ۇمىتكەرلەر ەڭبەك ۇجىمىن حالىق پارتياسىنىڭ سايلاۋالدى باعدارلاماسىمەن تانىستىردى.
– ءبىزدىڭ پارتيا ءبىرىنشى كەزەكتە حالىقتىڭ الەۋمەتتىك جاعدايىن نازاردا ۇستايدى. وزەكتى ماسەلەلەردى ۇكىمەتكە جەتكىزىپ قانا قويماي, ونىڭ شەشىلۋىنە ىقپال ەتەدى. جاڭا قازاقستانعا جالدامالى جۇمىسشىلاردىڭ الەۋمەتتىك جانە ەڭبەك قۇقىعىن قورعايتىن جاڭا ەڭبەك كودەكسى قاجەت, – دەدى ەلميرا اۋەزوۆا.
ءسوز اراسىندا ول دەنساۋلىق ساقتاۋ سالاسىنا قاتىستى وزەكتى ماسەلەلەرگە دە كەڭىنەن توقتالدى. قاي تۇرعىندى توقتاتىپ سۇراساڭىز دا, مەديتسيناعا قاتىستى پروبلەمالاردى تىزبەكتەي جونەلەتىنى ءسوزسىز. ادامنىڭ دەنساۋلىعى مەملەكەت ءۇشىن ماڭىزدى.
– مەديتسينا سالاسىندا بىلىكتى مامان تاپشى. حالىق «Damumed»-كە تىركەلۋ مەن دارىگەردىڭ قابىلداۋىنا جازىلۋدا كەدەرگى كوپ ەكەنىن ايتادى. ءمامس جوباسى دا ءۇمىتتى تولىق اقتامادى, – دەدى ول.
پارتيا وكىلى نۇرسۇلتان شوقانوۆ ءبىلىم سالاسىنداعى كەمشىلىكتەرگە نازار اۋداردى. ول جاستاردى قولداۋدى جانداندىرا ءتۇسۋ كەرەك ەكەنىن ايتتى.
– حالىق پارتياسى بارلىق جاستاردىڭ تەگىن كاسىپتىك جانە جوعارى ءبىلىم الۋىن جاقتايدى. جەكە كوللەدجدەر, ورتا ارناۋلى جانە جوعارى وقۋ ورىندارىنىڭ ستۋدەنتتەرىنە ەڭ تومەنگى جالاقى مولشەرىندە اي سايىن شاكىرتاقى بەكىتۋ قاجەت, – دەدى كانديدات.
كەزدەسۋدە جۇمىسسىزدىق, كوپبالالى انالار, قانداستار ماسەلەلەرى اڭگىمەگە ارقاۋ بولدى. سايلاۋشىلار سپيكەرلەرگە سۇراق قويىپ, ناقتى جاۋاپ الدى.
– مەملەكەت 4 جانە ودان دا كوپ بالاسى بار كوپبالالى وتباسىلارعا تەگىن باسپانا بەرۋى قاجەت. سونداي-اق يپوتەكانى ءۇش بالاعا دەيىنگى وتباسىلارعا قولجەتىمدى ەتۋى كەرەك. مىندەتتى شارتتاردان باستاپقى جارنانى الىپ تاستاۋدى جانە تومەندەتىلگەن پايىزدىق مولشەرلەمەلەردى (جىلدىق ەكىدەن 5%-عا دەيىن) بەلگىلەۋدى ۇسىنامىز. ەكىنشى بالادان باستاپ 25%, ال 4-بالا تۋىلعان كەزدەن مەملەكەت ەسەبىنەن يپوتەكا ەنگىزۋدى ۇسىنامىز, – دەدى پارتيا وكىلدەرى.
