22-ءسى كۇنى تاڭەرتەڭنەن قالاىشىلىك قوعامدىق كولىكتەر ءوز ۋاقىتىندا رەيسكە شىعا الماي, 2-3 ساعاتقا كەشىكتى. كوشە كوكتايعاق, كەيبىر جەرلەردە سۋ كولكىپ جاتىر, جولدار جابىلعان, مەكتەپ وقۋشىلارى الىستان وقۋعا اۋىستىرىلدى. كۇنى بويى جاۋعان قىسقى جاڭبىر تەك كۇن بەسىنگە تايانعاندا عانا توقتاپ, ارتى قالىڭ قارعا ۇلاستى. «قازگيدرومەت» تسيكلوننىڭ سوڭىنان باتىستان انتيتسيكلون سوعىپ, اۋانىڭ تەمپەراتۋراسى 2-3 كۇننەن كەيىن 25 گرادۋسقا دەيىن تومەندەيدى دەگەن. ەگەر بۇگىنگى سىلپىلداق جاپپاي قاتىپ, سۋىق سوقسا, كوكتايعاق ءتىپتى كوك مۇزعا اينالۋى مۇمكىن.
اۋا رايىن بولجاۋشىلار وسى كۇنى كەشكە قاراي وبلىستىڭ باتىسى مەن سولتۇستىگىندە قاتتى سىرعىما جۇرەتىنىن حابارلادى. اۋانىڭ تەمپەراتۋراسى قاتتى تومەندەمەگەنىمەن, جەلدىڭ جىلدامدىعى سەكۋنتىنا 23 مەترگە جەتەتىنى ايتىلدى.
ال 22 اقپان كۇنى تاڭعى 11.00-دەن باستاپ بارلىق رەسپۋبليكالىق ماڭىزى بار جولدار جۇك ماشينالارى ءۇشىن جابىلدى. سونىڭ ىشىندە استانا-پەتروپاۆل باعىتىنداعى تراسسا روششينسك سەلوسىنان باستاپ وبلىس ورتالىعىنا دەيىن, جەزعازعان-پەتروپاۆل باعىتىنىڭ جولى توقسان بي اۋىلىنان باستاپ بەسكولگە دەيىن, پەتروپاۆل قالاسى ارقىلى وتەتىن رەسەيدىڭ چەليابينسكىسىنەن نوۆوسيبيرسكىگە باراتىن جولىنىڭ سولتۇستىك قازاقستان اۋماعىنان وتەتىن ۋچاسكەسى جابىلدى.
جولداردى جابۋ تۋرالى حابار شىققانعا دەيىن پەتروپاۆلدان ومبى قالاسىنا شىعىپ كەتكەن كاماز اۆتوماشيناسى تىركەمەسىمەن جولدان شىعىپ كەتىپ, ماعجان جۇماباەۆ اۋدانىنىڭ اۋماعىندا جامباستاپ قالدى. قالىڭ قاردىڭ پايداسى ءتيىپ, اۋدارىلىپ كەتۋدەن امان قالعان سياقتى. ايتەۋىر جۇرگىزۋشىسى زاقىم العان جوق.
وبلىس پوليتسەيلەرى قازىر قىزۋ جۇمىس ۇستىندە. ولار جاياۋ جۇرگىنشىلەر مەن كولىك ايداۋشىلارعا حابارلامالار جىبەرىپ, ساق بولۋعا شاقىرىپ جاتىر. اسىرەسە كولىك يەلەرىنە ءبىر-بىرىنە جاقىن جۇرمەۋدى, اراقاشىقتىقتى ۇزارتۋدى, جاياۋ جۇرگىنشىلەر وتەتىن جولداردا باياۋلاۋدى دىبىس كۇشەيتكىشپەن ەسكەرتىپ ءجۇر. كەشە تۇسكە دەيىن عانا قالانىڭ ىشىندە بەس جول-كولىك وقيعاسى تىركەلدى. ايتەۋىر زارداپ شەككەندەر جوق, بىراق كولىككە مەحانيكالىق زاقىمدار كەلتىرىلدى. كەشە تۇندە پاترۋلدىك پوليتسيا باتالونى ساقشىلارىنىڭ جولداردى باقىلاۋ سانى ارتتىرىلادى دەپ حابارلاندى.
مەكتەپ وقۋشىلارى ەرتەڭ دە ۇيلەرىنەن شىقپاي, ونلاين رەجىمدە وقيدى. توسىن تابيعاتتىڭ قاتاڭ مىنەزى قاتەرگە ۇرىندىرماسىن دەپ تىلەگەن تاۋبەشىل جاندار دا كوپ. لايىم, سولاردىڭ تىلەگى قابىل بولعاي.
سولتۇستىك قازاقستان وبلىسى
