«اۋىل» پارتياسىنىڭ دەلەگاتسياسى بىردەن ماحامبەت اۋدانىندا ورنالاسقان «سارايشىق» جشس-عا ات باسىن تىرەپ, سەرىكتەستىك ۇجىمىمەن كەزدەستى. اسىل تۇقىمدى ەشكى وسىرۋمەن اينالىساتىن شارۋاشىلىق – وسى سالاداعى ونەركاسىپتىك تيپتەگى ەكى ءىرى كاسىپورىننىڭ ءبىرى. شارۋاشىلىقتىڭ ءتۇرلى ءونىم شىعاراتىن وڭدەۋ-شىعارۋ ورتالىعى بار. فەرمانى «اۋىل» پارتياسىنان ءماجىلىس دەپۋتاتتىعىنا كانديدات تاميلا روزمەتوۆا باسقارادى. ونداعان جىل بۇرىن قايتا قۇرىلىپ, زاماناۋي قالىپقا كەلتىرىلگەن فەرما بۇگىندە ۇلكەن كەشەنگە اينالىپ وتىر.
«بۇل – ەڭبەك ادامىنىڭ ناتيجەلى جۇمىسىنىڭ كورسەتكىشى. وسىنداي ادامداردىڭ توككەن تەرى مەملەكەت تاراپىنان ەسكەرىلىپ, قۇرمەتتەلىپ وتىرسا, حالىقتىڭ اۋىل شارۋاشىلىعىنا, اگروبيزنەسكە دەگەن ىنتاسى ارتار ەدى. «اۋىل» پارتياسىنىڭ ماقساتى – اۋىل بيزنەسىن دامىتۋدا جىبەرىلگەن ولقىلىقتاردىڭ ورنىن تولتىرۋ. ءبىز پارلامەنت ماجىلىسىنە بارعاندا بەل شەشە كىرىسەتىن جانە بەلسەنە كوتەرەتىن باستى ماسەلەمىزدىڭ ءبىرى ءارى بىرەگەيى – بۇگىندە قۇنى ءتۇسىپ, قادىرى كەتكەن ەڭبەك ادامىنا دەگەن قۇرمەتتى بۇرىنعى دەڭگەيىنە قايتارۋ», دەدى «اۋىل» پارتياسىنىڭ توراعاسى ءالي بەكتاەۆ.
زاماناۋي تەحنولوگيا ارقاسىندا جوعارى ونىمدىلىككە قول جەتكىزگەن ەشكى فەرماسى پارتيا مەن ونىڭ سايلاۋالدى باعدارلاماسىنىڭ قۇرمەتىنە ەشكى سۇتىنەن جاسالعان, قاپتاماسىنا پارتيانىڭ «اۋىل تورگە شىقسىن!» اتتى باعدارلاماسى جازىلعان ىرىمشىكتىڭ جاڭا توپتاماسىن شىعاردى. ول سول ساتتەن باستاپ اتىراۋ وبلىسىنىڭ بۇكىل دۇكەنىنە ساتىلىمعا شىعارىلدى.
اتىراۋ وبلىسى – مۇنايلى, ونەركاسىبى دامىعان ولكە بولۋىمەن قاتار اۋىل شارۋاشىلىعىن دا الدىڭعى ورىنعا شىعارعان ايماق. ءوڭىر حالقىنىڭ اگروبيزنەسكە دەگەن قىزىعۋشىلىعى جوعارى. سارايشىقتا وتە قىزىقتى تاجىريبە جاسالىپ, وتە جاقسى ناتيجەگە قول جەتكىزگەن. مۇندا ليمون وسىرەتىن جانە سودان اۋىز تولتىرىپ ايتارلىقتاي تابىس تاباتىن جىلىجاي بار. مۇنى شاعىن شارۋاشىلىقتار ءۇشىن ناتيجەلى تاجىريبە رەتىندە تاراتۋعا ابدەن بولادى.
