ىشكى ىستەر مينيسترلىگى كۇزەت قىزمەتىن باقىلاۋ دەپارتامەنتى باسقارماسى باستىعىنىڭ ورىنباسارى سەرىك قۇسپانوۆتىڭ ايتۋىنشا, 2000 جىلعى 19 قازاندا «كۇزەت قىزمەتى تۋرالى» زاڭ قابىلداندى. قۇجاتتا كۇزەت قىزمەتىنىڭ قۇقىقتىق نەگىزدەرى بەلگىلەندى, ونى جۇزەگە اسىراتىن سۋبەكتىلەردىڭ مارتەبەسى مەن وكىلەتتىكتەرى ايقىندالدى. ەڭ باستىسى, كۇزەت قىزمەتى ليتسەنزيالاناتىن تۇرگە جاتقىزىلدى, بۇل مەملەكەت ءۇشىن ىشكى ىستەر مينيسترلىگى اتىنان وعان قاجەتتى تالاپتار قويۋعا جانە ولاردىڭ ساقتالۋىنا مەملەكەتتىك باقىلاۋدى جۇزەگە اسىرۋعا مۇمكىندىك بەردى.
– قوعام قارقىندى دامىعان سايىن كۇزەت قىزمەتتەرى بويىنشا زاڭنامانى جەتىلدىرۋ قاجەتتىلىگى ارتىپ كەلەدى. ءبىز ءوز تاراپىمىزدان قىزمەتىمىزگە قاتىستى زاڭناماعا ۇنەمى مونيتورينگ جۇرگىزەمىز جانە قاجەت بولعان جاعدايدا ءتيىستى تۇزەتۋلەر ەنگىزۋگە باستاماشىلىق جاسايمىز. ماسەلەن, كۇزەت قىزمەتى سالاسىنداعى زاڭنامانى جەتىلدىرۋ, جەكە جانە زاڭدى تۇلعالاردىڭ ازاماتتىق جانە م ۇلىكتىك قۇقىقتارىن قورعاۋ بويىنشا كۇزەت قىزمەتتەرىن كورسەتۋ ساپاسىن ارتتىرۋ ماقساتىندا ءبىز مۇددەلى مەملەكەتتىك ورگاندارمەن جانە ۇكىمەتتىك ەمەس ۇيىمدارمەن بىرلەسىپ, 2021 جىلى مەملەكەت باسشىسى قول قويعان سالالىق زاڭعا تۇزەتۋلەر ەنگىزۋگە باستاماشىلىق جاسادىق. بۇل زاڭ كۇزەت قىزمەتىمەن اينالىساتىن كاسىپكەرلىك سۋبەكتىلەرىنىڭ باسەكەگە قابىلەتتىلىگىن قولداۋعا جانە دامىتۋعا, تەرروريستىك تۇرعىدان وسال وبەكتىلەردىڭ قاۋىپسىزدىگىن قامتاماسىز ەتۋ دەڭگەيىن ارتتىرۋعا باعىتتالعان, – دەيدى سەرىك قۇسپانوۆ.
بۇگىندە قوعامدا مەكتەپتەگى قاۋىپسىزدىكتى كۇزەت فيرمالارى قامتاماسىز ەتسە دەگەن ۇسىنىس ءجيى ايتىلىپ ءجۇر. بەلگىلى بولعانداي, كۇزەت قىزمەتتەرىن كورسەتۋگە ارنالعان شارتتار جەرگىلىكتى بيۋدجەتتەن بولىنگەن قارجى شەڭبەرىندە مەملەكەتتىك ساتىپ الۋ تۋرالى زاڭناماعا سايكەس دەربەس, تىكەلەي ءبىلىم بەرۋ ۇيىمدارى مەن جەكە كۇزەت ۇيىمى اراسىندا جاسالادى.
– بۇل رەتتە, مەكتەپ اكىمشىلىگى قاۋىپسىزدىكتى قامتاماسىز ەتۋ شارالارىن جەرگىلىكتى قارجىلاندىرۋ ەسەبىنەن جۇزەگە اسىرادى. ليتسەنزيالانعان كۇزەت ۇيىمدارىنىڭ كۇزەتشىلەرىنىڭ ۆاحتەرلەردەن, كۇزەتشىلەردەن جانە قاۋىپسىزدىك قىزمەتتەرىنەن ايىرماشىلىعى اتىس قارۋى مەن ارنايى قۇرالداردى پايدالانۋعا قۇقىلى. سونىمەن قاتار كۇزەتشىلەر الدىن الا مامانداندىرىلعان وقۋ ورتالىقتارىندا اتىس, قۇقىقتىق, فيزيكالىق دايىندىق جانە باسقا پاندەر بويىنشا ەمتيحاندار تاپسىرىپ, تاجىريبەسىن ارتتىرىپ وتىرادى, – دەيدى سەرىك قۇسپانوۆ.
ونىڭ ايتۋىنشا, ەلىمىزدە 3 298 مەكتەپ پەن 4 214 بالاباقشادا ليتسەنزيالانعان كۇزەت قىزمەتى جوق.
– 2023 جىلدىڭ 1 قاڭتارىنداعى مالىمەت بويىنشا ءتيىستى ليتسەنزياسى بار كۇزەت ۇيىمدارى 3 404 مەكتەپ پەن 1 371 بالاباقشانى كۇزەتەدى. ونىڭ ىشىندە دابىل جۇيەسى ارقىلى جەدەل ارەكەت ەتەتىن ءموبيلدى توپتار ارقىلى 2 050-گە جۋىق مەكتەپ پەن 790 بالاباقشا كۇزەتىلەدى. قالعان وبەكتىلەر فيزيكالىق كۇزەتپەن قامتىلعان. وقۋ ورىندارىندا ليتسەنزيالانعان كۇزەتتىڭ بولماۋى كۇزەت قىزمەتتەرىن ساتىپ الۋ ءۇشىن جەرگىلىكتى بيۋدجەتتەن بولىنەتىن قاراجاتقا بايلانىستى. ويتكەنى جەكە كۇزەت ۇيىمدارى ولاردى اقىلى نەگىزدە كورسەتەدى, – دەيدى سپيكەر.
2023 جىلعى 1 قاڭتارداعى جاعداي بويىنشا ەلىمىزدە فيليالدارى مەن وكىلدىكتەرى بار 3 607 جەكە كۇزەت ۇيىمى تىركەلگەن, ولاردا 94 511 كۇزەتشى جۇمىس ىستەيدى.
