بۇعان دەيىن دە بىرنەشە مارتە سابيلەرگە كۇردەلى وپەراتسيا جاساعان دارىگەرلەر بۇل جولى ءۇش ايلىق نارەستەگە ءومىر سىيلاۋ ءۇشىن ايانىپ قالعان جوق. گيپپوكرات انتىنا بەرىك ازاماتتار ءسابيدىڭ اتا-اناسىمەن كەلىسە وتىرىپ, ءسابيدى تولىق تەكسەردى.
ميدىڭ قالىپتى دامۋىنا كەدەرگى كەلتىرەتىن باس سۇيەگىنىڭ ءتۋابىتتى اسسيمەترياسى بار پەرىشتەنىڭ جاعدايى ءماز ەمەستىگى انىق. وبلىستىق كوپسالالى بالالار اۋرۋحاناسىنىڭ نەيروحيرۋرگتەرىنە ءۇش ايلىق ءسابيدىڭ اتا-اناسى شاعىمدانعاننان كەيىن پەرىشتەنىڭ جاعدايى اۋىر ەكەنىن دارىگەرلەر دە تۇسىنگەن.
ابىگەرگە تۇسكەن دارىگەرلەر ءسابيدىڭ جاعدايىن تولىقتاي تەكسەردى. ناتيجەسىندە, اسپاپتىق دياگنوستيكادان كەيىن, سونىڭ ىشىندە ميعا جاسالعان كت-دان سوڭ دارىگەرلەر بالاعا ساگيتتالدى كرانيوسينوستوز دياگنوزىن قويعان. بۇل – ءبىر نەمەسە بىرنەشە باس سۇيەك تىگىستەرى مەرزىمىنەن بۇرىن ءوسىپ, باس سۇيەگىنىڭ دەفورماتسيالانۋىنا جانە ميدىڭ قالىپتى دامۋىنا كەدەرگى كەلتىرەتىن اۋرۋ. دارىگەرلەردىڭ ايتۋىنشا, مۇنداي دياگنوز مىڭ بالانىڭ بىرىنە عانا قويىلادى ەكەن. سوندىقتان دا مۇنى سيرەك كەزدەسەتىن جاعداي دەۋگە دە بولادى.
دەرتتىڭ كۇردەلىلىگىن ەسكەرە وتىرىپ, بالانى وپەراتسياعا مۇقيات دايىنداعان سوڭ نەيروحيرۋرگتەر سايات جۇماباەۆ, ميرداس مۋرادوۆ, ميرسايد بايماتوۆ جانە رەانيماتولوگ راۆشان پۋلاتوۆتىڭ قاتىسۋىمەن ەندوسكوپيالىق پاتچ – كرانيوتوميا جاسالدى.
نەيروحيرۋرگيا بولىمشەسىنىڭ مەڭگەرۋشىسى سايات جۇماباەۆتىڭ ايتۋىنشا, كرانيوستەنوزعا ارنالعان ەندوسكوپيالىق رەكونسترۋكتيۆتى وپەراتسيالار التى ايعا دەيىنگى بالالارعا جاسالادى ەكەن. ول مۇنداي كىشكەنتاي بالاعا وپەراتسيا جاساۋ وتە ماڭىزدى دەپ ەسەپتەيدى. سوندىقتان دارىگەرلەر ەندوسكوپيانى قولدانعان.
«بۇل – ارنايى پەدياتريالىق نەيروەندوسكوپتاردى, باسقا دا ەندوسكوپيالىق قۇرالداردىڭ زاقىمدانۋىن بولدىرمايتىن ارنايى كونسترۋكتسيالى بور مەن جوعارى جىلدامدىقتى بۇرعىلاردى قولدانا وتىرىپ شامامەن 3 ساعاتقا سوزىلاتىن كۇردەلى وپەراتسيا. دارىگەرلەر مۇنداي وپەراتسياعا تىڭعىلىقتى دايىندالادى. بارلىق مانيپۋلياتسيا 4-5 سانتيمەتردەن اسپايتىن كەسۋ جولىمەن بەينەباقىلاۋ ارقىلى جۇزەگە اسىرىلاتىنىن ايتا كەتكەن ءجون. مۇنداي وپەراتسيالار از قان جوعالتۋمەن جانە قىسقا مەرزىمدى وڭالتۋ كەزەڭىمەن سيپاتتالادى. وپەراتسيادان سوڭ جانە باقىلاۋ كومپيۋتەرلىك توموگرافياسىنان كەيىن 3-4 كۇن وتكەن سوڭ بالالار ستاتسيوناردان شىعارىلادى», دەيدى س.جۇماباەۆ.
قازىرگى ۋاقىتتا نارەستەنىڭ جاعدايى جاقسارعان. دارىگەرلەردىڭ سوزىنە سەنسەك, باسىنداعى شاعىن تىرتىقتار كوپ ۇزاماي مۇلدە كورىنبەي قالادى ەكەن.
جامبىل وبلىسى
