مۇندا بىلتىر ورتتەن زارداپ شەككەن ورمان القابىن قالپىنا كەلتىرۋ جۇمىسى جۇرگىزىلىپ جاتىر. الايدا جۇمىسشىلار سانى از. ورمانشىلاردىڭ ايتۋىنشا, بوس جۇمىس ورىندارى بولعانىمەن, جۇمىس ىستەۋگە ەشكىمنىڭ نيەتى جوق. ويتكەنى جالاقىنىڭ ازدىعى جاس مامانداردى تارتۋعا مۇمكىندىك بەرمەيدى.
پارلامەنت ءماجىلىسىنىڭ دەپۋتاتتىعىنا ۇمىتكەر ەكاتەرينا سمىشلياەۆا پارتيانىڭ سايلاۋالدى باعدارلاماسىندا وسى ماسەلەلەرگە كوپ كوڭىل بولىنگەنىن اتاپ ءوتتى.
«پارتيانىڭ سايلاۋالدى باعدارلاماسىندا ورمان شارۋاشىلىعى قىزمەتكەرلەرىنىڭ جالاقىسىن كوتەرۋ ماسەلەسىنە ءمان بەرىلگەن. تاعى قىنجىلتاتىن جايت – وبلىستا مامان دايارلاۋ جۇمىسى توقتادى. مەملەكەتتىك تاپسىرىس وتە از. كەلەسى وقۋ جىلىنان باستاپ مامان دايارلاۋ ءۇشىن گرانتتار ءبولۋ ماسەلەسىن نازارعا الامىز», دەدى ە.سمىشلياەۆا.
بۇدان سوڭ شتاب مۇشەلەرىنىڭ كەزدەسۋى قوستاناي اۋدانىنىڭ اۋرۋحاناسىندا جالعاستى. بۇل – اۋرۋحاناعا ارنالىپ بەيىمدەلگەن عيماراتى جوق جالعىز اۋدان. ەمدەلۋشىلەر جالعا الىنعان بولمەدە قابىلدانادى.
ء«بىز سىزدەرمەن بۇعان دەيىن دە كەزدەسىپ, وسى ماسەلەنى تالقىلاعان بولاتىنبىز. بۇگىندە اۋرۋحانا سالۋ ماسەلەسى رەسپۋبليكالىق دەڭگەيدە شەشىمىن تاپتى. جالپى بارلىق شىعىندى قوسا العاندا جوبا قۇنى شامامەن 2 ملرد تەڭگەنى قۇرايدى. قارجىلاندىرۋ بيىل باستالادى», دەدى ە.سمىشلياەۆا.
سونداي-اق جاستار ماسەلەسى ل.تولستوي اتىنداعى قوستاناي وبلىستىق كىتاپحاناسىندا دا تالقىلاندى. كەزدەسۋگە ستۋدەنتتەر مەن «مەنىڭ ەلىم – مەنىڭ ءتىلىم» جوباسىنا قاتىسۋشىلار قاتىستى. كانديداتتار اۋىلداعى جاس مامانداردىڭ جاعدايىن جاقسارتۋ ءۇشىن قانداي قادامدار جاسالىپ جاتقانىن ايتتى.
قورىتىندى كەزدەسۋ ورتالىق بازاردا ءوتتى. تۇرعىندار جەكە ماسەلەلەرىمەن جۇگىنىپ, ۇسىنىس-پىكىرلەرىن ورتاعا سالدى.
