«تسيفرلىق تەحنولوگيالار مەن يننوۆاتسيالاردى پايدالانۋ ارقىلى ايەلدەردىڭ جاعدايىن جاقسارتۋ جانە مۇمكىندىكتەرىن كەڭەيتۋ» اتتى تاقىرىپتا باستالعان سەسسيانى بۇۇ باس حاتشىسى انتونيو گۋتەرريش اشتى. ايەل-قىزداردىڭ قوعامداعى مۇمكىندىكتەرىن كەڭەيتىپ, گەندەرلىك تەڭدىكتى دامىتۋدى قامتاماسىز ەتۋ ءۇشىن اۋەلى ولاردىڭ ءبىلىمىن جەتىلدىرۋ, عىلىم-تەحنولوگيانى, ينجەنەريا مەن تسيفرلىق سالاداعى كوشباسشىلىعىن قولداۋ ماقساتىندا قاۋىپسىز جەلىلىك ورتانى قالىپتاستىرۋ تۋرالى ۇندەۋ تاستادى.
بۇل رەتكى سەسسياعا ۇكىمەتتىك ەمەس ۇيىمدارمەن قاتار عىلىمي-ساراپتامالىق قاۋىمداستىقتىڭ بەلدى وكىلدەرى جانە الەمنىڭ 190-نان استام ەلىنەن دەلەگات قاتىسىپ جاتىر.
الەم مينيسترلەرىنىڭ القالى جيىنىن موڭعوليانىڭ ەڭبەك, الەۋمەتتىك قامقورلىق ءمينيسترىنىڭ ورىنباسارى زۇلپىقار سارقىت ۇلى باسقاردى. ۆيتسە-مينيستر بۇۇ-نىڭ بيىك مىنبەرىندە اعىلشىن تىلىندە بايانداما جاساپ, ءماجىلىس باسقارعان تۇڭعىش موڭعوليالىق قازاق ازاماتى بولىپ, ەل مەرەيىن ءوسىردى.
اسسامبلەيا توراعاسىنىڭ ورىنباسارى زۇلپىقار سارقىت ۇلى: «عالامتور جەلىسىندەگى گەندەرلىك ايىرماشىلىقتى جويۋدا كەزدەسەتىن كەدەرگىلەردى ەڭسەرگەن تاڭداۋلى تاجىريبە جانە گەندەرلىك تەڭدىكتى قامتاماسىز ەتۋ ءۇشىن تسيفرلىق داۋىردەگى ءبىلىم بەرۋدى دامىتۋدىڭ ماڭىزدىلىعى ەرەكشە», دەيدى.
سەسسيا بارىسىندا ول ونلاين-ورتاداعى گەندەرلىك الشاقتىقتى جويۋ بويىنشا موڭعوليادا جۇرگىزىپ جاتقان ساياساتى مەن باعىت-باعدارىن تانىستىرىپ, ەلىمىزدىڭ ەلەكتروندى باسقارۋ قىزمەتى حالىقارالىق دەڭگەيدە جوعارى باعالانعانىن ەرەكشە اتاپ ءوتتى.
جيىندا ءباا, بانگلادەش, بوتسۆانا, گرۋزيا, مەكسيكا, نيدەرلاندى, ۆەنگريا, قىتاي, فيليپپين, چەحيا, ەكۆادور, جاپونيا قاتارلى ەلدەردەن كەلگەن بارلىعى 23 وكىلى ءسوز سويلەدى.
سونىمەن قاتار, 2023 جىلعى 7 ناۋرىزدا ۆيتسە-مينيستر زۇلپىقار سارقىت ۇلى دۇنيەجۇزىلىك بانك جانە ايەلدەر مارتەبەسى جونىندەگى كوميسسيانىڭ 67-سەسسياسىنىڭ بيۋروسى نەمەسە وڭتۇستىك افريكا رەسپۋبليكاسى, ارگەنتينا, لاتۆيا, موڭعوليا مەن گەرمانيا بىرلەسىپ ۇيىمداستىرعان مينيسترلەر كەزدەسۋىنە قاتىستى.
جوعارى دەڭگەيدەگى سامميتكە قاتىسۋعا 30 ەلدىڭ ايەلدەر جانە گەندەرلىك ماسەلەلەرگە جاۋاپتى مينيسترلەرى شاقىرىلدى. بۇ كەزدەسۋدىڭ ماقساتى دۇنيەجۇزىلىك بانك پەن بۇۇ-عا مۇشە مەملەكەتتەر اراسىنداعى 2023-2030 جىلدارعا ارنالعان گەندەرلىك ماسەلەلەردى قايتا قاراۋداعى ديالوگتى قولداۋ بولدى.
جيىن بارىسىندا زۇلپىقار سارقىت ۇلى: «تۇرمىستىق زورلىق-زومبىلىققا قارسى زاڭنامانىڭ ءتيىمدى ىسكە اسىرىلۋىن قامتاماسىز ەتۋ بويىنشا اتقارىلىپ جاتقان شارالار تۋرالى موڭعوليالىق تاجىريبەسىن ءبولىسىپ, حالىقتى جۇمىسپەن قامتۋ سالاسىندا اتقارىلىپ جاتقان ءىس-شارالارمەن تانىستىردى. سونداي-اق سەسسيا بارىسىندا «گەندەرلىك تەڭدىك جانە اۋىل قىزدارى مەن ايەلدەرىنىڭ قۇقىعىن كەڭەيتۋ سالاسىنداعى جەتىستىكتەر مەن مىندەتتەر» تاقىرىبىندا بايانداما جاسادى.
6-ناۋرىزدان باستالعان بۇل ماڭىزدى شارا ناۋرىزدىڭ 17-نە دەيىن جالعاسادى.
قۋات ۋاتحان,
باي-ولكە ايماعى
