كەزدەسۋگە 300-دەن استام ادام قاتىستى. شتاب مۇشەلەرى پارتيانىڭ سايلاۋالدى باعدارلاماسىنداعى وڭىرلەردە الەۋمەتتىك جانە كوممۋنالدىق ينفراقۇرىلىمدى دامىتۋعا باعىتتالعان نەگىزگى باسىمدىقتار تۋرالى ايتتى.
– ەل اۋماعىنداعى مونوقالالاردىڭ پروبلەمالارى ءبىر-بىرىنە ۇقساس. حالىق كوشىپ جاتىر, ينجەنەرلىك جەلىلەر مەن جولداردىڭ توزىعى جەتكەن. ءبىلىم جانە مەديتسينا سالالارىندا دا شەشىلمەگەن ماسەلەلەر بار. ازاماتتاردىڭ ۇسىنىس-پىكىرىنىڭ نەگىزىندە پارتيا ءاربىر ءوڭىر ءۇشىن جەكە سايلاۋالدى باعدارلاما ازىرلەدى. وندا جول ساپاسىن جاقسارتۋعا, الەۋمەتتىك ينفراقۇرىلىمدى دامىتۋعا, ينتەرنەتپەن قامتاماسىز ەتۋگە باعىتتالعان جانە باسقا دا جۇيەلى شارالار قامتىلدى, – دەدى پارتيا توراعاسى ەرلان قوشانوۆ.
ول ارقالىقتى دامىتۋ ماقساتىندا ۇكىمەت كەشەندى جوسپار ازىرلەگەنىن جانە پارتيا قالا تۇرعىندارىمەن بىرلەسىپ ونىڭ ىسكە اسىرىلۋىنا قوعامدىق باقىلاۋدى قامتاماسىز ەتۋگە ءتيىس ەكەنىن اتاپ ءوتتى.
بۇدان سوڭ شتاب مۇشەلەرى ارقالىق جىلۋ ەنەرگەتيكالىق كومپانياسىنىڭ ەڭبەك ۇجىمىمەن كەزدەسىپ, توزىعى جەتكەن كوممۋنالدىق جەلىلەردىڭ جاي-كۇيىن تالقىلادى. 2027 جىلعا دەيىن پارتيا 40 شاقىرىم ەلەكتر جانە سۋ قۇبىرى جەلىلەرىن, سونداي-اق 65 شاقىرىم كارىز جەلىلەرىن قايتا جاڭارتۋدى قامتاماسىز ەتەدى.
جالپى ەلىمىز بويىنشا تۇرعىن ۇيلەر ينفراقۇرىلىمىن جاڭعىرتۋدىڭ اۋقىمدى جوباسى ىسكە قوسىلادى. ەنەرگەتيكا سالاسىن باسقارۋدى رەفورمالاۋ جالعاسادى. تيىمدىلىك پەن ينۆەستيتسيالىق تارتىمدىلىقتى ارتتىرۋ ارقىلى جەلىلەر مەن نىسانداردى ودان ءارى جاڭارتۋعا جول اشۋ جوسپارلانىپ وتىر.
بۇل كۇنى شتاب مۇشەلەرى شاعىن جانە ورتا بيزنەس وكىلدەرىمەن دە جۇزدەستى. پارتيالىقتار بيزنەستى جۇرگىزۋ بويىنشا قاراپايىم ەرەجەلەردى قامتاماسىز ەتۋگە كۇش سالاتىنىن اتاپ ءوتتى. 2027 جىلعا دەيىن كەم دەگەندە 15 مىڭ ارتىق رەتتەۋشى كەدەرگى جويىلادى. زاڭناما دەڭگەيىندە ەكونوميكاداعى مونوپوليانى جويۋ جانە ادال باسەكەلەستىكتى دامىتۋ جۇمىسى جۇرگىزىلەدى.
