋدىڭ باسقا دا فاكتورلارىن ەسكەرە وتىرىپ, لومباردتاردىڭ كرەديت تاريحىنداعى جازبالاردى قالاي ەسەپكە الۋ كەرەكتىگىن شەشەدى», دەپ حابارلادى.
دەمەك لومباردقا بارىپ, التىندى قايتارىپ الماۋىڭىز نەسيە تاريحىڭىزدا مىندەتتى تۇردە كورسەتىلەدى. بىراق بۇل اقپارات كليەنتكە نەسيە بەرۋگە كەدەرگى كەلتىرە مە, جوق پا, ونى ءار بانكتىڭ ىشكى بولىمدەرى دەربەس جانە ءوز ەرەجەلەرى بويىنشا شەشەدى. سەبەبى ەكىنشى دەڭگەيلى بانكتەردە ءوتىنىش تاۋەكەل ءبولىمى ماماندارىنىڭ سۇزگىسىنەن ءوتىپ بارىپ, ماقۇلدانادى. اۆتوماتتاندىرىلعان سكورينگ جۇيەسى ءاربىر بانكتە بار. ماقۇلداۋ نەمەسە باس تارتۋ پارامەترى سول جەردە اۆتوماتتى تۇردە ورناتىلادى. ونىڭ قالاي جۇمىس ىستەيتىنىن تاپ باسىپ ايتۋ قيىن. ونداعان جىلدار بۇرىن التىنىن كەرى ساتىپ الماعانى تۋرالى دەرەك تە نەسيە تاريحىنا كەرى اسەرىن تيگىزۋى مۇمكىن. مۇنىڭ ءبارى ءوتىنىش بەرۋشىنىڭ سودان كەيىنگى نەسيەلەرىندەگى تولەم تارتىبىنە بايلانىستى. مىسالى, نەسيەنى مەرزىمىنەن بۇرىن جاپقانى تۋرالى دەرەكتەر لومباردقا قاتىستى تاريحتى «جۋىپ» جىبەرۋى مۇمكىن.
وسىلايشا, لومباردتا وتەلمەگەن التىن كەز كەلگەن جاعدايدا نەسيە تاريحىندا كورسەتىلەدى. بىراق جوعارىدا ايتىلعانداي, بۇل نەسيە بەرۋ تۋرالى شەشىمگە اسەر ەتە مە, جوق پا, ونى ءار بانك وزىنشە شەشەدى.
الماتى
