قازاقستاندا بارلىق ەتنوستاردىڭ دامۋىنا قولايلى جاعداي جاسالعان

كەشە سىرتقى ىستەر ءمينيسترى ەرلان ىدىرىسوۆ قازاقستانعا رەسمي ساپارمەن كەلگەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) از ۇلتتار ىستەرى جونىندەگى جوعارعى كوميسسارى استريد تۋرسپەن كەزدەسۋ وتكىزدى, دەپ حابارلادى قر ءسىم-ءىنىڭ ءباسپاسوز قىزمەتى. سۇحباتتاسۋشىلار قازاق­ستاننىڭ ەقىۇ-مەن جانە ونىڭ جو­عار­عى كوميسسار كەڭسەسىمەن (اۇجك) ىنتىماقتاستىعىنىڭ تا­ريحى بەرىك قالانعانىن جانە كوپتەگەن ءبى­رىككەن جۇمىستار ءساتتى اتقارىلعانىن اتاپ كورسەتتى. سۇحبات بارىسىندا قازاقستان ۇكىمەتىنىڭ ۇلتارالىق جانە كونفەسسياارالىق كەلىسىم مەن ەت­نوستىق توپتار قۇقىقتارىن قور­عاۋ بويىنشا جۇرگىزگەن ساياساتى حا­لىقارالىق دەڭگەيدە جوعارى باعالاناتىنى اتاپ ءوتىلدى. ە.ىدىرىسوۆ سۇحباتتاسىن قا­زاقستان اۋماعىندا 120-دان استام ۇلت جانە 30-دان استام ءدىني كونفەسسيا وكىلدەرى تۇرا­تىن­دىعى جاي­ىندا حاباردار ەتتى. ول جوعار­عى كوميسسار كەڭ­سەسىن ەتنوس­ارالىق قاتىناستار دا­مۋى­نىڭ ماسەلەلەرىن ەڭ جوعارى دەڭ­گەيدە شەشۋگە مۇمكىندىك تۋعىزاتىن قازاقستان حالقى اس­سامبلەياسىنىڭ الەۋەتىن بارىنشا پايدالانۋعا شاقىردى. قازاقستاندا بارلىق ەتنوستىق توپتاردىڭ دامۋىنا, ەتنو-باعىت­تالعان ۇيىمداردىڭ ەركىن جۇ­مىس ىستەۋىنە, ەتنوستاردىڭ ءتىلىن, داستۇرلەرى مەن مادەنيەتىن ساق­تاۋعا بارىنشا وڭدى جاعداي جاسالعانى اتالىپ ءوتتى. قر ءسىم باسشىسى ەتنوس­ارا­لىق جانە دىنارالىق كەلىسىم ماسە­لەلەرى قازاقستان ءۇشىن سترا­تە­گيالىق ماڭىزعا يە ەكەنىن,  ەلدى مە­كەندەيتىن ءتۇرلى ۇلتتار اراسىن­دا ءوزارا سىيلاستىق اۋانىن  ساقتاۋ شارتى ورىندالعاندا عانا گۇلدەنگەن, ەركىن قوعام قۇ­رۋعا جانە «قازاقستان-2050» ستراتەگياسىنىڭ ماقساتتارىن ورىنداۋعا بولاتىنىن اتاپ كورسەتتى. ەقىۇ-نىڭ از ۇلتتار ىستە­رى جونىندەگى جوعارعى كوميس­سارىنىڭ پىكىرىنشە, قازاقستان­نىڭ الەۋمەتتىك-ەكونوميكالىق جەتىس­تىكتەرى ەلدەگى ۇلتارالىق بەيبىتشىلىك پەن كونفەسسياارالىق كەلىسىمنىڭ ارقاسىندا مۇمكىن بولىپ وتىر. كەزدەسۋ بارىسىندا سۇح­بات­تاستار 2013 جىلعى ساۋىردە الما­تىدا قابىلدانعان اۇجك ورتالىق ازيا ءبىلىم بەرۋ باع­دار­­لاماسى ءىس-ارەكەتتەر جوسپا­رىنىڭ جۇزەگە اسىرىلۋ بارى­سىن تالقىلادى. وسىعان وراي, ە.ىدىرىسوۆ قازاق­ستان ءۇشىن ەتنوستىق توپتار­دىڭ ەرەك­شەلىكتەرىن ساق­تاۋعا باعىت­تال­­عان جۇمىس قىزى­عۋ­شىلىق تۋدى­راتىنىن ايتا كەلىپ, از ۇلت­تار شوعىرلانعان جەرلەردە ەتنوستاردىڭ تىلدەرىندە ءبى­لىم بەرەتىن مەكتەپتەر جۇمىس ىستەي­تىنىن جەتكىزدى.