وتىرىسقا قاتىسقان زيالى قاۋىم وكىلدەرى مەن ساراپشىلار ەلىمىزدە جۇرگىزىلگەن قوعامدىق-ساياسي رەفورمالاردىڭ ناتيجەلەرىن تالقىلادى. سونداي-اق ادىلەتتى قازاقستان جانە ينتەللەكتۋالدى ۇلت قالىپتاستىرۋ بارىسىنداعى ۇلتتىق قۇندىلىقتاردىڭ رولىنە كەڭىنەن توقتالدى. ديالوگ الاڭىنىڭ جۇمىسىن باستاعان ماۋلەن اشىمباەۆ ەلىمىزدە مەملەكەت باسشىسى قاسىم-جومارت توقاەۆتىڭ باستاماسىمەن اۋقىمدى رەفورمالار جۇرگىزىلىپ جاتقانىن اتاپ ءوتتى. سونداي-اق ول كونستيتۋتسياعا ەنگىزىلگەن وزگەرىستەر ادىلەتتى قازاقستان قۇرۋ جولىنداعى ماڭىزدى قادامدار بولعانىن تىلگە تيەك ەتتى. سەنات توراعاسى زاڭ شىعارۋ سالاسىنداعى جاڭاشىلدىقتارعا دا نازار اۋداردى. سونىڭ اياسىندا بۇگىندە سەنات وڭىرلەردىڭ مۇددەسىن قورعايتىن پالاتا رەتىندە قالىپتاسىپ جاتقانى بەلگىلى.
– ادىلەتتى قازاقستان دەگەنىمىز – ءبىرىنشى كەزەكتە, بارلىق سالاعا ادىلەتتىلىك قاعيداتىن ەنگىزۋ. وسى باعىتتاعى ورتاق ماقساتتارعا قول جەتكىزۋ ءۇشىن مەملەكەتتىك ينستيتۋتتار مەن ازاماتتىق قوعامنىڭ كۇشىن بىرىكتىرىپ, ءار ىستە ۇلتتىق مۇددە تۇرعىسىنان سارالاپ ارەكەت ەتۋ اسا ماڭىزدى. بۇگىنگىدەي سىندارلى كەزەڭدە ۇلتتى ۇيىتاتىن ورتاق قۇندىلىقتاردى دارىپتەۋدىڭ بەرەرى مول دەپ ەسەپتەيمىز, – دەدى ماۋلەن اشىمباەۆ.
ءوز سوزىندە پالاتا سپيكەرى نەگىزگى جانە حالىقتىڭ مۇددەسى مەن بۇگىنگى سۇرانىستارىنا ساي كەلەتىن قۇندىلىقتار جونىندە ايتتى.
– بۇگىنگى تاقىرىپ تۋرالى ءسوز قوزعاعان كەزدە ء«بىزدىڭ ورتاق قۇندىلىقتارىمىز قانداي؟» دەگەن زاڭدى ساۋال تۋىندايدى. بۇل تۇرعىدا اركىم ءارتۇرلى كوزقاراس ۇستانۋى مۇمكىن. بىراق نەگىزگى قاعيدالار بويىنشا ءبارىمىزدىڭ پىكىرىمىز ءبىر جەردەن شىعادى دەپ ويلايمىن. ءبىزدىڭ قوعامدى تاۋەلسىزدىك, ادىلەتتىلىك, تاتۋلىق, ءبىلىم, ەڭبەك جانە ءوزارا جاۋاپكەرشىلىك سياقتى قۇندىلىقتار بىرىكتىرەدى, – دەدى ماۋلەن اشىمباەۆ.
سونىمەن قاتار وتىرىس بارىسىندا ورتاق قۇندىلىقتاردى دارىپتەۋدىڭ تەتىكتەرى تۋرالى دا ءسوز بولدى. قاتىسۋشىلار ۇلتتىق مۇددەگە تابان تىرەيتىن دۇرىس قۇندىلىقتاردى وسكەلەڭ ۇرپاققا, جاستارعا ناسيحاتتاۋ كەزىندە جۇيەلى جۇمىس جۇرگىزۋ جانە ءتيىمدى جولىن تابۋ اسا ماڭىزدى ەكەنىن ايتتى. ودان بولەك, مەدياساراپشىلار مەن كرەاتيۆتى يندۋستريانىڭ وكىلدەرى كونتەنتتەردىڭ جاڭا ۇلگىسىن جانە ولاردى تاراتۋدىڭ زاماناۋي تاسىلدەرىن ۇسىندى.
ماۋلەن اشىمباەۆ تالقىلاۋ بارىسىندا ايتىلعان ۇسىنىستاردىڭ ءبارى سەناتتىڭ الداعى جۇمىسىندا ەسكەرىلەتىنىن جەتكىزدى.
– ادىلەتتى قازاقستان قۇرۋ باستاماسى ەلدىگىمىز بەن ەگەمەندىگىمىز ءۇشىن اسا ماڭىزدى قادام. ونى ىسكە اسىرۋ تەك مەملەكەتتىڭ عانا مىندەتى ەمەس. بۇل – بۇكىل ۇلت بولىپ جۇمىلاتىن ماڭىزدى مىندەت. وسى جولدا ورتاق قۇندىلىقتاردى قالىپتاستىرىپ, ولاردى دارىپتەۋدىڭ ۇتىمدى, زاماناۋي تەتىكتەرى مەن فورمالارىن تابۋدىڭ ءمانى زور. بۇل باعىتتا زيالى قاۋىم, عالىمدار, مەملەكەتتىك ورگاندار, كرەاتيۆتى يندۋستريا مەن ونەر سالاسىندا قىزمەت ەتىپ جۇرگەن ازاماتتار, قوعامدىق ۇيىمدار بىرلەسىپ, ءبارىمىز بىرگە ناتيجەلى ەڭبەك ەتەمىز دەپ سەنەمىن, – دەگەن سەنات توراعاسى بارشا قاتىسۋشىلارعا بەلسەندىلىك تانىتقاندارى ءۇشىن العىس ءبىلدىردى.
ديالوگ الاڭىنىڭ وتىرىسىنا سەناتورلارمەن بىرگە مەملەكەت جانە قوعام قايراتكەرى دارحان مىڭباي, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, «Bilim Media Group» كومپانياسىنىڭ ديرەكتورى راۋان كەنجەحان ۇلى, مەدياساراپشى ماقپال جۇماباي, مۋلتيپليكاتور, حالىقارالىق كينوفەستيۆالدەردىڭ لاۋرەاتى ساقيوللا قاسيەت تاعى باسقا ساراپشىلار قاتىستى.
تالقىلاۋدا مەدياساراپشى ماقپال جۇماباي مادەني كرەاتيۆ يندۋسترياسىن دامىتۋعا قاتىستى ءوز ۇسىنىستارىن ورتاعا سالدى.
– ەلىمىزدەگى كرەاتيۆ يندۋستريانىڭ باسىم باعىتى بولىپ وتىرعان IT سالاسىن مادەني كرەاتيۆ يندۋستريادان اجىراتا ءبىلۋ قاجەت. قازىر ءىت سالاسىن دامىتۋداعى وزىق تاجىريبەلەردى كرەاتيۆ يندۋسترياعا قولدانۋ ارقىلى ونى بارىنشا جىلدام دامىتۋعا مۇمكىندىك بار. ءساتتى جۇزەگە اسىرىلعان ءىت حابتار تاجىريبەسىنىڭ نەگىزىندە كرەاتيۆ حابتاردى دامىتۋ ۇسىنىسى بار. كرەاتيۆ حاب دەگەنىمىز شىعارماشىلىق جانە زياتكەرلىك الەۋەتى ايقىن كورىنەتىن ونەر ماماندارى شوعىرلانىپ, قايتالانباس ينتەلللەكتۋالدىق تۋىندىلار جاسايتىن, قوعامدى رۋحاني وركەندەۋگە باستايتىن كرەاتورلاردىڭ تامىر جاياتىن جەرى. بۇل جەردە ادامزاتقا ورتاق مادەني قۇندىلىقتار ومىرگە كەلەدى, – دەدى ءوز سوزىندە مەدياساراپشى.
