كەزدەسۋ بارىسىندا كانديداتتار جينالعان قاۋىمدى پارتيانىڭ ساياسي باعدارلاماسىنىڭ نەگىزگى باعىتتارىمەن تانىستىردى. پارلامەنتتە اتقارعان جۇمىستارى, «اق جول» پارتياسىنىڭ ۇستانىمدارى مەن ۇسىنىستارى تۋرالى ايتتى.
كانديداتتار پارلامەنتتىڭ وكىلەتتىگىن كۇشەيتۋ, بيۋدجەتتەن تىس جۇمسالعان قارجىعا پارلامەنتتىك باقىلاۋدى قايتارۋ تۋرالى پارتيا ۇسىنىستارىنا جان-جاقتى توقتالدى. اقجولدىقتار سايلاۋ ۇدەرىسىنىڭ اشىقتىعى مەن جاريالىلىعىن قامتاماسىز ەتۋ ماقساتىندا سايلاۋ ۋچاسكەلەرىندەگى بارلىق راسىمدەرگە بەينەباقىلاۋ ورناتۋدى, ەلەكتروندى داۋىس بەرۋدى ەنگىزۋدى قاراستىرۋدى ۇسىندى.
دانيا ەسپاەۆا «اق جول» پارتياسى كاسىپكەرلەردىڭ مۇددەسىن قورعايتىن پارتيا ەكەنىن اتاپ ءوتتى. كاسىپكەرلىكتى قولداۋ ەلدىڭ ەكونوميكالىق الەۋەتىن دامىتۋ ءۇشىن عانا ماڭىزدى ەمەس, ەڭ الدىمەن, بۇل جۇمىسسىزدىق پەن كەدەيلىكپەن كۇرەسۋدىڭ باستى قۇرالى.
شاعىن جانە ورتا بيزنەس جۇمىس ورىندارىمەن قامتاماسىز ەتە الادى. سوندىقتان «اق جولدىڭ» وسى جىلدار بويى پارلامەنت قابىرعاسىندا زاڭ شىعارۋشى ورگان دەڭگەيىندەگى باستى مىندەتى – شاعىن جانە ورتا بيزنەستىڭ مۇددەسىن قورعاۋ. جاڭا سالىق كودەكسى بويىنشا جۇمىس اياسىنداعى «اق جول» دەمپارتياسى مىندەتتەرىنىڭ ءبىرى – ءادىل سالىق سالۋ.
«اق جول» پارتياسى 10 جىلدان بەرى سارالانعان سالىق مولشەرلەمەلەرىن قىزمەت تۇرىنە قاراي ەنگىزۋگە ۇمتىلىپ كەلەدى. پرەزيدەنت ق.توقاەۆتىڭ تىكەلەي تاپسىرماسىنان كەيىن جاڭا سالىق كودەكسى ازىرلەنىپ جاتىر, وندا قوسىمشا قۇن سالىعىنىڭ سارالانعان مولشەرلەمەلەرىن ەنگىزۋ كوزدەلگەن.
د.ەسپاەۆا ميكروكاسىپكەرلىك پەن ءوزىن-ءوزى جۇمىسپەن قامتىعانداردى سالىقتان تولىق بوساتۋ كەرەكتىگىن اتاپ ءوتتى. بۇل ازاماتتاردىڭ مەملەكەتكە ماسىل بولماي, ەڭبەك ەتىپ, ءوز وتباسىن وزدەرى اسىراپ جۇرگەنىنە العىس ايتۋ كەرەك. كەزدەسۋ بارىسىندا سەرىك ەرۋباەۆ دەموكراتيا مەن پارلامەنتاريزم ماسەلەلەرىنە, وبلىس, قالا اكىمدەرىنىڭ بيلىكتە جۇرگەن كەزىندە پارتيالاردان شىعۋى, سايلاۋدىڭ ءادىل ءوتۋى, سايلاۋ ۋچاسكەلەرىندە بەينەباقىلاۋ جۇيەسىن ەنگىزۋ ماسەلەلەرىنە توقتالدى.
