«ەلىمىزدىڭ ساياسي جۇيەسى تۇبەگەيلى وزگەرىستەردى قاجەت ەتەدى. بۇل وزگەرىستەر ەلدىڭ ءال-اۋقاتىن ارتتىرۋعا باعىتتالۋى كەرەك. «اق جول» پارتياسىنىڭ باستى ماقساتى – ءاربىر ازاماتتىڭ ەركىن دامۋىنا قاجەتتى جاعداي جاساۋ, ونىڭ قۇقىقتارى مەن بوستاندىقتارىن قۇرمەتتەۋگە, بارلىق ازاماتتىڭ ءومىر ءسۇرۋ دەڭگەيى مەن ساپاسىن ۇدايى كوتەرۋ, سونداي-اق قازاقستان قوعامى مەن مەملەكەتىنىڭ ەكونوميكالىق, الەۋمەتتىك جانە ساياسي ورلەۋى», دەدى ا.پەرۋاشەۆ.
سونىمەن قاتار قازىبەك يسا «اق جول» پارتياسى ۇلتتىق مەملەكەتتىلىكتىڭ قالىپتاسۋىنىڭ ىرگەلى نەگىزىن قالاعان الاش قوزعالىسىنىڭ ءىزباسارى ەكەنىن, قازاق قوعامىن ەۋروپالىق جولمەن جاڭعىرتۋدى, الەمدىك وركەنيەتتىڭ وزىق جەتىستىكتەرىمەن ۇلتتىق مۇددەلەردى توعىستىرۋدى ماقسات ەتكەنىن اتاپ ءوتتى.
كەزدەسۋ بارىسىندا كانديداتتار پارتيانىڭ ساياسي باعدارلاماسىن تانىستىرىپ, پارلامەنتتە اتقارىلعان جۇمىستارعا توقتالدى. باعدارلامانىڭ نەگىزگى التى قاعيداتىن اتاعان اقجولدىقتار جەمقورلىقپەن كۇرەس, الەۋمەتتىك ادىلەتتىلىك, اۋىلدى يپوتەكالىق نەسيەلەندىرۋ, اۋىل جاستارىن قولداۋ جانە مەديتسينالىق ساقتاندىرۋ بويىنشا جينالعانداردىڭ ساۋالدارىنا جاۋاپ بەردى. تۇرعىنداردىڭ ماسەلەلەرى مەن ۇسىنىستارىن تىڭداعان رەسپۋبليكالىق شتاب مۇشەلەرى اقتوبە قالاسىنا اتباسىن بۇردى. وندا «اتامەكەن» ۇكپ كاسىپكەرلەرىمەن كەزدەستى.
«اق جول» پارتياسى – كاسىپكەرلەر مەن وتاندىق وندىرۋشىلەردىڭ وكىلى. ءبىز بيزنەستىڭ مۇددەسىن قورعاۋ ءۇشىن جۇمىس ىستەيمىز. ماقساتىمىز – سىزدەر سياقتى ءوز ءىسىن تاۋىپ, وتباسىن اسىراپ, جۇمىس ورىندارىنىڭ اشىلۋىنا ۇلەس قوسىپ جۇرگەن ازاماتتارىمىزعا قولداۋ كورسەتۋ. بۇگىندە ەلدىڭ ەڭ ۇلكەن ماسەلەسى – بايلار مەن كەدەيلەر اراسىنداعى الشاقتىق. مۇنى بيزنەستىڭ جۇمىسىنا كەدەرگى كەلتىرۋ ارقىلى ەمەس, ازاماتتاردىڭ تابىسىن ارتتىرۋ ارقىلى, حالىقتى الەۋمەتتىك قورعاۋدى قامتاماسىز ەتۋ ارقىلى رەتتەي الامىز», دەدى ا.پەرۋاشەۆ.
