شتاب مۇشەلەرى «تاراز كوجوبۋۆ» جشس-نىڭ بىلعارى ءوندىرىسى مەن اياقكيىم تسەحتارىنىڭ جۇمىسىمەن تانىسىپ, كاسىپورىننىڭ ەڭبەك ۇجىمىمەن كەزدەستى. سەرىكتەستىك – بىلعارىدان جاسالعان بۇيىمدار مەن اياقكيىم شىعاراتىن ءىرى ءوندىرۋشى جانە تەرى وڭدەۋدەن باستاپ, دايىن ءونىم شىعارۋعا دەيىنگى تولىق وندىرىستىك تسيكلى بار جالعىز وتاندىق كاسىپورىن. ەكى وندىرىستە دە 500-دەن اسا قىزمەتكەر جۇمىس ىستەيدى. كومپانيانىڭ باسشىسى باۋىرجان نايزاقۇلوۆتى «اق جول» پارتياسى تاراز قالاسى ءماسليحاتى دەپۋتاتتىعىنا كانديدات رەتىندە ۇسىندى.
– بىرنەشە جىل بۇرىن وسىندا كەلگەندە, كاسىپورىن نەگىزىنەن سەمەيدەن شيكىزات ساتىپ الاتىن, بىراق كەيىن سەمەيدەگى زاۋىت بانكروتقا ۇشىرادى. سوندىقتان كاسىپكەر بىلعارى ءوندىرىسىن ءوزى قۇرىپ, دايىن ءونىم شىعارۋ ءۇشىن تەرىلەردى اۋىلداعى شارۋاشىلىقتاردان ساتىپ الۋعا ءماجبۇر بولدى. مۇنداي كاسىپكەرلەردى قورعاپ, قولداۋ قاجەت. سونىمەن قاتار كيىم-كەشەك پەن اياقكيىم ينفلياتسياعا جانە حالىقتىڭ ءال-اۋقاتىنا تىكەلەي اسەر ەتەتىن تاۋارلار, – دەدى ازات پەرۋاشەۆ.
جيىن بارىسىندا زاۋىت باسشىلىعى بىرقاتار تۇيتكىلدى ماسەلەگە توقتالدى. مىسالى, ەسكىرگەن تەحنيكا, ءوندىرىس ىسكە قوسىلعانعا دەيىن شەگەرىمى بار ينۆەستيتسيالىق نەسيەلەندىرۋدىڭ جوقتىعى, فەرمەرلەر مەن اۋىل تۇرعىندارىنان تەرى ساتىپ الۋعا بەرىلەتىن سۋبسيديانىڭ توقتاپ قالۋى سياقتى پروبلەمالار كوتەرىلدى. كادر ماسەلەسى دە وزەكتى بولىپ تۇر.
جۇمىسشىلار نەسيە ءوسىمى, باعا تۇراقسىزدىعى, باسپانانىڭ قولجەتىمسىزدىگى تۋرالى ويلارىن ايتتى. ا.پەرۋاشەۆ كاسىپورىن مەن ەڭبەك ۇجىمىن قولدايتىنىن ايتىپ, پارلامەنتتە «اق جول» فراكتسياسى قۇرىلعاننان كەيىن بۇل ماسەلەلەردى ۇكىمەت الدىندا كوتەرۋگە دايىن ەكەنىن مالىمدەدى.
شتاب مۇشەلەرى تاراز قالاسىنىڭ تۇرعىندارىمەن دە كەزدەستى. پارتيانىڭ ساياسي باعدارلاماسى تانىستىرىلعاننان كەيىن ەركىن پىكىرالماسۋ ءوربىپ, پارتيا توراعاسى جينالعان قاۋىمنىڭ سۇراقتارىنا جاۋاپ بەردى.
