– «بايتاق» پارتياسىنىڭ باعدارلاماسىندا ەكولوگيانى قالپىنا كەلتىرۋ, اۋانىڭ ساپاسىنا ءمان بەرۋ, قورشاعان ورتا مەن ازاماتتاردىڭ دەنساۋلىعىن قورعاۋ, سالاماتتى ءومىر سالتىن ناسيحاتتاۋ ماسەلەلەرى قامتىلعان. وڭىردەگى ەكولوگيالىق جاعداي الدىمەن ادام دەنساۋلىعىنا اسەر ەتەدى, بۇل تۇرعىدا تۋىندايتىن وزەكتى ماسەلەلەردى شەشۋدە سىزدەردىڭ وي-پىكىر, ۇسىنىستارىڭىز ماڭىزدى, – دەدى پارتيانىڭ ۇلىتاۋ وبلىستىق فيليالىنىڭ توراعاسى بازاركۇل ۇمبەتوۆا.
ەستەرىڭىزگە سالا كەتەيىك, وتكەن جىلدىڭ 9 ايىنىڭ قورىتىندىسى بويىنشا الدىن الا مالىمەتتەرگە سايكەس ۇلىتاۋ وبلىسىندا 82 مىڭ توننا لاستاۋشى زاتتار شىعارىلعانى انىقتالعان.
كەزدەسۋدە پارتيانىڭ ۇلىتاۋ وبلىسى بويىنشا ءماجىلىس دەپۋتاتتىعىنا ۇمىتكەر, پرەزيدەنت جانىنداعى ۇلتتىق قۇرىلتاي مۇشەسى, پارلامەنت ءماجىلىسى جانىنداعى قوعامدىق پالاتا مۇشەسى قازبەك مايگەلدينوۆ وڭىردە سايلاۋشىلارمەن بىرنەشە كەزدەسۋ وتكىزگەنىن, مەديتسينا سالاسىنداعى قوردالانعان ماسەلەلەردى جاقسى بىلەتىنىن ايتتى. اتا-اناسىنىڭ دا دارىگەر ەكەنىنە توقتالا كەلە, ءوزىنىڭ سايلاۋالدى باعدارلاماسىنداعى باسىم باعىتتارمەن تانىستىردى.
شتاب جەتەكشىسى مارعۇلان ەرماعانبەت ۇلى سايلاۋشىلار قويعان ساۋالدارعا ناقتى جاۋاپ بەرىپ, الداعى ۋاقىتتا قاراجال قالاسى مەن جاڭاارقا اۋدانى تۇرعىندارىمەن دە كەزدەسۋلەر جوسپارلانعانىن جەتكىزدى.
كەزدەسۋلەر استانا قالاسىندا دا جالعاسىپ جاتىر. بەلگىلى بولعانداي, جىلىتۋ ماۋسىمىندا استانالىق ءبىر وتباسى 10 توننا كومىر جاعادى ەكەن. ياعني ەلوردانىڭ ەكولوگياسىنا قاۋىپ ءتونىپ تۇر. 4 مىڭنان استام ۇيلەر گازداندىرىلماعانىن ەسكەرسەك, تەك جەكە ۇيلەردىڭ ءوزى 40 مىڭنان اسا قارا وتىندى پايدالانىپ وتىر.
– استانا قالاسىندا گازداندىرۋ ماسەلەسى بۇگىنگى كۇنى شەشىلمەي وتىر. بۇعان دەيىن بۇل ماسەلەنى شەشۋ جولدارى دۇرىس قاراستىرىلمادى. «بايتاق» پارتياسى پارلامەنتكە كىرەتىن بولسا, ءبىرىنشى كەزەكتە استانا قالاسىن گازداندىرۋمەن اينالىسادى, – دەدى پارتيا توراعاسى ازاماتحان ءامىرتاي.
