ورالدىق نازگۇل بايمۇقانوۆانىڭ بۇيرەگى 2007 جىلى سىر بەردى. سودان بەرى ءتۇرلى ەم قابىلداپ, ۋاقىتىنىڭ تەڭ جارتىسىن اۋرۋحانادا وتكىزگەن كورىنەدى.
بىرنەشە دارىگەرگە قارالىپ, وتا دا جاساتتى. العاشقى وپەراتسيا الماتى قالاسىندا ءوتتى.
«مەن قارجىگەرمىن. 20 جىلدان بەرى بانك قىزمەتكەرى بولىپ جۇمىس ىستەيمىن. 2007 جىلدان باستاپ دەرتكە شالدىقتىم. ال 2016 جىلى قاتتى اۋىرىپ, العاش رەت بۇيرەك اۋىستىردىم. بۇل اعامنىڭ بۇيرەگى بولاتىن. سول بۇيرەكپەن 4,5 جىل ءجۇردىم. كەيىن قايتا اۋىرا باستادىم. ەكى جىل بويى گەمودياليز قابىلدادىم. سول كەزدە كۇيەۋىمىز ەكەۋمىز تاعى دا وسى قادامعا بارۋعا شەشىم قابىلدادىق», دەدى نازگۇل بايمۇقانوۆا.
جۇبايى ەركىن بايمۇقانوۆ ىشكى ىستەر ورگاندارى سالاسىندا ەڭبەك ەتىپ, زەينەتكە شىققان.
بىرنەشە اناليز تاپسىرىپ, ناتيجەسىندە دونور بولا الاتىنىن ءتۇسىندى.
«2016 جىلى وتباسىمىزدىڭ بارلىعى سايكەستىكتى انىقتاۋ ءۇشىن اناليز تاپسىردىق. سول جىلى مەنىڭ بۇيرەگىمدى ايەلىمە سالۋعا بولاتىنىن ءبىلدىم. بۇل الماتىدا بولدى. دارىگەرلەر تۋىستىق قارىم-قاتىناس جاقسى دەپ توپشالاپ, اعاسىنىڭ بۇيرەگىن سالۋعا شەشىم قابىلدادى. ال مەن قارسى بولمادىم. ۇزاق جىلدارعا كومەكتەسەدى دەپ ويلاعان ەدىك. بىراق ولاي بولمادى. 2020 جىلى اۋرۋى قايتا اسقىندى. باستان وتكەنگەن جاعدايدى سوزبەن جەتكىزۋ قيىن. ول اۋىردى, ال ءبىز جانىندا ءجۇرىپ-اق ونىڭ جان قينالىسىن سەزىنىپ, كومەكتەسۋدى عانا ويلادىق. تۋىستارىما بۇل جولى بۇيرەكتى ءوزىم بەرەتىنىمدى ايتتىم. ءتىپتى تالقىعا سالمادىق. سوسىن الماتىعا حابارلاسىپ, سوندا باردىق. اناليز تاپسىرىپ, ورالداعى نەفرولوگتارمەن اقىلداسقان جايىمىز بار. حيرۋرگ-ترانسپلانتولوگ عاني قۇتتىمۇراتوۆپەن حابارلاسۋعا, كەڭەسۋگە تۋرا كەلدى. ول بىردەن كورشى وبلىس دەپ اقتوبەلىك دارىگەر تۋرالى ايتتى. مۇنداعى قۇرال-جابدىقتار دا زاماناۋي تالاپقا ساي. عاني قۇتتىمۇراتوۆ استانادان ءوزى كەلىپ, جانىمىزدان تابىلدى. اقتوبە مەن ورال اراسىنىڭ جاقىن بولعان وڭ اسەرىن تيگىزدى. سەبەبى پويىزبەن بارساق, ءبىر كۇننەن سوڭ گەمودياليز الۋ كەرەك. ال ۇشاق كەزىندە قىسىم كۇشەيەدى. ءبىز مۇندا ءۇش اپتا بۇرىن كەلدىك. 13 اقپاندا كەلگەن كەزدە ترانسپلانتولوگيا ءبولىمىنىڭ ۇجىمى وتە ۇيىمشىل ەكەنىن كوردىك. ولار ءوز ءىسىنىڭ شەبەرلەرى. كاسىبي بىلىكتىلىگى كورىنىپ تۇردى. وتاعا دەيىن ءتۇرلى اناليز تاپسىرىپ, ماماندار كەڭەس وتكىزدى. باس دارىگەر ەرلان سۇلتانگەرەەۆ, ورىنباسارى ارداق بەكەتقىزى دا وسىندا ءجۇردى», دەدى ەركىن بايمۇقانوۆ.
قازىرگى كەزدە ولار تولىق ەمدى قابىلداپ, ورالعا اتتاندى.
الداعى ءۇش ايدا دارىگەرلەردىڭ باقىلاۋىندا بولدى.
«2014 جىلى اقتوبە مەديتسينا ورتالىعىندا ترانسپلانتولوگيا ءبولىمى اشىلدى. سودان بەرى 80-گە جۋىق بۇيرەك اۋىستىرۋ وتاسى جاسالدى. كوبىنە تۋىستىق دونور وپەراتسياسىنا جۇگىنەمىز. ال ءبىز مايىتتىك دونوردى دامىتۋىمىز كەرەك. سەبەبى بۇل قاۋىپسىز. جىل سايىن اقتوبەدە 350 ادام ينسۋلت الىپ, كوز جۇمادى. ال ولاردىڭ جاقىندارى اعزاسىن بەرۋگە قارسى شىعىپ جاتىر. بۇل دۇرىس ەمەس. ەگەر ءبىز 2014 جىلدان بەرى مايىتتىك دونوردى پايدالانعان بولساق, قازىر كەزەكتە تۇرعان ادامداردىڭ ءبارىن ەمدەپ, وتا جاسار ەدىك. وكىنىشكە قاراي مەنتاليتەت قولبايلاۋ بولدى», دەدى حيرۋرگ-ترانسپلانتولوگ مىلتىقباي ساعىنبەك ۇلى.
ال ورالدان اقتوبەگە ەم ىزدەپ كەلىپ, ۇلكەن ءۇمىتى اقتالعان ەرلى-زايىپتى بايمۇقانوۆتاردىڭ قۋانىشىندا شەك جوق.
